អស់រយៈពេល១សប្តាហ៍ហើយជុំវិញភាពចម្រូងចម្រាស MGC និង MGI ខណៈនៅលើបណ្តាញសង្គមក៏ថមថយកម្តៅហើយដែរ។ បើក្រឡេកមកមើលសកម្មភាពរបស់ ប៊ី សុធារី វិញកំពុងតែមមាញឹកជាមួយការងារដែលបុកចូលមកជាបន្តបន្ទាប់។ លើសពីនេះដ្បិតមិនចេញទៅប្រកួត MGI នៅប្រទេសថៃក្តីប៉ុន្តែគេសង្កេតឃើញថា ប៊ី សុធារី មានប្រជាប្រិយភាពមិនធម្មតាកើនអ្នកតាមដាននៅលើ IG ជាង១ម៉ឺននាក់ឯណោះត្រឹមរយៈពេលខ្លីនេះ។
គេចាំបានថាមុនការប្រកួត Miss Grand International ប៊ី សុធារី បវរកញ្ញាកម្ពុជាមានអ្នកតាមដានជិត២០០K បន្ទាប់ពីគ្រប់ចំនួន២០០K ហើយធ្លាក់ចុះមកវិញ។ ទោះជាយ៉ាងណា សកម្មភាពក្នុងការប្រកួតប៉ុន្មានថ្ងៃនៅលើទឹកដីកម្ពុជារួមជាមួយបញ្ហាជាមួយស្ថាបនិកស្ថាប័ន១សប្តាហ៍ បណ្តាញសង្គម Instagram របស់ ប៊ី សុធារី កើនឡើងយ៉ាងគំហករហូតដល់២១២K ។ 
នេះមានន័យថា ប៊ី សាធារី កើនអ្នកគាំទ្រដល់ទៅជាង១ម៉ឺននាក់ឯណោះក្នុងរយៈពេលខ្លីហើយក៏បញ្ជាក់បានថាដ្បិតតែបវរកញ្ញាកម្ពុជារូបនេះសម្រេចចិត្តមិនបន្តការប្រកួតនៅលើឆាកអន្តរជាតិទោះបីជាមានការទាមទារពីស្ថាប័ន MGI យ៉ាងណាក៏ សុធារី មិនផ្លាស់ប្តូរចិត្តរបស់នាងចូលរួមប្រកួតនៅប្រទេសថៃយ៉ាងណាក្តី តែបវរកញ្ញាកម្ពុជារូបនេះនៅតែឆក់ប្រជាប្រិយភាពបានទាំងក្នុងស្រុកនិងក្រៅស្រុក។
ទទួលបានប្រជាប្រិយភាពបែបនេះទំនងជា ពាក្យសម្តីរបស់ ប៊ី សុធារី បានចាក់ចំបេះដូងទស្សនិកជនដែលសម្រេចចិត្តយកឈ្នះបេះដូងប្រជាជនខ្លួនឯងជាងទៅប្រកួតដណ្តើមមកុដដែលមិនបានឱ្យតម្លៃមកប្រជាជនរបស់នាង។
គួរឱ្យដឹងថា បន្ទាប់ពីផ្ទុះបញ្ហាចម្រូងចម្រាសមកមិនបានចេញទៅប្រកួតតំណាងប្រទេស ប៊ី សុធារី ក៏កំពុងមមាញឹកចំពោះការក្នុងស្រុកដូចគ្នាចូលរួមកម្មវិធីផ្សេងៗ ខណៈនាងក៏ចូលរួមក្នុងព្រឹត្តិការណ៍ ស្នាមញញឹមនៃកម្ពុជា ដែលរៀបចំឡើងជាលើកទី២ នៅថ្ងៃទី២៩-៣០ តុលា ឆ្នាំ២០២៤ នេះជាមួយនឹងសិល្បករសិល្បការិនីជាច្រើនរូប៕
