ភ្នំពេញ៖ បុរសជាកម្មករលើកគ្រឿងសំណង់ ផឹកស្រាស្រវឹង វាយប្រពន្ធកូន រងរបួសធ្ងន់ម្តាយកូន ២នាក់ បង្កឱ្យមានការភ្ញាក់ផ្អើលកាលពីវេលាម៉ោង១០និង៣០នាទីយប់ ថ្ងៃទី ២៤ ខែមិថុនា ឆ្នាំ២០១៨ នៅផ្ទះជួល ភូមិ ព្រៃព្រីងខាងជើង សង្កាត់ចោមចៅ៣ ខណ្ឌពោធិ៍សែនជ័យ ។
ជនរងគ្រោះមានឈ្មោះ សោម សុភាព ភេទស្រី អាយុ ២៤ឆ្នាំ មុខរបរនៅផ្ទះ ស្នាក់នៅផ្ទះជួលភូមិព្រៃព្រីងខាងជើង១ សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើតនៅ ភូមិឡាំងកូ សង្កាត់ឫស្សីកែវ ខណ្ឌឫស្សីកែវ ។ ចំណែកជនបង្កជាប្តីឈ្មោះ ហូ ចែមផូ អាយុ២ ៦ឆ្នាំ មុខរបរកម្មករលើកគ្រឿងសំណង់ ស្នាក់នៅជាមួយប្រពន្ធ មានស្រុកកំណើតនៅខេត្តតាកែវ ។
តាមប្រភពព័ត៍មានពីនារីរងគ្រោះ បាននិយាយប្រាប់ថា នៅមុនពេលកើតហេតុប្តីរបស់គាត់ទើបមកពីផឹកស៊ីនៅផ្ទះមិត្តភក្តិ ពេលមកដល់ផ្ទះបានទៅផឹកស៊ីជាមួយអ្នកជិតខាងម្តងទៀត កាន់តែស្រវឹងខ្លាំង ។
លុះមកដល់ផ្ទះ បានបំផ្លិចបំផ្លាញរបស់របរនៅក្នុងផ្ទះ ដូចជាឆ្នាំងដាំបាយ ចាន ឆ្នាំង បានបោកកំទេចចោល ធ្វើឱ្យគាត់ជាប្រពន្ធខឹងប្តីរបស់ខ្លួនដែរ តែមិនហ៊ានដោយសារតែប្តីស្រវឹង ឱ្យប្តីចូលដេក ពេលចូលដេកបានបន្តិច បានចេញទៅក្រៅ ឈ្លោះជាមួយអ្នកក្បែរខាង ហើយបានឡើងមកម្តងទៀត ស្រាប់តែប្តីយកខ្សែភ្លើង ដែលបត់ជាច្រើន កំណាត់ទៅវាយប្រពន្ធ ដែលកំពុងដេក បណ្តាលឱ្យរងរបួសធ្ងន់ធ្ងរ សន្លប់នៅក្នុងបន្ទប់ជួល និងបណ្តាលឱ្យវាយចំកូនប្រុសអាយុ ៤ឆ្នាំ បែកក្បាលឈាមស្រោចពេញខ្លួន និង ២នាក់ទៀតរបួសស្រាល។
នារីរងគ្រោះបានបញ្ជាក់ប្រាប់ថា គ្រួសាររបស់នាងបានរៀបការដោយត្រឹម ត្រូវ បានរយៈពេលជាង ៨ឆ្នាំមកហើយ បានកូនចំនួន ៣នាក់ ស្រី២ប្រុសម្នាក់ កូនបងស្រី អាយុ ៨ឆ្នាំ និងកូនពៅអាយុ ៣ឆ្នាំ កូនបន្ទាប់ជាកូនប្រុសអាយុ ៤ឆ្នាំ ហើយប្តីនាងតែងធ្វើបាបរូបនាង រងរបួសធ្ងន់ ៣លើកមកហើយ តែមិនដែលប្តឹងសមត្ថកិច្ចឡើយ ទើបតែថ្ងៃនឹងទើបដាច់ចិត្តប្តឹង។
ក្រោយពេលកើតហេតុ ជនរងគ្រោះជាប្រពន្ធបានដាក់ពាក្យបណ្តឹង ឱ្យសមត្ថកិច្ចឃាត់ជនបង្កហេតុ មកសាកសួរនៅប៉ុស្តិ៍នគរបាលចោមចៅ៣ ដើម្បីចាត់ការតាមនីតិវិធី ៕
