ខេត្តកែប៖ បុរសបរទេសម្នាក់បានជិះម៉ូតូយ៉ាងលឿន ជ្រុលចង្កូតធ្លាក់ចូលទៅក្នុងទឹកសមុទ្រ បណ្ដាលឲ្យរងរបួសធ្ងន់ បង្កឲ្យភ្ញាក់ផ្អើលដល់សមត្ថកិច្ចរត់ទៅជួយយកអាសា កាលពីវេលាម៉ោង៩ និង៤៥នាទីព្រឹក ថ្ងៃទី៣ ខែកក្កដា ឆ្នាំ២០១៨ នៅត្រង់ចំណុចពយព្រះរាជដំណាក់ ស្ថិតក្នុងភូមិថ្មី សង្កាត់ព្រៃធំ ក្រុងកែប។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញបុរសបរទេសម្នាក់បានជិះម៉ូតូ ម៉ាកអ៊ែរប្លែក ពណ៌ខ្មៅ ពាក់ស្លាកលេខ ភ្នំពេញ 1A-9436 យ៉ាងលឿន តាមបណ្ដោយផ្លូវ នៅតាមឆ្នេរសមុទ្រ។ លុះពេលគាត់ធ្វើដំណើរមកដល់ចំណុចខាងលើ មិនដឹងជាយ៉ាងម៉េច ស្រាប់តែម៉ូតូបានរេចង្កូតទៅបុកខឿនថ្ម ហើយផ្លោងអ្នកបើកចូលទៅក្នុងទឹកសមុទ្រ បណ្ដាលឲ្យរងរបួសធ្ងន់។ ឃើញហេតុការណ៍បែបនេះ អ្នកទេសចរ និងសមត្ថកិច្ចបានចុះទៅជួយជនរងគ្រោះ។
ក្រោយពេលកើតហេតុ សមត្ថកិច្ចបានទាក់ទងរថយន្តសង្រ្គោះបន្ទាន់ឲយមកដឹកជនរងគ្រោះ បញ្ជូនទៅសង្រ្គោះ នៅក្នុងមន្ទីរពេទ្យបង្អែកខេត្តកែប។ ប៉ុន្តែដោយសាររបួសរបស់ជនរងគ្រោះមានសភាពធ្ងន់ពេក ទើបបញ្ជូនទៅសង្គ្រោះបន្ត នៅក្នុងមន្ទីរពេទ្យបង្អែកខេត្តកំពត៕