ថ្វីត្បិតតែរថយន្តបែបអឺរ៉ុបទំនើប និងទាន់សម័យ គឺជារថយន្តក្នុងក្តីស្រមៃរបស់មនុស្សជាច្រើនក៏ដោយ ប៉ុន្តែរថយន្តជប៉ុននៅតែត្រូវបានគេចាត់ទុកថា មានប្រជាប្រិយភាព និងពេញនិយមជាង ដោយសារគុណសម្បត្តិធំៗទាំងនេះ ទើបធ្វើឱ្យមនុស្សជាច្រើនមិនអាចប្តូរចិត្តពីរថយន្តជប៉ុន ទៅរថយន្តអឺរ៉ុបបានឡើយ។ ដូច្នេះហើយតើគុណសម្បត្តិអ្វីខ្លះ ដែលធ្វើឱ្យរថយន្តជប៉ុននៅតែមានភាពទាក់ទាញជាងរថយន្តអឺរ៉ុប? សម្រាប់មូលហេតុរួមមាន៖

១.រឹងមាំ និងធន់៖ រថយន្តជប៉ុនជាទូទៅមានភាពល្បីល្បាញដោយសារធន់ និងអាចប្រើប្រាស់បានច្រើនឆ្នាំ ដោយមិនចាំបាច់ត្រូវការថែទាំញឹកញាប់ពេកនោះទេ នេះគឺជាលទ្ធផលនៃការរចនា និងការផលិតដែលសង្កត់ធ្ងន់ទៅលើភាពរឹងមាំ និងធន់ ជាហេតុធ្វើឱ្យរថយន្តជប៉ុននៅតែមានប្រជាប្រិយភាពជាងរថយន្តដទៃ។

២.ការចំណាយលើការថែទាំទាប៖ តម្លៃនៃគ្រឿងបន្លាស់ និងកម្លាំងពលកម្មដើម្បីថែទាំរថយន្តជប៉ុនជាធម្មតាមានតម្លៃថោកជាងរថយន្តអឺរ៉ុប។ នេះអនុញ្ញាតឱ្យអ្នកប្រើប្រាស់អាចធ្វើជាម្ចាស់រថយន្តជប៉ុនបានរយៈពេលវែងដោយមិនខ្វល់ខ្វាយច្រើនអំពីថ្លៃថែទាំ។

៣.ប្រសិទ្ធភាពប្រេង៖ រថយន្តជប៉ុនជាច្រើនចាប់ពីប្រភេទ B-segment sedans ដល់ SUVs/PPVs ត្រូវបានរចនាឡើងដើម្បីសន្សំសំចៃប្រេង។ នេះគឺជាកត្តាចម្បងដែលមនុស្សជាច្រើនប្រើនៅពេលពិចារណាទិញរថយន្ត។

៤.ភាពជឿជាក់ខ្ពស់៖ ម៉ាករថយន្តជប៉ុនជាច្រើនត្រូវបានទទួលស្គាល់សម្រាប់ភាពជឿជាក់ និងស្តង់ដារគុណភាពខ្ពស់របស់ពួកគេ។ អ្នកអាចស្វែងរកគ្រឿងបន្លាស់បានយ៉ាងងាយស្រួល ទាំងគ្រឿងបន្លាស់ពិត និងគ្រឿងបន្លាស់ដែលអាចប្រៀបធៀបបាន ដូច្នេះវាអាចប្រើបានយូរឆ្នាំ។

៥.តម្លៃលក់បន្តល្អ៖ រថយន្តជប៉ុនមានតម្លៃលក់បន្តល្អបើធៀបទៅនឹងរថយន្តអឺរ៉ុប ដោយសារតែប្រជាប្រិយភាពខ្ពស់របស់វានៅលើទីផ្សារ ហើយតម្លៃថ្មីគឺទាបជាងរថយន្តអឺរ៉ុប។ ទោះបីជាអត្រានៃការរំលោះគឺដូចគ្នាក៏ដោយ ប៉ុន្តែបើគិតពីចំនួនលុយវិញក៏នៅតែចាត់ទុកថារថយន្តជប៉ុនមានតម្លៃថោកជាងរថយន្តអឺរ៉ុបផងដែរ។

ហេតុនេះហើយប្រសិនបើអ្នកចង់បានរថយន្ត ប្រើប្រាស់បានយូរ ស៊ីប្រេងតិច និងការថែទាំងាយស្រួល រថយន្តជប៉ុនអាចជាជម្រើសដ៏ល្អ។ ប៉ុន្តែប្រសិនបើអ្នកចង់បានរថយន្តដែលមានការរចនាស្រស់ស្អាត ដំណើរការខ្ពស់ និងបច្ចេកវិទ្យាទំនើបទាន់សម័យ រថយន្តអឺរ៉ុបគឺជាជម្រើសដ៏គួរឱ្យចាប់អារម្មណ៍មួយទៀតផងដែរ៕

ប្រទេសថៃ ៖ ពលរដ្ឋថៃលើកឡើងថា បច្ចុប្បន្ន មានពលករបរទេសជាច្រើននាក់ចូលមកធ្វើការនៅប្រទេសថៃទាំងស្របច្បាប់ និងខុសច្បាប់ ហើយពលករបរទេសទាំងនេះបានដណ្តើ.មការងាររបស់ពលរដ្ឋថៃ ។ ហេតុនេះ ពួកគេបានសំណូមពរឱ្យរដ្ឋាភិបាល និងស្ថាប័នពាក់ព័ន្ធជួយដោះស្រាយបញ្ហាពលករបរទេសខុសច្បាប់ដោយបញ្ជូនទៅស្រុកកំណើតវិញ ។

ពលរដ្ឋថៃនិយាយថា ពលករបរទេសមួយចំនួនដែលមកធ្វើការនៅប្រទេសថៃ បានទាមទារឱ្យរដ្ឋាភិបាលថៃលើកកម្ពស់ និងផ្តល់សិទ្ធស្មើគ្នាជាមួយពលរដ្ឋថៃ ជាពិសេស ពលករមីយ៉ាន់ម៉ា ។ ពលករបរទេសខ្លះទៀតមកបើកអាជីវកម្មខ្លួនឯងលើទឹកដីថៃ ហើយសមត្ថកិច្ចពុំដែលចាប់ខ្លួនបានទេ ដោយសារពួកគេដឹងខ្លួនមុន ពេលសមត្ថកិច្ចចុះត្រួតពិនិត្យទីតាំងអាជីវកម្ម ។

កាលពីថ្ងៃទី២១ ខែតុលា ឆ្នាំ២០២៤ សារព័ត៌មានថៃរាយការណ៍ថា រដ្ឋមន្ត្រីក្រសួងការងារថៃពុំបានផ្តល់ភាពសំខាន់លើពលករបរទេសទេ ហើយក្រសួងការងារនឹងចាត់វិធានការមិនឱ្យពលករបរទេសដណ្តើមការងារពលរដ្ឋថៃ ។ ពលករបរទេសគ្មានសិទ្ធបើកអាជីវកម្មទេ គឺពួកគេមានសិទ្ធត្រឹមតែលក់កម្លាំងពលកម្មប៉ុណ្ណោះ ។

រដ្ឋមន្ត្រីក្រសួងការងារ លោក ផិផាត់ រ៉ាជឆាកិច្ចប្រាកាន បានចេញមុខបកស្រាយករណីមតិនានាលើកឡើងថា ក្រសួងការងារផ្តល់ភាពសំខាន់លើពលករបរទេសខ្លាំងពេក ដោយលោកបញ្ជាក់ថា ក្រសួងការងារព្យាយាមធ្វើឱ្យពលករបរទេស និងថៃមានសិទ្ធិស្មើៗគ្នា ស្របតាមការកំណត់របស់អង្គការពលកម្មអន្តរជាតិ (ILO) ដោយសារថៃជាសមាជិករបស់អង្គការនេះ ។

លោករដ្ឋមន្ត្រីក្រសួងការងារបញ្ជាក់ថា លោកនឹងចាប់ផ្តើមអនុវត្តវិធានការចំនួន២ចំណុច ដើម្បីដោះស្រាយបញ្ហាពលករបរទេសដណ្តើមការងារពលរដ្ឋថៃ រួមមាន ៖ វិធានការការពារ និងការផាកពិន័យ តាមរយៈការបញ្ជូនសមត្ថកិច្ចចុះត្រួតពិនិត្យតាមទីតាំងធ្វើការរបស់ពលករបរទេស ។

លោក ផិផាត់ រ៉ាជឆាកិច្ចប្រាកាន រដ្ឋមន្ត្រីក្រសួងការងារនិយាយថា ៖ «វាជាការអនុវត្តតាមច្បាប់ថៃ គឺដាស់តឿន, ផាកពិន័យ និងបញ្ជូនពលករត្រឡប់ទៅប្រទេសកំណើតវិញ ហើយថៃពុំអនុញ្ញាតឱ្យពលករបរទេសប្រមូលផ្តុំគ្នាតវ៉ារឿងនយោបាយនៅលើទឹកដីថៃទេ» ៕

ប្រទេសឥណ្ឌា៖ រឿងរ៉ាវរបស់មហាសេដ្ឋីឥណ្ឌា Ratan Tata បានបង្កឱ្យមានការភ្ញាក់ផ្អើលយ៉ាងខ្លាំងពេញបណ្តាញសង្គមនាពេលថ្មីៗនេះ នៅពេលដែលលោកសម្រេចចិត្តទុកទ្រព្យសម្បត្តិភាគច្រើនរបស់លោកទៅឱ្យសត្វឆ្កែ ខណៈបងប្អូនរបស់មហាសេដ្ឋីរូបនេះទទួលបានទ្រពសម្បត្តិតិចជាងសត្វចិញ្ចឹមទៅទៀត។

យោងតាមគេហទំព័របរទេស The Sun មហាសេដ្ឋី Ratan Tata គឺជានាយកប្រតិបត្តិ Tata Group ដែលជាសាជីវកម្មដ៏ធំបំផុតមួយនៅក្នុងពិភពលោក មានទ្រពសម្បត្តិសរុបប្រមាណ ៤៥៦ លានដុល្លារអាមេរិក។

ប៉ុន្តែកាលពីដើមខែតុលា ឆ្នាំ២០២៤ នេះ មហាសេដ្ឋីឥណ្ឌារូបនេះ បានទទួលមរណភាព នៅមន្ទីរពេទ្យក្នុងទីក្រុង Mumbai ប្រទេសឥណ្ឌា ក្នុងជន្មាយុ ៨៦ ឆ្នាំ ដោយសាររោគគាពាធ។ អ្វីដែលគួរឱ្យភ្ញាក់ផ្អើលនោះគឺថា មុនលោកចែកឋានទៅ លោកបានសរសេរសំបុទ្រមួយដោយបន្សល់ទុកទ្រព្យសម្បត្តិចំនួនជាង ១០០ លានដុល្លារអាមេរិកទៅឱ្យសត្វឆ្កែ និងអ្នកបម្រើស្រី ២ នាក់ ខណៈបងប្អូនបង្កើតជាច្រើនទៀតរបស់លោកបានទទួលមរតកតែមួយចំណែកតូចប៉ុណ្ណោះ។

ការទុកលុយដ៏ច្រើនបែបនេះដល់សត្វចិញ្ចឹម និងអ្នកបម្រើគឺកម្រណាស់នៅក្នុងប្រទេសឥណ្ឌា ពីព្រោះជាធម្មតាទ្រព្យសម្បត្តិត្រូវបានប្រគល់ឱ្យក្នុងគ្រួសារប៉ុណ្ណោះ។ ទោះជាយ៉ាងណា នៅក្នុងសំបុត្ររបស់មហាសេដ្ឋី Ratan Tata បានសរសេរថា “ត្រូវតែថែទាំឆ្កែចិញ្ចឹមរបស់លោកឱ្យបានល្អបំផុត រហូតដល់ថ្ងៃចុងក្រោយនៃជីវិតរបស់ពួកវា”។ មហាសេដ្ឋីឥណ្ឌារូបនេះត្រូវបានគេស្គាល់ថា ជាបុរសឯកោមិនដែលធ្លាប់រៀបការ និងគ្មានប្រពន្ធកូនឡើយ ដូច្នេះលោកក៏ចាត់ទុកឆ្កែចិញ្ចឹមរបស់លោកជាមិត្តស្និតស្នាលបំផុត។

ការស្រលាញ់សត្វពេញមួយជីវិតរបស់លោក បានធ្វើឱ្យប្រជាជនឥណ្ឌាជាច្រើនភា្ញក់ផ្អើល ក៏ដូចជាកោតសរសើរនូវចិត្តដ៏សែនល្អប្រពៃរបស់លោកជាមួយសត្វចិញ្ចឹម។ មហាសេដ្ឋីរូបនេះកាលពីមុនគឺជាសប្បុរសជនដែលតែងតែជួយប្រជាជនស្លូតត្រង់ និងក្រីក្រជាច្រើននាក់ ដូច្នេះមរណភាពរបស់លោក Ratan Tata បានបន្សល់ទុកនូវភាពសោកសៅឥតឈប់ឈរក្នុងចិត្តប្រជាជនឥណ្ឌា៕

ប្រទេសស៊ុយអែត ៖ ទីក្រុង Stockholm ប្រទេសស៊ុយអែត បានអនុវត្តគម្រោងផ្លូវរូងក្រោមដីយ៉ាងពិសេស ដើម្បីជួយដល់ការបម្លាស់ទីរបស់ត្រីពីតំបន់មួយទៅតំបន់មួយ ពីព្រោះត្រីមួយចំនួនពិបាកបម្លាស់ទីពេលទឹកហូរខ្លាំង ។ ក្រៅពីជួយដល់ការបម្លាស់ទីរបស់ត្រី ស៊ុយអែតរំពឹងថា ផ្លូវរូងក្រោមដីនឹងអាចជួយស្តារប្រព័ន្ធអេកូឡូស៊ីក្នុងទឹកឡើងវិញ ។

អស់រយៈពេលជាង៤សតវត្សហើយ ដែលត្រីមួយចំនួនពិបាកបម្លាស់ទីនៅទីក្រុង Stockholm ប្រទេសស៊ុយអែត ដោយសារការបង្កើតប្រឡាយទឹក ឈ្មោះ «Sodertalje» ក្នុងទីក្រុង ។ បើទោះជាប្រឡាយទឹកនេះផ្តល់ផលប្រយោជន៍យ៉ាងច្រើនដល់មនុស្ស ប៉ុន្តែវាបានក្លាយជាឧបសគ្គដល់ត្រីក្នុងការបម្លាស់ទីពីតំបន់មួយទៅតំបន់មួយ ព្រមទាំងប៉ះពាល់ដល់ជីវៈចម្រុះក្នុងតំបន់ផងដែរ ។

ស៊ុយអែតបានយកថ្មពីទីតាំងស្រាវជ្រាវប្រវត្តិសាស្ត្រក្នុងតំបន់មកធ្វើផ្លូវរូងក្រោមដី ដើម្បីឱ្យវាមានលក្ខណៈដូចប្រឡាយទឹកធម្មជាតិពិតៗ ហើយត្រីនឹងអាចហែលតាមផ្លូវរូងក្រោមដីនេះ ដូចការហែលទឹកក្នុងប្រឡាយធម្មជាតិ ។ ក្រៅពីនេះ ក៏មានការបំពាក់ពន្លឺពិសេសក្នុងផ្លូវរូងក្រោមដីផងដែរ ដើម្បីជួយបំភ្លឺដល់ការបម្លាស់ទីរបស់ត្រី ។

ក្នុងផ្លូវរូងក្រោមដី ក៏មានបំពាក់កាមេរ៉ាដើម្បីត្រួតពិនិត្យការប្រើប្រាស់ និងប្រមូលព័ត៌មានទៅវិភាគអំពីសកម្មភាពត្រី និងវិធីបម្លាស់ទី ។ ក្រោយពីដំណើរការផ្លូវរូងក្រោមដី គេសង្កេតឃើញថា នៅបរិវេណម្ខាងទៀតរបស់ផ្លូវរូងក្រោមដី ឬបឹងម៉ាឡារ៉េន (Lake Malaren) ដែលជាបឹងមានទំហំធំលំដាប់ទី៣ នៅប្រទេសស៊ុយអែត មានត្រីជាច្រើនពូជ ។

ការបង្កើតផ្លូវរូងក្រោមដីសម្រាប់ជួយដល់ការបម្លាស់ទីរបស់ត្រីនៅទីក្រុង Stockholm ចាត់ទុកថា គឺជាគំនិតច្នៃប្រឌិតថ្មីសម្រាប់កាត់បន្ថយការប៉ះពាល់បរិស្ថាន នាថ្ងៃអនាគត ។ លើសពីនេះ វាជាការអភិរក្សប្រព័ន្ធអេកូឡូស៊ីដ៏មានតម្លៃឱ្យនៅស្ថិតស្ថេរជានិច្ច និងមិនរងផលប៉ះពាល់ដោយសារការបំផ្លាញរបស់មនុស្ស ៕

តៃវ៉ាន់ ៖ កាលពីថ្ងៃទី២៨ ខែតុលា ឆ្នាំ២០២៤ គេហទំព័រ ETtoday រាយការណ៍ថា នារីលេងបណ្តាញសង្គមម្នាក់នៅតៃវ៉ាន់ បានបង្ហោះរូបភាពគួរឱ្យរន្ធ.ត់ គឺនៅលើផ្លូវដែលនាងដើរនោះពោរពេញទៅដោយកំទេចកំទីអ្វីម្យ៉ាង ។ បើក្រឡេកមើលមួយភ្លែតឃើញថា វាដូចជាកំទេចឈើដែលត្រូវខ្យល់ព្យុះបោកបក់ធ្លាក់ ប៉ុន្តែពេលមើលជិតៗឃើញថា វាជាសត្វជន្លេនពពាក់ពពូនគ្នាគួរឱ្យខ្លា.ច ។

នារីម្នាក់នេះបានចែកចាយរូបភាពរបស់ខ្លួនក្នុងបណ្តាញសង្គម និងរៀបរាប់ថា ពេលនាងកំពុងដើរនៅតំបន់ឆាងជឺ ក្នុងទីក្រុងផីងទុង ស្ថិតនៅភាគខាងត្បូងតៃវ៉ាន់ ស្រាប់តែនាងឃើញជន្លេនជាច្រើនក្បាលរហូតរាប់មិនអស់ ពពាក់ពពូនគ្នានៅលើផ្លូវជិតស្មៅ ។ ជន្លេនខ្លះនៅមានជីវិត និងកម្រើកខ្លួនចុះ-ឡើង រីឯជន្លេនខ្លះទៀតមិនកម្រើកខ្លួន វាធ្វើឱ្យនាងព្រឺសម្បុរយ៉ាងខ្លាំង ។

នាងនិយាយថា ៖ «ខ្ញុំបានឃើញជន្លេនវារពេញផ្លូវទាំងអស់ តើមានរឿងអ្វីកើតឡើង? វាគួរឱ្យខ្លាចខ្លាំងណាស់» ។ ក្រោយពីនាងបង្ហោះរូបភាពក្នុងបណ្តាញសង្គមមិនយូរប៉ុន្មាន ក៏ផ្ទុះការចាប់អារម្មណ៍ពីអ្នកលេងបណ្តាញសង្គម និងមានចំនួនចូលមើលរូបភាពរបស់នាង រហូតដល់ជាង៥ម៉ឺនលើកក្នុងរយៈពេលដ៏ខ្លី ។ មនុស្សភាគច្រើនជឿថា វាជាប្រផ្នូលប្រាប់ពីហេតុការណ៍អាក្រក់ពាក់ព័ន្ធនឹងគ្រោះរញ្ជួយដី ។

អ្នកលេងបណ្តាញសង្គមម្នាក់និយាយថា ៖ «តៃវ៉ាន់នឹងកើតគ្រោះរញ្ជួយដីធ្ងន់ធ្ងរ» ។ មនុស្សម្នាក់ទៀតថា ៖ «ខ្ញុំធ្លាប់បានអានអត្ថបទផ្សព្វផ្សាយក្នុងអ៊ីនធើរណេតថា ជន្លេននឹងបម្លាស់ទីទៅក្បែរតំបន់រំញ័រខ្លាំង» ។

មនុស្សផ្សេងទៀតថា ៖ «ពេលរញ្ជួយដីធ្ងន់ធ្ងរកន្លងមក នៅសួនកុមារទាំងអស់ពោរពេញទៅដោយជន្លេន» ។ ចំណែកមតិខ្លះទៀតនិយាយថា ជន្លេនបម្លាស់ទីទាំងនេះ គឺបណ្តាលមកពីភ្លៀងធ្លាក់ខ្លាំង ទើបពួកវាឡើងពីដីព្រមៗគ្នា ។

កាលពីឆ្នាំ២០២២ ការិយាល័យឧតុនិយមតៃវ៉ាន់ ធ្លាប់បានផ្សព្វផ្សាយឯកសារមួយថា បើទោះជាមនុស្សមួយចំនួនជឿថា ជន្លេនពាក់ព័ន្ធនឹងគ្រោះរញ្ជួយដី ឬជាមូលហេតុបណ្តាលឱ្យកើតគ្រោះធម្មជាតិ ប៉ុន្តែបើតាមទិន្នន័យ និងការស្រាវជ្រាវដោយអ្នកជំនាញបង្ហាញថា ការបម្លាស់ទីរបស់ជន្លេន ពុំពាក់ព័ន្ធនឹងគ្រោះរញ្ជួយដីទេ ។

មន្ត្រីឧតុនិយមបញ្ជាក់ថា តាមធម្មតា ជន្លេនជាច្រើនក្បាលតែងតែចេញពីក្នុងដីនៅពេលយប់ ឬពេលព្រឹក ពីព្រោះគឺជាពេលអាកាសធាតុត្រជាក់ជាងពេលណាៗទាំងអស់ ។ ម្យ៉ាងទៀត ពេលយប់ ឬពេលព្រឹកមានទឹកសន្សើមច្រើន ៕

ប្រទេសអូស្ត្រាលី៖ ក្រុមអ្នកស្រាវជ្រាវវិទ្យាសាស្ត្រមកពីសកលវិទ្យាល័យអូស្ត្រាលី RMIT បានកែច្នៃកាហ្វេដែលប្រើរួច ឬកាកសំណល់កាហ្វេឱ្យប្រែក្លាយទៅជាធាតុផ្សំម្យ៉ាងនៃវត្ថុធាតុដើមដែលអាចលាយបញ្ចូលទៅក្នុងបេតុង ដើម្បីធ្វើឱ្យផ្លូវបេតុងកាន់តែរឹងមាំ និងយូរអង្វែងប្រកបដោយនិរន្តរភាព ។
ការកែច្នៃនេះមានគោលបំណងផ្លាស់ប្តូរពីកាកសំណល់កាហ្វេអត់ប្រយោជន៍ ទៅជាវត្ថុធាតុដើមដ៏ចំាំបាច់បំផុតមួយអាចប្រើប្រាស់បានទាំងក្នុងវិស័យសំណង់ និងជួយកាត់បន្ថយការបំពុលបរិយាកាសចេញពីបរិស្ថានទៀតផង។

យោងតាមលោក Rajeev Roychand បាននិយាយថា ជាទូទៅគ្រាប់កាហ្វេត្រូវបានគេចាត់ទុកជាធនធានធម្មជាតិដែលប្រើប្រាស់ច្រើនជាងគេបំផុតទី ២ របស់ពិភពលោកបន្ទាប់ពីធនធានទឹក។ ជារៀងរាល់ឆ្នាំ កាហ្វេប្រមាណជា ១០ លានតោនត្រូវបានផលិតហើយកាកសំណល់ប្រមាណ ៦ លានតោនត្រូវបានបោះចោលចូលទៅក្នុងបរិស្ថាន ដោយកាកសំណល់ទាំងនោះបានចូលរួមយ៉ាងសំខាន់ក្នុងការបំផ្លាញបរិយាកាសភពផែនដីតាមរយៈការបញ្ចេញឧស្ម័នមេតាន និងឧស្ម័នផ្ទះកញ្ចក់។

ដើម្បីកុំឱ្យកាកសំណល់កាហ្វេអត់ប្រយោជន៍ អ្នកស្រាវជ្រាវបានធ្វើការដុតកំដៅកាកសំណល់កាហ្វេក្រោមសីតុណ្ហភាព ៣៥០ អង្សាសេ នៅក្នុងម៉ាស៊ីនបច្ចេកវិទ្យាទំនើប ដើម្បីបង្កើតឱ្យបាននូវជីវឧស្ម័ន ឬហៅថា biochar។ biochar អាចជំនួសខ្សាច់ ១៥% សម្រាប់ប្រើប្រាស់ដើម្បីបង្កើតជាបេតុង ហើយធ្វើឱ្យបេតុងកាន់តែមានភាពរឹងមាំរហូតដល់ ៣០% ដោយត្រូវការស៊ីម៉ងត៍តិចជាងមុន ១០% ផងដែរ ។

ហេតុនេះកែច្នៃកាហ្វេដែលប្រើរួច ឬកាកសំណល់កាហ្វេ គឺជួយជំនួសខ្សាច់ ធ្វើឱ្យការសាងសង់ផ្លូវបេតុងរឹងមាំ និងយូរអង្វែងជាងមុន។ បន្ទាប់ពីអូស្ត្រាលីបានសាងសង់ផ្លូវបេតុងធ្វើពីកាហ្វេដំបូងគេនៅលើពិភពលោករួច សាកលវិទ្យាល័យផ្សេងៗទៀត ក៏កំពុងសម្លឹងមើលជីវឧស្ម័ន ឬ biochar និងសារធាតុជីវឧស្ម័នផ្សេងៗទៀតនៅក្នុងការបង្កើតបេតុងប្រកបដោយនិរន្តរភាពផងដែរ៕

ប្រទេសអូស្ត្រាលី៖ ក្រុមអ្នកស្រាវជ្រាវវិទ្យាសាស្ត្រមកពីសកលវិទ្យាល័យអូស្ត្រាលី RMIT បានកែច្នៃកាហ្វេដែលប្រើរួច ឬកាកសំណល់កាហ្វេឱ្យប្រែក្លាយទៅជាធាតុផ្សំម្យ៉ាងនៃវត្ថុធាតុដើមដែលអាចលាយបញ្ចូលទៅក្នុងបេតុង ដើម្បីធ្វើឱ្យផ្លូវបេតុងកាន់តែរឹងមាំ និងយូរអង្វែងប្រកបដោយនិរន្តរភាព ។
ការកែច្នៃនេះមានគោលបំណងផ្លាស់ប្តូរពីកាកសំណល់កាហ្វេអត់ប្រយោជន៍ ទៅជាវត្ថុធាតុដើមដ៏ចំាំបាច់បំផុតមួយអាចប្រើប្រាស់បានទាំងក្នុងវិស័យសំណង់ និងជួយកាត់បន្ថយការបំពុលបរិយាកាសចេញពីបរិស្ថានទៀតផង។

យោងតាមលោក Rajeev Roychand បាននិយាយថា ជាទូទៅគ្រាប់កាហ្វេត្រូវបានគេចាត់ទុកជាធនធានធម្មជាតិដែលប្រើប្រាស់ច្រើនជាងគេបំផុតទី ២ របស់ពិភពលោកបន្ទាប់ពីធនធានទឹក។ ជារៀងរាល់ឆ្នាំ កាហ្វេប្រមាណជា ១០ លានតោនត្រូវបានផលិតហើយកាកសំណល់ប្រមាណ ៦ លានតោនត្រូវបានបោះចោលចូលទៅក្នុងបរិស្ថាន ដោយកាកសំណល់ទាំងនោះបានចូលរួមយ៉ាងសំខាន់ក្នុងការបំផ្លាញបរិយាកាសភពផែនដីតាមរយៈការបញ្ចេញឧស្ម័នមេតាន និងឧស្ម័នផ្ទះកញ្ចក់។

ដើម្បីកុំឱ្យកាកសំណល់កាហ្វេអត់ប្រយោជន៍ អ្នកស្រាវជ្រាវបានធ្វើការដុតកំដៅកាកសំណល់កាហ្វេក្រោមសីតុណ្ហភាព ៣៥០ អង្សាសេ នៅក្នុងម៉ាស៊ីនបច្ចេកវិទ្យាទំនើប ដើម្បីបង្កើតឱ្យបាននូវជីវឧស្ម័ន ឬហៅថា biochar។ biochar អាចជំនួសខ្សាច់ ១៥% សម្រាប់ប្រើប្រាស់ដើម្បីបង្កើតជាបេតុង ហើយធ្វើឱ្យបេតុងកាន់តែមានភាពរឹងមាំរហូតដល់ ៣០% ដោយត្រូវការស៊ីម៉ងត៍តិចជាងមុន ១០% ផងដែរ ។

ហេតុនេះកែច្នៃកាហ្វេដែលប្រើរួច ឬកាកសំណល់កាហ្វេ គឺជួយជំនួសខ្សាច់ ធ្វើឱ្យការសាងសង់ផ្លូវបេតុងរឹងមាំ និងយូរអង្វែងជាងមុន។ បន្ទាប់ពីអូស្ត្រាលីបានសាងសង់ផ្លូវបេតុងធ្វើពីកាហ្វេដំបូងគេនៅលើពិភពលោករួច សាកលវិទ្យាល័យផ្សេងៗទៀត ក៏កំពុងសម្លឹងមើលជីវឧស្ម័ន ឬ biochar និងសារធាតុជីវឧស្ម័នផ្សេងៗទៀតនៅក្នុងការបង្កើតបេតុងប្រកបដោយនិរន្តរភាពផងដែរ៕