ពេលឮឈ្មោះ Starbucks គ្រប់គ្នាតែងតែគិតដល់ហាងកាហ្វេមែនទេ? ប៉ុន្តែប្រសិនបើយើងនិយាយថា Starbucks មិនត្រឹមតែជាហាងកាហ្វេប៉ុណ្ណោះទេ ថែមទាំងជាធនាគារផងដែរ តើវានឹងដំណើរការយ៉ាងដូចម្តេច?
Starbucks គឺជាក្រុមហ៊ុនលក់កាហ្វេប្រណីតដ៏ធំបំផុតរបស់ពិភពលោក ប៉ុន្តែឥឡូវនេះពួកគេកំពុងប្រតិបត្តិការដូចធនាគារហើយ។ មានន័យថា អតិថិជន Starbucks ទាំងអស់អាចប្រើកាត Starbucks ដើម្បីទិញកាហ្វេបញ្ចុះតម្លៃ និងទូទាត់តាមកាត សន្សំពិន្ទុ។

បច្ចុប្បន្នហាង Starbucks ទទួលយកការទូទាត់តាមរយៈកាតទាំងនេះ ដែលភ្ជាប់ជាមួយកម្មវិធីទូរស័ព្ទរបស់អតិថិជន។ អតិថិជនកាន់តែច្រើនប្រើកាតទាំងនេះសម្រាប់ការទូទាត់ រង្វាន់ដែលពួកគេប្រមូលបាន ដែលអាចប្តូរយកជាភេសជ្ជៈ ឬអាហារ។ អតិថិជនស្មោះត្រង់របស់ Starbucks ជាធម្មតាទទួលទានកាហ្វេពី Starbucks ហើយជារឿយៗពួកគេផ្ទុកប្រាក់បន្ថែមលើកាតរបស់ពួកគេ ដើម្បីទទួលបានរង្វាន់កាន់តែច្រើន។

កម្មវិធីថ្មីរបស់ Starbucks នេះគឺជាទ្រព្យសកម្មដ៏សំខាន់ ដែលមានតម្លៃជាង ២ ពាន់លានដុល្លារ ហើយវានៅតែបន្តកើនឡើង។ សូម្បីតែធនាគារធម្មតារបស់សហរដ្ឋអាមេរិកក៏មានទ្រព្យសកម្មចំនួន ១ ពាន់លានដែរ នោះមានន័យថា Starbucks មានទ្រព្យសកម្មច្រើនជាងធនាគារទៅទៀត។ តាមពិតទៅ កម្មវិធីរបស់ Starbucks មានតម្លៃណាស់ ដែលវាបម្រើជាប្រភពនៃមូលនិធិសម្រាប់ការអភិវឌ្ឍន៍អាជីវកម្ម ដោយសារតែអតិថិជនទុកលុយរបស់ពួកគេក្នុងកាត ហើយអ្វីដែលសំខាន់គឺផ្តល់ឱ្យ Starbucks នូវប្រាក់កម្ចីគ្មានការប្រាក់។

ទ្រព្យសកម្មដ៏សំខាន់នេះនៅតែមានជាមួយ Starbucks ហើយពួកគេអាចប្រើប្រាស់វាសម្រាប់ការអភិវឌ្ឍន៍អាជីវកម្មរបស់ពួកគេ។ ទីបំផុតកម្មវិធីរបស់ Starbucks អនុញ្ញាតឱ្យអតិថិជនគ្រប់គ្រងអ្វីៗគ្រប់យ៉ាង ហើយពួកគេអាចប្រើប្រាស់ប្រាក់ដែលពួកគេផ្ទុកលើវានៅទីតាំង Starbucks ណាមួយនៅទូទាំងពិភពលោក។ អតិថិជនជាច្រើនផ្ទុកប្រាក់បន្ថែមលើកម្មវិធីរបស់ពួកគេសម្រាប់ការប្រើប្រាស់នាពេលអនាគត។ ដូច្នេះអ្នកក៏អាចណែនាំគំនិតកម្មវិធីថ្មីនេះនៅក្នុងអាជីវកម្មផ្ទាល់ខ្លួនរបស់អ្នកផងដែរ។ មនុស្សជាច្រើនបានអនុវត្តវារួចហើយតាមវិធីផ្សេងៗ រហូតមកដល់ពេលនេះវាពិតជាទទួលបានជោគជ័យខ្លាំងណាស់៕

ទន្លេ Nerodimka គឺជាទន្លេតែមួយគត់នៅអឺរ៉ុប ដែលហូរចូលទៅក្នុងសមុទ្រពីរក្នុងពេលតែមួយ មានន័យថា ផ្នែកខាងឆ្វេងនៃទឹកទន្លេគឺហូរចូលទៅក្នុងសមុទ្រខ្មៅ ខណៈពេលដែលផ្នែកខាងស្តាំហូរចូលក្នុងសមុទ្រ Aegean។
ទន្លេនេះមានទីតាំងនៅសាធារណរដ្ឋកូសូវ៉ូ ក្នុងតំបន់ Nerodime មានប្រភពមកពីទន្លេ Golema Reka នៅលើភ្នំដែលបង្កើតជាពីសាខាសំខាន់ៗ។ សាខាទីមួយគឺសាខាភាគខាងជើងនៃទឹកទន្លេ Nerodimka ដែលនឹងហូរចូលទៅក្នុងទន្លេ Sitnica បន្ទាប់មកហូរចូលទៅក្នុងទន្លេ Iber, Morava, Danube និងចូលទៅក្នុងសមុទ្រខ្មៅតែម្តង។

ខណៈសាខាទីពីរវិញគឺសាខាខាងត្បូង បានរួមបញ្ចូលគ្នាជាមួយដៃទន្លេផ្សេងទៀតនៃទន្លេ Nerodimka ដោយបន្តដំណើរឆ្ពោះទៅកាន់សមុទ្រ Aegean តាមរយៈទន្លេ Lepenc និង Vardar ។ មូលហេតុដែលទន្លេនេះហូរចូលទៅក្នុងសមុទ្រពីរក្នុងពេលតែមួយគឺដោយសារប្រឡាយសិប្បនិម្មិត។ នៅសតវត្សទី ១៤ ក្នុងរជ្ជកាលរបស់ស្តេច Milutin ប្រឡាយមួយត្រូវបានសាងសង់ដើម្បីភ្ជាប់ស្រះ Sazlia ជាមួយនឹងទន្លេ Nerodima បង្កើតបានជាសិប្បនិម្មិតមួយ។

ប្រឡាយសិប្បនិម្មិតនេះជួយបង្វែរទឹកពីភាគខាងត្បូងនៃទន្លេ Nerodimka ចូលទៅក្នុងទន្លេ Lepenec ដែលជាផ្នែកមួយនៃអាងបង្ហូរសមុទ្រ Aegean ។ ទន្ទឹមនឹងនេះដែរ ទន្លេ Sitnica ដែលមានប្រភពចេញពីស្រះ Sazlia នៅក្នុងភូមិ Saliz ក៏ហូរកាត់ភាគខាងជើងចូលទៅក្នុងទន្លេ Iber ដែលជាផ្នែកនៃអាងបង្ហូរសមុទ្រខ្មៅផងដែរ។ សាខាទាំងពីរនៃទន្លេនេះត្រូវបានការពារដោយរដ្ឋាភិបាលកូសូវ៉ូចាប់តាំងពីឆ្នាំ ១៩៧៩ ហើយមានទីតាំងនៅក្នុងដែនជម្រកសត្វព្រៃដ៏តឹងរឹង។ យោងតាមរដ្ឋាភិបាលក្នុងតំបន់ ទន្លេនេះមានតម្លៃណាស់សម្រាប់ការអប់រំ ការស្រាវជ្រាវ និងទេសចរណ៍។

គួរបញ្ជាក់ដែរថា សាធារណរដ្ឋកូសូវ៉ូ ធ្លាប់ជាខេត្តមួយរបស់ប្រទេសស៊ែប៊ី ប៉ុន្តែបានផ្តាច់ខ្លួនចេញ ហើយបានប្រកាសឯករាជ្យនៅឆ្នាំ ២០០៨។ ទោះជាយ៉ាងណាក៏ដោយ ស៊ែប៊ីមិនទទួលស្គាល់វាទេ ដោយបច្ចុប្បន្ននៅតែចាត់ទុកកូសូវ៉ូជាផ្នែកមួយនៃទឹកដីរបស់ខ្លួន។ ជម្លោះរវាងកូសូវ៉ូ និងប្រទេសស៊ែប៊ីបានអូសបន្លាយជាច្រើនសតវត្សមកហើយ។ ស៊ែប៊ីចាត់ទុកតំបន់នេះជាមជ្ឈមណ្ឌលសាសនា និងវប្បធម៌របស់ខ្លួន ដោយមានវត្តអារាមគ្រិស្តអូស្សូដក់ជាច្រើនកន្លែងរបស់ប្រទេសស៊ែប៊ីផងដែរ៕

ប្រទេសចិន ៖ ទីក្រុងសៀងហៃ ប្រទេសចិនបានហាមឃាត់ពលរដ្ឋស្លៀកពាក់ធ្វើខ្មោច Halloween នៅតាមផ្លូវសាធារណៈ ប៉ុន្តែទីក្រុងនេះសំណូមពរឱ្យពលរដ្ឋអបអរពិធីបុណ្យ Halloween នៅកន្លែងផ្ទាល់ខ្លួន ដោយអាជ្ញាធរអះអាងថា ដើម្បីរក្សាសន្តិសុខសណ្តាប់ធ្នាប់ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២៩ ខែតុលា ឆ្នាំ២០២៤ ។

នាពេលថ្មីៗនេះ សមត្ថកិច្ចនៅទីក្រុងសៀងហៃបានដើរយាមល្បាតនៅតាមដងផ្លូវ ដើម្បីហាមឃាត់ការប្រារព្ធពិធីបុណ្យ Halloween នៅទីសាធារណៈ ហើយបើសមត្ថកិច្ចឃើញអ្នកណាម្នាក់ស្លៀកពាក់ឈុត Fantasy ឬតែងមុខមាត់ធ្វើខ្មោច ឬបីសាច និងដើរនៅតាមផ្លូវ ឬប្រមូលផ្តុំគ្នានៅតាមគោលដៅ គឺសមត្ថកិច្ចនឹងប្រាប់ឱ្យពួកគេបំបែកគ្នា និងទៅប្រារព្ធពិធីបុណ្យនេះនៅកន្លែងផ្ទាល់ខ្លួន ។

សមត្ថកិច្ចបានហាមឃាត់ក្រុមមនុស្សស្លៀកពាក់ឈុត Fantasy ដែលកំពុងប្រារព្ធពិធីបុណ្យ Halloween នៅសួនច្បារសាធារណៈក្នុងទីក្រុងសៀងហៃ រួចហើយសមត្ថកិច្ចក៏បានបណ្តេញពួកគេឱ្យចេញពីទីសាធារណៈ ។ អ្នកចូលរួមប្រារព្ធពិធីបុណ្យមួយចំនួនត្រូវបាននាំទៅស្ថានីយប៉ូលិស ដើម្បីឱ្យដោះឈុត Fantasy និងលាងមុខខ្មោចចេញ ។

ទីក្រុងសៀងហៃពុំបានប្រកាសជាផ្លូវការថា ហាមពលរដ្ឋប្រារព្ធពិធីបុណ្យ Halloween ទេ ប៉ុន្តែអាជ្ញាធរបានប្រាប់ពលរដ្ឋ និងក្រុមហ៊ុនផ្សេងៗរយៈពេល១សប្តាហ៍មុន ដើម្បីឱ្យពលរដ្ឋចូលរួមសហការជាមួយអាជ្ញាធរ ។ បើពលរដ្ឋចង់អបអរពិធីបុណ្យនេះ គួរតែរៀបចំនៅកន្លែងផ្ទាល់ខ្លួន ដូចជា ៖ លំនៅឋាន, សាលារៀន និងកន្លែងធ្វើការ ហើយកុំប្រមូលផ្តុំគ្នានៅទីសាធារណៈ ។

ក្រៅពីនេះ អាជ្ញាធរក៏បានសុំការសហការពីម្ចាស់ក្លិបរាត្រី និងភោជនីយដ្ឋានក្នុងតំបន់កន្លែងផ្សេងៗ ហាមរៀបចំកម្មវិធីណាមួយក្នុងថ្ងៃបុណ្យ Halloween ដូចជា ៖ ការប្រកួតសម្លៀកពាក់ Fantasy ដោយអាជ្ញាធរអះអាងថា ដើម្បីរក្សាសណ្តាប់ធ្នាប់ក្នុងសង្គម និងរបៀបរៀបរយនៅទីសាធារណៈ ។

មតិនានាលើកឡើងថា ទីក្រុងសៀងហៃបានហាមឃាត់ពលរដ្ឋស្លៀកពាក់ឈុត Halloween និងចូលរួមអបអរពិធីបុណ្យនេះជាសាធារណៈ ដោយសារកាលពីឆ្នាំ២០២៣ មានជនឆ្លៀតឱកាសយកថ្ងៃបុណ្យនេះ ស្លៀកពាក់ឈុត Fantasy រួចហើយបង្កបញ្ហាក្នុងសង្គម រួមមាន ៖ រិះគន់ពីយុវជនចិនគ្មានការងារធ្វើ ។

អាជ្ញាធរក្រុងសៀងហៃបញ្ជាក់ថា ពុំបានហាមឃាត់ពលរដ្ឋប្រារព្ធពិធីបុណ្យ Halloween ទេ គ្រាន់តែចង់ឱ្យពលរដ្ឋប្រារព្ធពិធីបុណ្យនេះនៅកន្លែងផ្ទាល់ខ្លួន ។ រីឯសួនកម្សាន្ត Shanghai Disneyland អាចរៀបចំពិធីបុណ្យតាមធម្មតា ប៉ុន្តែបើអ្នកណាម្នាក់តែងខ្លួនធ្វើខ្មោច ហើយនាំគ្នាទៅថតរូបនៅកណ្តាលក្រុង គឺពុំអាចធ្វើបានទេ ពីព្រោះក្នុងអំឡុងពេលនេះ មានសមត្ថកិច្ចយាមកាមយ៉ាងតឹងរ៉ឹង ៕

សហរដ្ឋអាមេរិក ៖ អគារដ៏ចម្លែកមួយនេះស្ថិតនៅតំបន់ជនបទក្នុងរដ្ឋ Kansas សហរដ្ឋអាមេរិក ដែលមានប្រវត្តិយ៉ាងអាថ៌កំបាំង និងគួរឱ្យចាប់អារម្មណ៍ ។ កាលពីឆ្នាំ២០២២ ក្រុមហ៊ុនអចលនទ្រព្យបានប្រកាសលក់អគារក្នុងតម្លៃជាង៣៦ម៉ឺនដុល្លារអាមេរិក សម្រាប់មហាសេដ្ឋីណាដែលមានប្រាក់ច្រើនអាចជួសជុលអគារឡើងវិញ ។

នៅផ្នែកខាងក្នុងអគារ គឺជាលេណដ្ឋានលាក់ខ្លួនរបស់កងទ័ពអាមេរិក និងធ្លាប់ជាកន្លែងដាក់មីស៊ីលបាញ់ឆ្លងទ្វីប កាលពីឆ្នាំ១៩៦០ ។ អគារនេះមានសុវត្ថិភាព និងអាចទប់ទល់ជាមួយការវាយប្រហារដោយអាវុធនុយក្លេអ៊ែរបាន ។ ប៉ុន្តែបច្ចុប្បន្ន អគារនៅក្រោមដីគ្មានភាពស្រស់ស្អាត និងមិនគួរឱ្យរស់នៅទេ លើកលែងតែអ្នកទិញអគារមានប្រាក់ជួសជុលឱ្យថ្មីឡើងវិញ ។

លេណដ្ឋានត្រូវបានសាងសង់ស្មើទំហំដីជាង៤ហិកតា ហើយនៅក្រោមអគារមានភ្លើងអគ្គិសនី, ទឹកស្អាត និងប្រព័ន្ធចម្រោះទឹកកខ្វក់ ។ អគារនេះត្រូវបានសាងសង់ជាច្រើនជាន់នៅក្រោមដី ហើយនៅជាន់ក្រោមបង្អស់ គឺជាបន្ទប់សម្រាប់បង្ហោះមីស៊ីល ។

កាលពីឆ្នាំ២០២២ ក្រុមហ៊ុនអចលនទ្រព្យ Hirsch Real Estate បានប្រកាសលក់អគារក្នុងតម្លៃជាង៣៦ម៉ឺនដុល្លារអាមេរិក ដោយក្រុមហ៊ុនផ្សព្វផ្សាយថា គេអាចយកអគារធ្វើជាការិយាល័យ ឬឃ្លាំងទុកសម្ភារៈ ។ វាជាកន្លែងមានសក្តានុពលយ៉ាងខ្លាំង ហើយអាចកែច្នៃអគារធ្វើជាលំនៅឋាន, អាផាតមិន និងកន្លែងស្នាក់នៅបណ្តោះអាសន្ន ។ បើអតិថិជនចង់បានទីកន្លែងមានសុវត្ថិភាព និងខុសប្លែកពីគេ គឺអគារនេះស័ក្តិសមយ៉ាងខ្លាំង ។

ចំណែកប្រវត្តិរបស់អគារវិញ គឺវាជាកន្លែងបង្ហោះមីស៊ីល Atlas F មួយកន្លែងក្នុងចំណោម១២កន្លែង ដែលស្ថិតនៅរដ្ឋ Kansas សហរដ្ឋអាមេរិក ប៉ុន្តែបច្ចុប្បន្ន អគារទាំងមូលត្រូវបានទុកចោល ។ កងទ័ពអាមេរិកបានយកអគារក្រោមដីធ្វើជាលេណដ្ឋានគេចពីគ្រោះថ្នាក់ ទើបអគារត្រូវបានសាងសង់ឱ្យក្លាយជាកន្លែងទប់ទល់នឹងការវាយប្រហារដោយអាវុធនុយក្លេអ៊ែរ ៕

ប្រទេសកូរ៉េខាងជើង ៖ កាលពីថ្ងៃទី២៧ ខែតុលា ឆ្នាំ២០២៤ សារព័ត៌មានបរទេសរាយការណ៍ថា កូរ៉េខាងជើងបានចាប់ផ្តើមសាងសង់របងនៅតាមព្រំដែនជាប់កូរ៉េខាងត្បូង ក្រោយពីកូរ៉េខាងជើងបានបំផ្ទុះគ្រាប់បែ.ក បំផ្លា.ញ ផ្លូវ កាលពីពាក់កណ្តាលខែតុលា ឆ្នាំ២០២៤ ។ ក្រៅពីនេះ មេដឹកនាំកំពូលកូរ៉េខាងជើងបានបញ្ជាឱ្យកែប្រែខ្លឹមសារក្នុងរដ្ឋធម្មនុញ្ញ និងចាត់ទុកថា កូរ៉េខាងត្បូងជាសត្រូវរបស់ខ្លួន ។

តាមរូបភាពថតពីផ្កាយរណបរបស់អាមេរិក និងបានផ្សព្វផ្សាយកាលពីថ្ងៃទី២៤ ខែតុលា កន្លងមកថា កូរ៉េខាងជើងបានសាងសង់របងនៅតាមព្រំដែនជាប់កូរ៉េខាងត្បូង ដែលមានប្រវែង៩៥ម៉ែត្រ ។ របងនេះស្ថិតនៅភាគខាងជើងនៃខ្សែបន្ទាត់ព្រំដែនយោធា ហើយកាលពីមុន នៅទីនេះ គឺជាទីតាំងតភ្ជាប់ទៅកាន់តំបន់ឧស្សាហកម្ម «គេស៊ុង» និងទីក្រុងប៉ាជូ ដែលជាទីក្រុងជាយដែនរបស់កូរ៉េខាងត្បូង ។

ក្រៅពីនេះ ផ្កាយរណបរបស់អាមេរិកក៏បានបង្ហាញពីរូបភាពការសាងសង់សំណង់ផ្សេងទៀតរបស់កូរ៉េខាងជើងផងដែរ ដែលមានប្រវែងប្រមាណ២០០ម៉ែត្រ ស្ថិតនៅទីតាំងក្បែរគ្នា ។

កាលពីពាក់កណ្តាលខែតុលា ឆ្នាំ២០២៤ កងទ័ពកូរ៉េខាងជើងបានបំផ្ទុះគ្រាប់បែកបំផ្លាញផ្លូវយ៉ុងគី និងផ្លូវដុងហ៊ែ ដោយអះអាងថា គឺជាវិធានការមួយពុំអាចចៀសបាន ប៉ុន្តែវាត្រឹមត្រូវតាមរដ្ឋធម្មនុញ្ញ និងជាការកាត់ផ្តាច់ទំនាក់ទំនងជាមួយកូរ៉េខាងត្បូង ។

សារព័ត៌មានកណ្តាលកូរ៉េ (KCNA) របស់រដ្ឋាភិបាលក្រុងព្យុងយ៉ាង រាយការណ៍ថា កូរ៉េខាងជើងបានកែប្រែខ្លឹមសារខ្លះក្នុងរដ្ឋធម្មនុញ្ញ និងបន្ថែមខ្លឹមសារថ្មី ដោយកំណត់ថា កូរ៉េខាងត្បូងជាសត្រូវរបស់កូរ៉េខាងជើង ។ ការកែប្រែខ្លឹមសាររដ្ឋធម្មនុញ្ញ គឺធ្វើឡើងតាមការបញ្ជារបស់មេដឹកនាំកំពូលកូរ៉េខាងជើង លោក គីម ជុងអ៊ុន កាលពីដើមឆ្នាំ២០២៤ គឺឱ្យសភាប្រជាជនកំពូលកែតម្រូវខ្លឹមសាររដ្ឋធម្មនុញ្ញ ។

គួរបញ្ជាក់ថា កាលពីឆ្នាំ២០២០ កូរ៉េខាងជើងបានបំផ្ទុះគ្រាប់បែកបំផ្លាញមជ្ឈមណ្ឌលសម្របសម្រួលរួមរវាងប្រទេសកូរ៉េទាំងពីរ ដែលមជ្ឈមណ្ឌលនេះស្ថិតនៅក្នុងតំបន់ឧស្សាហកម្ម «គេស៊ុង» របស់កូរ៉េខាងជើង ។ រីឯប្រាក់សម្រាប់ការចំណាយសាងសង់មជ្ឈមណ្ឌលនេះ គឺបានមកពីកូរ៉េខាងត្បូង ៕

នៅពេលបច្ចេកវិទ្យា AI កាន់តែរីកចម្រើនខ្លាំងឡើង បានធ្វើឱ្យយើងឃើញស្នាដៃជាច្រើនដែលបង្កើតឡើងដោយមនុស្សយន្ត ។ ជាក់ស្តែង ស្នាដៃសិល្បងៈដ៏ទំនើបនេះ គឺកើតឡើងដោយសារដៃមនុស្សយន្តប្រើប្រាស់បច្ចេកវិទ្យា AI រៀនសូត្រពីជំនាញគូរគំនូរតាមមនុស្ស បន្ទាប់មក ដៃមនុស្សយន្តនឹងគូរគំនូរជាថ្មីតាមរបៀបមនុស្សយន្ត ។

គំនូរគូរដោយដៃមនុស្សយន្តនេះ បានក្លាយជាការរួមបញ្ចូលគ្នារវាងស្នាដៃសិល្បៈរបស់មនុស្សជាមួយបច្ចេកវិទ្យា AI យ៉ាងស្រស់ស្អាត ។ មនុស្សយន្តអាចប្រើប្រាស់ដៃគូរគំនូរនេះ មានឈ្មោះថា D.O.U.G ដែលបង្កើតឡើងដោយអ្នកជំនាញដ៏ល្បីឈ្មោះម្នាក់ជាកូនកាត់ចិន និងកាណាដា គឺអ្នកស្រី Sougwen Chung ។

អ្នកស្រីរៀបរាប់ថា អ្នកស្រីបានចំណាយពេលពេលវេលាអស់ជាច្រើនឆ្នាំអភិវឌ្ឍន៍បច្ចេកវិទ្យា AI ដើម្បីជួយឱ្យមនុស្សយន្តអាចប្រើប្រាស់ដៃគូរគំនូរ ក្រោយពីវាបានរៀនសូត្រតាមផ្ទាំងគំនូរដែលគូរដោយមនុស្ស ។

អ្នកស្រី Sougwen Chung បានបង្កើតប្រព័ន្ធបណ្តាញសរសៃប្រសាទសិប្បនិម្មិត និងហ្វឹកហាត់មនុស្សយន្តឱ្យចេះវិភាគពីផ្ទាំងគំនូរដែលអ្នកស្រីបានគូរ ដើម្បីឱ្យវាអាចគូររូបតាមអ្នកស្រី ។ នេះជាផ្នែកមួយដើម្បីឱ្យយើងឈ្វេងយល់ថា តើមនុស្ស និងមនុស្សយន្តអាចធ្វើការរួមគ្នាបានដែរឬទេ ។

ក្រៅពីនេះ អ្នកស្រីត្រូវបានគេសរសើរថា គឺជាអ្នកចាប់ផ្តើមបង្កើតការសហការគ្នារវាងមនុស្សជាមួយមនុស្សយន្តទៀតផង ហើយអ្នកស្រីក៏ស្ថិតក្នុងចំណោមបុគ្គល១០០នាក់ ដែលមានឥទ្ធិពលបំផុតលើពិភពលោក ផ្នែកប្រើប្រាស់បច្ចេកវិទ្យា AI និងការច្នៃប្រឌិត ដែលចាត់ចំណាត់ថ្នាក់ដោយទស្សនាវដ្តី Time កាលពីឆ្នាំ២០២៣ ។

ការបង្ហាញស្នាដៃគូរគំនូរដោយដៃមនុស្សយន្តនេះ គឺបានធ្វើឡើងក្នុងកម្មវិធី «The House of Fine Art» នៅទីក្រុងឡុងដ៍ ប្រទេសអង់គ្លេស ។ រូបគំនូរគូរដោយដៃមនុស្សយន្តទទួលបានការចាប់អារម្មណ៍យ៉ាងខ្លាំងពីអ្នកចូលរួមកម្មវិធី ។

រូបគំនូរគូរដោយដៃមនុស្សយន្តខ្លះទៀត ត្រូវបានអ្នកចូលរួមកម្មវិធី «The House of Fine Art» ប្រមូលទិញយក ដោយសារពួកគេចាប់អារម្មណ៍នឹងស្នាដៃសិល្បៈដែលកើតឡើងពីការសហការរវាងមនុស្ស និងមនុស្សយន្ត ។ ស្នាដៃសិល្បៈទាំងនេះបានរំលេចរូបភាពយ៉ាងល្អឥតខ្ចោះនៅលើផ្ទាំងក្រណាត់ ៕