ភ្នំពេញ៖ គូស្នេហ៍ស្រស់សោភាមួយគូ ជិះម៉ូតូមួយគឿង ក្នុងល្បឿនយ៉ាងលឿន ជ្រុលទៅបុកគូទរថយន្តមួយគ្រឿង បណ្តាលឱ្យរងការខូចខាត ដោយដោះស្រាយមិនត្រូវគ្នា ភាគីខាងបុរស បានជិះម៉ូតូរត់គេចខ្លួនបាត់ បន្សល់ទុកនារីជាសង្សារ ឱ្យសងសំណងជំនួស ដែលហេតុការណ៍នេះ កើតឡើងកាលពីវេលា ម៉ោង១០និង១០នាទីយប់ ថ្ងៃទី២០ ខែមិថុនា ឆ្នាំ២០១៨ ត្រង់ចំណុចស្តុបផ្សារដីហុយ តាមបណ្តោយផ្លូវ១៩៨៦ កែងនិងផ្លូវហាណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
ទាក់ទងជាមួយព័ត៌មាននេះដែរ មានអ្នកលេងហ្វេសប៊ុកជាច្រើន បានរិះគន់ទៅលើបុរសជាសង្សារ មិនគួរធ្វើយ៉ាងនេះ ចំពោះមិត្តស្រីរបស់ខ្លួន ដែលនាងជាស្រី ហើយពេលជួបបញ្ហាបែជារត់ចោលនាងបាត់ ។
បន្ទាប់ពីមានការិះគន់ ពេលនេះបុរសខាងលើ ដែលជាអ្នកបើកម៉ូតូបុកគូទរថយន្តគេ ហើយគេចខ្លួនចោលមិត្តស្រីនោះ បានចេញសារប្រតិកម្មយ៉ាងខ្លាំង ព្រមទាំងបានបកស្រាយផងដែរ ។ បុរសដែលប្រើប្រាស់គណនី ហ្វេសប៊ុកឈ្មោះ Soksan Kim រូបនេះបានសរសេរយ៉ាងដូច្នេះថា «តបសារម៉ាព្រឹក រឿងបុករត់ ទុកអូនចោល។ មើលមួយយប់ សើចនឹងចំណងជើងលោកអ្នកកាសែត។ បើចង់រត់ចោល រត់តាំងពីអ្នកកាសែតមិនទាន់មក មិនមែននៅចចារសំណងទេ។ ទទួលថាយើងចេញពីកន្លែងកើតហេតុ គឺព្រោះមិនចង់មានមុខ នៅក្នុងកាសែត តែនៅតែមាន ហើយខ្លាំងជាងមិននៅទៀត។
និយាយថាខ្ញុំខុសក៏បាន ដែលទៅបុកគេពីក្រោយ ហើយម្ចាស់រថយន្ត ចុះមកហើយទារអោយខ្ញុំសង ហើយខ្ញុំនិយាយសំរួលគ្នា ទៅម្ចាស់ឡានទារ 60$ ខ្ញុំក៏តអោយ 30$ តែមិនព្រម រហូតដល់ខ្ញុំ ព្រម 60$ ស្រាប់តែទារខ្ញុំ 100$ (នៅពេលអ្នកកាសែតមក) ឃើញអ៊ីចឹងខ្ញុំក៏ជិះចេញ ដោយអោយសង្សារខ្ញុំនៅទីនោះនិយាយ។ ដល់ពេលខ្ញុំមិននៅ ម្ចាស់ឡានបែរព្រមទទួលសំណង 50$ (មិនដឹងមានហេតុការណ៍អីបន្ទាប់ទេ)។ តែនិយាយក្នុង Tvfb ឡើងឡូយ បើគាត់នៅ និយាយ 40$ ក៏យកដែរ សើចមួយយប់។
បន្ទាប់ពីសងលុយគេហើយ ខ្ញុំជិះជូនគាត់ទៅផ្ទះវិញ ដោយមិនបានរត់ចោល។ ចប់ ចំនងជើងចាក់ដោតមែន សំខាន់ តែតែ ស្ករស្ករ សុទ្ធតែឯងថោក ខូច brand Ducati ម៉ូតូខ្ចីគេ សួរថា ជិះម៉ូតូនឹងម៉ែទិញអោយ ឬទិញខ្លួនឯង នុង? ជិះម៉ូតូ Ducati អស់ប៉ុន្មានគឿងហើយ ឬទើបតែសុំម៉ែបានជិះ? មុនថាអោយគេ មើលរក profile គេផងស្រួល tag អោយគេ» ។
សូមបញ្ជាក់ថា តាមប្រភពព័ត៌មានពីកន្លែង កើតហេតុបានឱ្យដឹងថា នៅមុនពេលកើតហេតុ គេឃើញបុរសម្នាក់ បើករថយន្តមួយគ្រឿងម៉ាក ហាយឡែនឌ័រ ពណ៌ស្ករ ពាក់ស្លាកលេខ ភ្នំពេញ 2V-6084 ធ្វើដំណើរតាមបណ្តោយផ្លូវ១៩៨៦ ក្នុងទិសដៅពីកើតទៅលិច។
លុះមកដល់ចំណុចកើតហេតុ រថយន្តខាងលើបម្រុងបត់ឆ្វេង ទៅផ្លូវហាណូយ ខណៈពេលនោះស្រាប់តែ មានម៉ូតូមួយគ្រឿងទៀតម៉ាក ឌូគកាទីក ពណ៌ក្រហម គ្មានស្លាកលេខ ជិះ២នាក់សង្សារ បើកមកពីក្រោយរថយន្ត ក្នុងល្បឿនយ៉ាងលឿន រួចក៏ជ្រុលទៅបុកគូទរថយន្តខាងលើ ចំពីក្រោយចំហៀង ខាងឆ្វេងពេញទំហឹង បណ្តាលឱ្យក្រពឹតកាង និងបែកស្តុប តែមិនបង្កឱ្យមានអ្នករងរបួសនោះទេ។
បន្ទាប់មកភាគីទាំងពីរ បានចរចាគ្នា ដោយភាគីខាងរថយន្ត បានទាមទារសំណងចំនួន ១០០ដុល្លារពីភាគីខាងម៉ូតូ តែភាគីខាងម៉ូតូ ព្រមសងតែ៥០ដុល្លារនោះទេ។ ធ្វើឱ្យការដោះស្រាយមិនត្រូវគ្នា មួយសន្ទុះក្រោយមក បុរសដែលជាអ្នកបើកបរម៉ូតូ បានសុំសងសំណងទៅ ភាគីខាងរថយន្តចំនួន៦០ដុល្លារ ដើម្បីបញ្ចប់រឿង ភាគីខាងរថយន្តមិនព្រមទទួលយក ក្នុងតម្លៃ៦០ដុល្លារនោះទេ។ ភ្លាមនោះបុរស ជាអ្នកបើកម៉ូតូ បានជិះម៉ូតូរត់គេចខ្លួន បាត់ស្រមោល បន្សល់ទុកនារីម្នាក់ ដែលជាសង្សារនៅនិងកន្លែងកើតហេតុ។
ក្រោយពេលកើតហេតុ នារីដែលជាសង្សារនិងបុរសជាអ្នកបើកម៉ូតូខាងលើ បម្រុងនិងជិះម៉ូតូឌុប ចេញពីកន្លែងកើតហេតុ ត្រូវបានអ្នកបើករថយន្ត ឃាត់មិនឱ្យទៅ ក៏បង្កឱ្យមានការឈ្លោះប្រកែកគ្នា តឹងសរសៃ.ក។ បន្តិចក្រោយមក នារីរងគ្រោះ បានព្រមចេញសំណងចំនួន ៥០ដុល្លារ ឱ្យទៅភាគីខាងរថយន្ត ហើយភាគីខាងរថយន្ត មិនចង់មានរឿងវែងឆ្ងាយ ក៏ព្រមទទួលយកដើម្បីបញ្ចប់រឿង នៅនិងកន្លែងកើតហេតុ៕
