ដូចនៅកម្ពុជាដែរ ពិធីបុណ្យបណ្តែតប្រទីត ដែលតាមភាសាថៃហៅថា Loy Krathong តែងប្រារព្ធឡើងនៅជារៀងរាល់យប់ពេញបរមី ខែកត្តិក ហើយសម្រាប់ឆ្នាំ២០២៤នេះ វានឹងប្រព្រឹត្តិទៅនៅថ្ងៃទី ១៥ ខែវិច្ឆិកា។.png)
ប្រជាជនថៃមានជំនឿថា ការបណ្តែតប្រទីតនឹងនាំមកនូវសេចក្តីសង្ឃឹម សេចក្តីសុខចម្រើន ជួយឲ្យពួកគេសម្រេចតាមប្រាថ្នាគ្រប់បែបយ៉ាង។ ម៉្យាងវិញទៀតនេះ វាក៏ជាពិធីបុណ្យសម្តែងនូវការគោរពចំពោះព្រះម៉ែគង្គា, ជាការដឹងគុណចំពោះទន្លេ ព្រែក បឹងបួរ ដែលជាប្រភពទឹកដ៏សំខាន់ក្នុងការទ្រទ្រងជីវិត ក៏ដូចជាការធ្វើពាណិជ្ជកម្មជាដើម។ ពិធីបុណ្យនេះគឺជាការរួមបញ្ចូលគ្នារវាងសាសនាហិណ្ឌូ និងសាសនាព្រះពុទ្ធ។
ពិធីបុណ្យ Loy Krathong នេះត្រូវបានជនជាតិថៃ ចងចាំគ្រប់ៗគ្នាតាមរយៈរឿងព្រេងនិទានថៃមួយ នាសម័យអាណាចក្រសុខោទ័យ សតវត្សទី១៤ ។ កាលគ្រានោះ ស្តេចសុខោទ័យ មានស្នំមួយអង្គ គឺនាងនង ណុបបាមា បានធ្វើប្រទីត(ដែលច្នៃចេញពីស្លឹកចេក ភ្ជាប់ជាមួយនឹងផ្កាឈូក ទៀន និងធូប) ហើយក៏ថ្វាយដល់ស្តេច។ ស្តេចក៏បានអុជទៀនធូប ហើយបណ្តែតប្រទីតនោះនៅទន្លេក្រុងសុខោទ័យ ហើយទំនៀមទំម្លាប់នេះក៏បានជាប់រហតមកដល់បច្ចុប្បន្ន។
សូមជម្រាបថា ពិធីបុណ្យ Loy Krathong ឆ្នាំ២០២៤ ត្រូវបានប្រារព្ធឡើងនៅតាមទន្លេសំខាន់ៗតាមបណ្តាខេត្តក្រុងជាច្រើនក្នុងប្រទេសថៃ ចាប់ពីចន្លោះថ្ងៃទី៨ ដល់ថ្ងៃទី១៧ ខែវិច្ឆិកានេះផងដែរ៕
