ស្របពេលមនុស្សម្នាកំពុងអបអរសាទរចំពោះសិស្សានុសិស្សដែលទទួលបានលទ្ធផលល្អនៃការប្រលងសញ្ញាបត្រមធ្យមសិក្សាទុតិយភូមិ(បាក់ឌុប) តារាចម្រៀង ទីងតុង អតីតបេក្ខជន The Voice Cambodia រដូវកាលទី៣ បានចេញមកលើកទឹកចិត្តចំពោះប្អូនៗដែលទទួលបានលទ្ធផលមិនល្អចំពោះជំហានបរាជ័យលើកនេះត្រូវធ្វើខ្លួនឱ្យរឹងមាំយកបទពិសោធន៍នេះ ធ្វើកញ្ចក់ឆ្លុះមើលជីវិតខ្លួនឯងនិងខិតខំប្រឹងប្រែងបន្តទៀត។
នៅលើបណ្តាញសង្គមរបស់លោក ទីងតុង បានបង្ហោះសំណេរនៅល្ងាចថ្ងៃទី២៣ ខែវិច្ឆិកា លើកទឹកចិត្តចំពោះប្អូនៗដែលប្រលងធ្លាក់បាក់ឌុបថា «អត់មានអ្នកណាសាទរអ្នកប្រលងធ្លាក់ទេមែនទេ? ត្រូវណាស់! អ្នកណាទៅសប្បាយអរពេលទទួលលទ្ធផលមិនសមបំណងនោះ? បងតុងមិនពូកែលួងលោមទេអូនៗ! ការលួងលោមមានហើយ ពេលនេះយកបទពិសោធន៍នេះ ធ្វើកញ្ចក់ឆ្លុះមើលជីវិតខ្លួនឯង ថាបានប្រឹងប្រែងប៉ុណ្ណា?»។
តារាពហុជំនាញរូបនេះបន្តទៀតថា « តួនាទី អូនៗឥឡូវនេះមិនត្រឹមតែត្រូវរឹងមាំទេ តែត្រូវលួងម៉ាក់ប៉ា ក្រុមគ្រួសារគ្រប់គ្នានៅទីនេះ ឱ្យឈប់ខូចចិត្ត និងបារម្ភពីអូន ដោយការបង្ហាញឱ្យឃើញនូវការប្រឹងប្រែង លើជំហានថ្មីក្នុងជីវិតអូន។ ទោះរៀន ឬរកស៊ី ឬជំហានអ្វីបន្ទាប់ក៏ដោយត្រូវតែ «ខិតខំប្រឹងប្រែង» ធ្វើឱ្យពួកយើងឃើញធ្វើបានទេ?»។
គួរបញ្ជាក់ផងដែរថា លទ្ធផលបាក់ឌុបឆ្នាំ២០២៣ សម័យប្រលងថ្ងៃទី៦ ខែវិចិ្ឆកា ឆ្នាំ២០២៣បេក្ខជនប្រឡងជាប់មានចំនួន ៩៨ ៤៦០នាក់ ស្មើនឹង៧២,៨៩ ភាគរយ ៧២,៨៩ % បេក្ខជនជាប់និទ្ទេស A មានចំនួន ១៦៧៣នាក់ លើសពីឆ្នាំមុន៦២៤នាក់៕
