DJ Wukong លើកគ្រវីទង់ជាតិប្រទេសកម្ពុជាក្នុងពេលចាក់បទ Remix វណ្ណដា និង Awich

Wukong គឺជា DJ ដ៏មានឈ្មោះបោះសំឡេងមួយរូបជាជនជាតិសិង្ហបុរីបានធ្វើឱ្យអ្នកគាំទ្រកម្ពុជាមានការចាប់អារម្មណ៍មិនតិចនោះទេបន្ទាប់ពីលោកបានគ្រវីទង់ជាតិប្រទេសកម្ពុជានៅក្នុងក្លិបកម្សាន្តក្នុងពេលចាក់បទ Remix «6 Years in the Game» របស់ វណ្ណដា និងតារារ៉េបជប៉ុន Awich ។ DJ Wukong និង វណ្ណដា ធ្លាប់បានជួបគ្នាដោយផ្ទាល់នៅពេល វណ្ណដា បានទៅចូលរួមជាភ្ញៀវពិសេសនៅក្នុងកម្មវិធី RAP VIET 3 ។

កាលពីយប់ថ្ងៃទី២៨ ខែកក្កដា DJ Wukong បានបង្ហោះវីដេអូខ្លីនៅលើបណ្តាញសង្គមរបស់ខ្លួនដោយគេបានឃើញលោកគ្រវីទង់ជាតិប្រទេសកម្ពុជាយ៉ាងស្វាហាប់ ពោរពេញដោយក្តីស្រលាញ់។ លោកបានចាក់បទ Remix «6 Years in the Game» របស់ វណ្ណដា និងតារារ៉េបជប៉ុន Awich ដែលតារារ៉េបទាំងពីរបានសហការជាមួយគ្នាកាលពីកន្លងមកនេះនិងបានផលិត MV នៅប្រទេសកម្ពុជាផងដែរ។ DJ Wukong គឺទទួលបានសិទ្ធិក្នុងការ Remix បទចម្រៀងមួយនេះផងដែរ ខណៈផលិតកម្មបារមីក៏ធ្លាប់បានចែករំលែកស្នាដៃ remix របស់ Wukong ដូចគ្នា។ ទន្ទឹមនឹងអារម្មណ៍រំភើប DJ រូបនេះក៏បានបង្ហាញឱ្យដឹងថារូបគេរង់ចាំអស់រយៈពេល១ឆ្នាំហើយក្នុងការបង្ហាញនេះដោយបានរម្លឹកឈ្មោះមេនសិន វណ្ណដា ផងដែរ។

ឃើញការស្រលាញ់របស់ DJ Wukong មកកាន់ប្រទេសកម្ពុជាបែបនេះអ្នកលេងបណ្តាញសង្គមខ្មែរជាច្រើនបានចូលទៅបង្ហាញការស្រលាញ់និងអរគុណចំពោះ DJ Wukong សម្រាប់ការស្រលាញ់របស់លោក។

គួរឱ្យដឹងថា DJ wukong និង វណ្ណដា ធ្លាប់បានជួបគ្នាដោយផ្ទាល់នៅប្រទេសវៀតណាម នៅពេលដែល វណ្ណដា បានចូលសម្តែងជាភ្ញៀវកិត្តិយសក្នុងកម្មវិធីប្រលងចម្រៀង RAP VIET 3 និងបានសម្តែងជាមួយម្ចាស់ក្សត្រីរ៉េបវៀតណាម Suboi ៕