ពិតជាមិនធម្មតានោះទេសម្រាប់ Rosé សមាជិកក្រុម BLACKPINK ដោយបទ «APT» របស់នាងដែលល្បីខ្ទរខ្ទារមិនថាក្មេងមិនថាចាស់ពេញចិត្តនឹងបទចម្រៀងនេះរហូតត្រឹមតែរយៈពេល១០៥ថ្ងៃបទនេះឈានដល់១ពាន់លានដងនៅលើយូធូបហើយក្លាយជាបទដែលមានការស្តាប់លឿនបំផុតទី៥នៅលើពិភពលោកបន្ទាប់ពីបទ « Hello, Despacito , Shape of You និង Mi Gente»។

Rosé សមាជិកក្រុម BLACKPINK បានបង្កើតសមិទ្ធិផលដ៏គួរឱ្យចាប់អារម្មណ៍មួយទៀតដើម្បីបន្ថែមកេរ្តិ៍ដំណែលដែលរីកចម្រើនយ៉ាងឆាប់រហ័សរបស់នាងក្នុងនាមជាសិល្បករទោល។ អាល់ប៊ុមទោលដំបូងរបស់ Rosé មានចំណងជើងថា «rosie» បានដណ្ដើមពិភពលោកយ៉ាងឆាប់រហ័ស ដោយក្លាយជាអាល់ប៊ុមដំបូងដ៏ធំបំផុតនៅក្នុងការផ្សាយថ្ងៃដំបូងក្នុងចំណោមសិល្បករ K-Pop ក្នុងប្រវត្តិសាស្រ្តរបស់ Spotify ហើយថែមទាំងលើសពីកំណត់ត្រាផ្ទាល់ខ្លួនរបស់ BLACKPINK ដែលមានចំនួន ១៧០ លានដងជាមួយនឹងអាល់ប៊ុម «Born Pink» ។

លើសពីនេះ វីដេអូចម្រៀងរបស់ «APT» ដែលសហការជាមួយនឹង Bruno Mars បានបំបែកឯតទគ្គកម្មរបស់ «Gangnam Style» សម្រាប់វីដេអូចម្រៀងដែលមានការទស្សនាលឿនបំផុតរហូតដល់៨០០លានដង ត្រឹមតែ៨១ថ្ងៃនិង១០ ម៉ោងដើម្បីសម្រេចបាននូវស្នាដៃនេះ។ ឥឡូវនេះភាពជោគជ័យនៃ «APT» បានឈានដល់កម្រិតខ្ពស់ជាងនេះ។ វីដេអូនេះបានឈានដល់តួលេខមានអ្នកចូលមើលលើសពី១ពាន់លានដង ដែលនេះជាវីដេអូដំបូងរបស់ Rosé ដែលសម្រេចបាននូវស្នាដៃដ៏គួរអោយចាប់អារម្មណ៍នោះ។ មិនត្រឹមតែប៉ុណ្ណោះ «APT» បានកើនឡើងដល់ ១ ពាន់លានស្ទ្រីមក្នុងរយៈពេលត្រឹមតែ ៣ ខែចាប់តាំងពីការចេញផ្សាយរបស់វា។

វីដេអូចម្រៀងផ្លូវការផ្សេងទៀតរបស់ Rosé គឺមានចំនួនមើលដ៏គួរឱ្យចាប់អារម្មណ៍ ដោយបច្ចុប្បន្នមានអ្នកចូលមើលបទ «toxic till the end» លើសពីចំនួន៧១លានដង និងមានអ្នកចូលមើល ៧២ លានដងសម្រាប់បទ«number one girl»។ ជាមួយនឹងវីដេអូចម្រៀងនីមួយៗរបស់ Rosé ត្រូវបានចេញផ្សាយក្នុងរយៈពេលប៉ុន្មានខែចុងក្រោយនេះ ចំនួនអ្នកមើលខ្ពស់របស់ពួកគេកាន់តែគួរឱ្យចាប់អារម្មណ៍៕

 

សហរដ្ឋអាមេរិក ៖ កាលពីថ្ងៃទី៣១ ខែមករា ឆ្នាំ២០២៥ សារព័ត៌មានបរទេសរាយការណ៍ថា ប្រធានាធិបតីអាមេរិក លោក Donald Trump ប្រកាសដំឡើងពន្ធទំនិញពីបណ្តាប្រទេសសមាជិក BRICS រហូតដល់១០០% បើពួកគេឈប់ចាយប្រាក់ដុល្លារអាមេរិក ឬប្រើប្រាស់រូបិយប័ណ្ណថ្មីក្នុងការធ្វើពាណិជ្ជកម្មអន្តរជាតិ។

លោក Trump បានសរសេរក្នុងបណ្តាញសង្គម Truth Social កាលពីថ្ងៃទី៣០ ខែមករា កន្លងមកថា លោកចង់ឱ្យប្រទេសទាំងនេះសន្យាពុំប្រើប្រាស់រូបិយប័ណ្ណថ្មីជំនួសប្រាក់ដុល្លារអាមេរិក បើមិនដូច្នោះទេ ពួកគេនឹងត្រូវអាមេរិកដំឡើងពន្ធទំនិញ ១០០% ។ គ្មានផ្លូវទេ ដែលបណ្តាប្រទេសសមាជិក BRICS ប្រើប្រាស់រូបិយប័ណ្ណផ្សេងជំនួសប្រាក់ដុល្លារអាមេរិកក្នុងការធ្វើពាណិជ្ជកម្មអន្តរជាតិ ។ បើប្រទេសណាមួយព្យាយាមធ្វើបែបនេះ អាមេរិកនឹងដំឡើងពន្ធទំនិញប្រទេសនោះខ្ពស់ និងផ្តាច់ទំនាក់ទំនង ។

ប្រទេសជាសមាជិក BRICS រួមមាន ៖ ចិន, រុស្ស៊ី, ឥណ្ឌា, ប្រេស៊ីល, អាហ្វ្រិកខាងត្បូង, អ៊ីរ៉ង់, អេហ្ស៊ីប, អេមីរ៉ាតអារ៉ាប់រួម អេត្យូពី និងឥណ្ឌូណេស៊ី ហើយបច្ចុប្បន្ន មានប្រទេសមួយចំនួនបានសុំចូលជាសមាជិក រួមមាន ៖ ថៃ, ម៉ាឡេស៊ី និងតួកគី ។ ទោះជាប្រទេសទាំងនេះគ្មានរូបិយប័ណ្ណប្រើប្រាស់រួមគ្នា ប៉ុន្តែក្រោយពីប្រទេសលោកខាងលិចដាក់ទណ្ឌកម្មរុស្ស៊ី ដោយសារការធ្វើសង្គ្រាមជាមួយអ៊ុយក្រែន ពួកគេបានពិភាក្សាគ្នាពីការប្រើប្រាស់រូបិយប័ណ្ណថ្មីជំនួសប្រាក់ដុល្លារអាមេរិក សម្រាប់ការធ្វើពាណិជ្ជកម្មអន្តរជាតិ ។

កិច្ចប្រជុំកំពូលរបស់ថ្នាក់ដឹកនាំបណ្តាប្រទេស BRICS នៅប្រទេសរុស្ស៊ី កាលពីខែតុលា ឆ្នាំ២០២៤ លោក វ្ល៉ាឌីមៀរ ពូទីន ប្រធានាធិបតីរុស្ស៊ី ថ្លែងថា ការព្យាយាមរបស់អាមេរិកក្នុងការបង្ខំឱ្យប្រទេសផ្សេងៗចាយប្រាក់ដុល្លារសម្រាប់ការធ្វើពាណិជ្ជកម្មអន្តរជាតិ នឹងមានផលវិបាកដល់អាមេរិក នាពេលក្រោយ ។ អាមេរិកប្រើប្រាស់ប្រាក់ដុល្លារជាអាវុធ ហើយវាជាកំហុសឆ្គងដ៏ធំ ។ លោកថា ៖ «មិនមែនយើងបដិសេធចាយប្រាក់ដុល្លារទេ ប៉ុន្តែបើពួកគេមិនព្រមឱ្យយើងធ្វើការ តើយើងអាចធ្វើអ្វីបាន? យើងត្រូវបង្ខំឱ្យស្វែងរកជម្រើសផ្សេងជំនួស» ។

ទោះជាប្រាក់ដុល្លារអាមេរិកត្រូវបានប្រើប្រាស់ច្រើនបំផុតក្នុងជំនួញពិភពលោក និងជម្នះបញ្ហាប្រឈមកន្លងមកក្តី ប៉ុន្តែបណ្តាប្រទេសសមាជិក BRICS រួមទាំងប្រទេសកំពុងអភិវឌ្ឍន៍ផ្សេងៗបញ្ជាក់ថា ពួកគេធុញទ្រាន់នឹងឥទ្ធិពលរបស់អាមេរិកក្នុងប្រព័ន្ធហិរញ្ញវត្ថុពិភពលោក ៕

ប្រទេសចិន ៖ កាលពីថ្ងៃទី៣០ ខែមករា ឆ្នាំ២០២៥ សារព័ត៌មានបរទេសរាយការណ៍ថា ពេលនារីម្នាក់កំពុងតែសម្តែងជានាងមច្ឆាឱ្យភ្ញៀវទេសចរទស្សនាក្នុងអាងត្រី Aquarium នៅទីក្រុង Xishuangbanna ប្រទេសចិន ស្រាប់តែត្រីយក្ស១ក្បាលបានហែលមកខាំក្បាលរបស់នាងមួយទំហឹងបណ្តាលឱ្យភ្ញៀវទេសចរភ្ញាក់ផ្អើលយ៉ាងខ្លាំង ដោយសារឃើញហេតុការណ៍កើតឡើងផ្ទាល់ភ្នែក ។

អ្វីដែលធ្វើឱ្យមហាជនហួសចិត្តបំផុតនោះ គឺក្រោយពីត្រីយក្សខាំក្បាលរបស់នាងបណ្តាលឱ្យរងរបួសហើយ អ្នកគ្រប់គ្រងអាងត្រីបានហៅនាងមកសម្តែងឱ្យភ្ញៀវទេសចរទស្សនាបន្តទៀត ហើយផ្តល់ប្រាក់សំណងតែបន្តិចបន្តួច និងហាមនាងនិយាយរឿងនេះដាច់ខាត ។

វីដេអូចែកចាយក្នុងបណ្តាញសង្គម គេបានឃើញត្រីយក្ស១ក្បាលហែលទឹកមកក្បែរនាងដែលស្លៀកពាក់ឈុតមច្ឆា បន្ទាប់មក វាក៏ខាំក្បាលនាងយ៉ាងខ្លាំងនៅចំពោះមុខអ្នកទស្សនាជាច្រើន ។ ក្មេងៗ និងអ្នកទស្សនាបានស្រែកខ្លាំងៗដោយការភ័យខ្លាច ប៉ុន្តែសំណាងល្អ នាងអាចគេចខ្លួនពីមាត់ត្រីយ៉ាងលឿន និងប្រញាប់ហែលឡើងលើផ្ទៃទឹក ។

សារព័ត៌មានចិនរាយការណ៍ថា នារីរូបនេះឈ្មោះ ម៉ាឆា អាយុ២២ឆ្នាំ ជាជនជាតិរុស្ស៊ី ។ នាងរងរបួសនៅត្រង់ក្បាល ក និងភ្នែក ដោយសារត្រីយក្សខាំ រីឯវ៉ែនតាជ្រមុជទឹក និងឧបករណ៍ពាក់លើច្រមុះរបស់នាងបានខូចខាតផងដែរ ។

រីឯសារព័ត៌មានរុស្ស៊ីរាយការណ៍ថា ក្រោយកើតហេតុការណ៍គួរឱ្យតក់ស្លុតនេះ ខាងអាងត្រីបានបង្ខំឱ្យនារីឈ្មោះ ម៉ាឆា មកសម្តែងជានាងមច្ឆាបន្តទៀត ទោះជានាងមានរបួសនៅត្រង់ក ក្តី ។ នាងបានទទួលប្រាក់សំណងត្រឹមតែ៩៩ដុល្លារអាមេរិកប៉ុណ្ណោះ ហើយពួកគេហាមនាងមិនឱ្យនិយាយរឿងនេះ ។ ដូច្នេះ វាធ្វើឱ្យមហាជនរិះគន់អ្នកគ្រប់គ្រងអាងត្រីថា ព្យាយាមលាក់បាំងព័ត៌មាន ថែមទាំងគ្មានវិធានការគ្រប់គ្រាន់សម្រាប់ការពារសុវត្ថិភាពបុគ្គលិក ។

គួរបញ្ជាក់ថា អាងត្រីនេះមានចិញ្ចឹមសត្វជាច្រើនប្រភេទដែលយកពីទន្លេមេគង្គ និងទន្លេយ៉ែងស៊ី ព្រមទាំងសត្វកម្រមួយចំនួនទៀត ។ រីឯត្រីយក្សដែលខាំក្បាលនាងមច្ឆានេះ គេពុំដឹងថា វាជាពូជត្រីអ្វីទេ ៕

សារព័ត៌មាន BBC បានរាយការណ៍កាលពីថ្ងៃទី២ ខែកុម្ភៈ ឆ្នាំ២០២៥ ថា ប្រធានាធិបតីអាមេរិក លោក Donald Trump បានដំឡើងពន្ធទំនិញនាំចូលពីចិន កាណាដា និងម៉ិកស៊ិក ដោយសារប្រទេសទាំង៣នេះ គឺជាគូប្រជែងដ៏ធំបំផុតរបស់អាមេរិក ។ លោកបញ្ជាក់ថា អាមេរិកនឹងដំឡើងពន្ធទំនិញកាណាដា និងម៉ិកស៊ិក ស្មើ២៥% ចាប់ពីថ្ងៃទី៤ ខែកុម្ភៈ ។ រីឯពន្ធនាំចូលថាមពលពីកាណាដា និងទំនិញចិន គឺអាមេរិកនឹងដំឡើង១០% ។

លោក Trump បានសរសេរក្នុងបណ្តាញសង្គម Truth Social ថា ៖ «យើងធ្វើបែបនេះ ដោយសារការគំរាមកំហែងយ៉ាងធ្ងន់ធ្ងរពីជនអន្តោប្រវេសន៍ខុសច្បាប់ និងផលប៉ះពាល់ដោយសារថ្នាំញៀនដែលបំផ្លាញជីវិតពលរដ្ឋអាមេរិក» ។ រីឯមន្ត្រីសេតវិមានអាមេរិកបានបង្ហោះសារក្នុងបណ្តាញសង្គម X ថា ៖ «ការដំឡើងពន្ធនេះមានភាពចាំបាច់ ដើម្បីឱ្យចិន កាណាដា និងម៉ិកស៊ិក ទទួលខុសត្រូវចំពោះការប្តេជ្ញាចិត្តទប់ស្កាត់ការហូរចូលថ្នាំញៀនមកអាមេរិក» ។

ក្រោយពីប្រធានាធិបតីអាមេរិកប្រកាសដំឡើងពន្ធទំនិញ មេដឹកនាំប្រទេសកាណាដា និងម៉ិកស៊ិកលើកឡើងថា ពួកគេនឹងដំឡើងពន្ធទំនិញនាំចូលពីអាមេរិកដូចគ្នា ដើម្បីឆ្លើយតបនឹងគោលនយោបាយដំឡើងពន្ធរបស់លោក Trump ។

ប្រធានាធិបតីម៉ិកស៊ិក លោកស្រី Claudia Sheinbaum បានឆ្លើយតបនឹងការលើកឡើងរបស់មន្ត្រីសេតវិមានអាមេរិកថា រដ្ឋាភិបាលម៉ិកស៊ិកមានទំនាក់ទំនងជាមួយក្រុមជួញដូរថ្នាំញៀន លោកស្រីប្រាប់ថា វាជាការចោទប្រកាន់លើម៉ិកស៊ិក ។ លោកស្រីបានអំពាវនាវឱ្យអាមេរិកចាត់វិធានការបន្ថែមទៀតដើម្បីបង្ក្រាបការរត់ពន្ធអាវុធបញ្ជូនទៅឱ្យក្រុមជួញដូរថ្នាំញៀននៅម៉ិកស៊ិក ហើយលោកស្រីរីករាយសហការជាមួយអាមេរិក ពីព្រោះបញ្ហាពុំអាចដោះស្រាយដោយការដំឡើងពន្ធទេ ប៉ុន្តែដោះស្រាយដោយការពិភាក្សាគ្នា ។ ម៉ិកស៊ិកនឹងដំឡើងពន្ធទំនិញអាមេរិកវិញ ប៉ុន្តែលោកស្រីពុំបានបញ្ជាក់ព័ត៌មានលម្អិតទេ ។

ដូចគ្នានេះ ក្រោយពីលោក Trump ប្រកាសដំឡើងពន្ធទំនិញមិនប៉ុន្មានម៉ោង បានធ្វើឱ្យមេដឹកនាំកាណាដាសម្រេចចិត្តដំឡើងពន្ធទំនិញអាមេរិកវិញ ក្នុងជំហ៊ានដំបូង ស្មើ២៥% រួមមាន ៖ ភេសជ្ជៈ, គ្រឿងសម្អាង និងក្រដាស ចាប់ពីថ្ងៃទី៤ ខែកុម្ភៈ ដូចគ្នា ។ ជំហ៊ានបន្ទាប់ កាណាដានឹងដំឡើងពន្ធទំនិញអាមេរិកថែមទៀត រួមមាន ៖ រថយន្តតូច, រថយន្តដឹកទំនិញ, ដែក និងអាលុយមីញ៉ូម, ផ្លែឈើ និងបន្លែមួយចំនួន, សាច់គោ, សាច់ជ្រូក, ទឹកដោះគោ និងឧបករណ៍អវកាស ។

នាយករដ្ឋមន្ត្រីកាណាដា លោក Justin Trudeau ថ្លែងថា ៖ «យើងមិនចង់ធ្វើបែបនេះទេ ប៉ុន្តែយើងនឹងពុំព្រមដកថយឡើយដើម្បីការពារពលរដ្ឋកាណាដា ។ រដ្ឋាភិបាលកាណាដានឹងដំឡើងពន្ធទំនិញអាមេរិក ស្មើ២៥% ចាប់ពីថ្ងៃទី៤ ខែកុម្ភៈ ហើយកាណាដានឹងដំឡើងពន្ធទំនិញអាមេរិកថែមទៀតក្នុងរយៈពេល២១ថ្ងៃខាងមុខ» ៕

សហរដ្ឋអាមេរិក ៖ បច្ចេកវិទ្យា AI បានក្លាយជាប្រធានបទគួរឱ្យចាប់អារម្មណ៍សម្រាប់បច្ចេកវិទ្យាលើពិភពលោកក្នុងរយៈពេលជាច្រើនឆ្នាំមកនេះ ជាពិសេស ការប្រកួតប្រជែងផ្នែក Generative AI ក្នុងនោះកម្មវិធី ChatGPT ដ៏ល្បីរបស់ក្រុមហ៊ុន OpenAI ទទួលបានការដោនឡូតច្រើនបំផុតក្នុង App Store អាមេរិក ។ ប៉ុន្តែនាពេលថ្មីៗនេះ កម្មវិធី DeepSeek របស់ចិនមានចំនួនដោនឡូតច្រើនបំផុតនៅអាមេរិក និងវ៉ាដាច់ ChatGPT រហូតដល់មានសំណួរ និងការវិភាគពីអនាគត AI ។

ក្រុមហ៊ុន DeepSeek បានបង្កើតកម្មវិធី DeepSeek R1 ដែលជាគំរូបច្ចេកវិទ្យា AI ថ្មីមានសមត្ថភាពប្រហាក់ប្រហែលនឹងគូប្រជែងជាច្រើន ដូចជា ៖ កម្មវិធី GPT-4 របស់ OpenAI, កម្មវិធី Llama របស់ Meta និងកម្មវិធី Gemini របស់ Google ប៉ុន្តែការចំណាយសម្រាប់ប្រើប្រាស់កម្មវិធី DeepSeek គឺថោកជាងគូប្រជែងយ៉ាងខ្លាំង ។

ក្រុមហ៊ុនបច្ចេកវិទ្យាចិនបានចំណាយប្រាក់វិនិយោគប្រមាណតែ៥លាន៦សែនដុល្លារអាមេរិកប៉ុណ្ណោះដើម្បីបង្កើតគំរូបច្ចេកវិទ្យា AI ខណៈក្រុមហ៊ុនបច្ចេកវិទ្យានៅអាមេរិកបានចំណាយប្រាក់ច្រើនជាងនេះ ។ លើសពីនេះ អាមេរិកបានព្យាយាមកំណត់ការនាំចេញបន្ទះឈីប AI កម្រិតខ្ពស់ទៅប្រទេសចិនអស់រយៈពេលជាច្រើនឆ្នាំ ប៉ុន្តែក្រុមហ៊ុន DeepSeek នៅតែទទួលបានជោគជ័យក្នុងការបង្កើតម៉ូឌែលតម្លៃទាបសម្រាប់បន្ទះឈីប AI ។

លោក Liang Wenfeng សហស្ថាបិកក្រុមហ៊ុន High-Flyer បានបង្កើតក្រុមហ៊ុន DeepSeek កាលពីឆ្នាំ២០២៣ ហើយបច្ចុប្បន្ន ក្រុមហ៊ុនផ្តោតលើការបង្កើតគំរូភាសាធំ Large Language Models (LLM) ឬម៉ូឌែលសម្រាប់បង្ហាត់ AI និងការបង្កើត Artificial General Intelligence (AGI) ដែលមានប្រាជ្ញាស្មើ ឬខ្ពស់ជាងមនុស្ស ។

អ្នកប្រើប្រាស់បាននិយាយពីកម្មវិធី DeepSeek យ៉ាងច្រើននាពេលបច្ចុប្បន្ន ហើយចំនួនការដោនឡូតកម្មវិធី DeepSeek បានបង្ហាញពីការប្រកួតប្រជែងបច្ចេកវិទ្យា AI កម្រិតខ្ពស់ ដើម្បីក្លាយជាក្រុមហ៊ុននាំមុខក្នុងសម័យឌីជីថលលើពិភពលោក ។ កម្មវិធី DeepSeek របស់ចិនទទួលបានជោគជ័យយ៉ាងខ្លាំងកាន់តែធ្វើឱ្យអាមេរិកព្យាយាមរក្សាការមានប្រៀបផ្នែកបច្ចេកវិទ្យាលើសចិន ។

ការលេចឡើងនូវកម្មវិធីថ្មីនេះបង្ហាញថា បច្ចេកវិទ្យាបានរីកចម្រើនយ៉ាងឆាប់រហ័ស ហើយក្រុមហ៊ុននាំមុខផ្នែកបច្ចេកវិទ្យានឹងអាចបំពេញតម្រូវការអ្នកប្រើប្រាស់ដោយការចំណាយប្រាក់តិចជាង ៕