កីឡាការិនី ខៀវ ចិន្ដារ័ត្ន បានឈ្នះមេដាយមាសទី១ជូនជាតិ បន្ទាប់ពីប្រកួតឈ្នះដោយពិន្ទុលើកីឡាការិនីឥណ្ឌូណេស៊ី Puspitasari Nurdiana លើវិញ្ញាសាប្រពៃណីក្នុងប្រភេទទម្ងន់ក្រោម៤៩គីឡូក្រាម នៅវគ្គផ្តាច់ព្រ័ត្រនៃការប្រកួតកីឡាយុទ្ធគុនចម្រុះជើងឯកអាស៊ី (AMMA) លើកទី២ ឆ្នាំ២០២៤ នៅវិមានកីឡដ្ឋានជាតិ។
ក្រោយចប់ការប្រកួត កីឡាការិនី ខៀវ ចិន្ដារ័ត្ន និយាយទាំងហូរទឹកភ្នែកថា ៖”ខ្ញុំពិតជារំភើបណាស់ មិននឹកស្មានថា ខ្ញុំអាចធ្វើបាន។ ខ្ញុំអរគុណលោកគ្រូខ្លាំងណាស់ ដែលបានផ្តល់ឱកាសដល់ខ្ញុំ។ គេប្រាប់ខ្ញុំថា ខ្ញុំចាស់ហើយ ខ្ញុំតូចណាស់ មិនអាចវ៉ៃប្រភេទទម្ងន់ ៤៩គីឡូក្រាមនេះបានទេ ដោយសារខ្ញុំមានទម្ងន់ត្រឹម ៤៣,៥ គីឡូក្រាមប៉ុណ្ណោះ។ រីឯកីឡការិនីឥណ្ឌូណេស៊ី Puspitasari Nurdiana ទម្ងន់ ៤៨,៨គីឡូក្រាមឯណោះ។ ប៉ុន្តែមានការជំរុញទឹកចិត្តពីលោកគ្រូ ក្រុមគ្រួសារ និងថ្នាក់ដឹកនាំ ដែលធ្វើឱ្យខ្ញុំធ្វើសម្រេចបានក្តីប្រាថ្នា ឈ្នះមេដាយមាស១គ្រឿងជូនជាតិ”។
គួរបញ្ជាក់ផងដែរ ការប្រកួតកីឡាយុទ្ធគុនចម្រុះជើងឯកអាស៊ី (AMMA) បានប្រព្រឹត្តិទៅបានដល់ថ្ងៃទី៣ហើយ កីឡាការិនី ខៀវ ចិន្ដារ័ត្ន ជាអត្តពលិកខ្មែរតែម្នាក់គត់ដែលទទួលបានមេដាយមាសនេះ៕
