ក្រុងព្រះសីហនុ៖ គេបានសង្កេតឃើញថា ករណីគ្រោះថ្នាក់ចរាចរណ៍ នៅលើកំណាត់ផ្លូវក្រុងព្រះសីហនុ មានការកើនឡើងគួរឲ្យកត់សម្គាល់ ដោយភាគច្រើនជាករណីគ្រោះថ្នាក់ធំៗ ដែលបណ្តាលឲ្យ បាត់បង់ជីវិតមនុស្សជាច្រើននាក់ ហើយមូលហេតុភាគច្រើន នៃគ្រោះថ្នាក់ទាំងនោះ គឺបណ្តាលមកពីការជែងគ្នា ហើយជាពិសេសគឺរថយន្តកុងទីន័រច្រើន ឆ្លងកាត់លើផ្លូវនោះ ហើយផ្លូវក៏តូចចង្អៀតផងដែរ ។
ជាក់ស្តែងក្នុង១ថ្ងៃនេះ មានករណីគ្រោះថ្នាក់ដល់ទៅ២លើក ដោយកាលពីព្រឹកមិញ គឺគ្រោះថ្នាក់បានកើតឡើង លើសម្តេចក្រុមព្រះ និងអ្នកម្នាង អ៊ុក ផល្លា បណ្តាលឲ្យអ្នកម្នាង បានបាត់បង់ជីវិត ចំណែកសម្តេចក្រុមព្រះ បានរងរបួសធ្ងន់។ ស្រាប់តែមិនទាន់ទាំងបានប៉ុន្មានម៉ោងផង នៅម៉ោងប្រមាណជា៤ល្ងាច ថ្ងៃដដែលនេះ ស្រាប់តែមានគ្រោះថ្នាក់មួយទៀត បានកើតឡើង នៅជិតការិយាល័យ កាំកុងត្រូលសាខាខេត្តព្រះសីហនុ ។
គ្រោះថ្នាក់ខាងលើនេះ ត្រូវបានរាយការណ៍ជាបឋមថា ស្ត្រី២នាក់ជិះម៉ូតូស្លាកលេខ ព្រះសីហនុ 1H 4814 បានជ្រុលទៅបុកពីក្រោយរថយន្ត ម៉ាកធុនដ្រាមួយគ្រឿង ពាក់ស្លាកលេខភ្នំពេញ 2X 0678 បណ្តាលឲ្យភាគីខាងម៉ូតូឌួល រួចក៏មានរថយន្ត ម៉ាក CRV មួយគ្រឿងទៀត បើកបរដោយស្ត្រីជនជាតិចិន មកពីក្រោយបានជ្រុលទៅប៉ះ ស្ត្រីភាគីខាងជិះម៉ូតូ១តង់ទៀត បណ្តាលឲ្យរងរបួស តែនៅមិនទាន់ដឹងថា របួសធ្ងន់ឬក៏ស្រាលនៅឡើយនោះទេ ហើយភ្លាមៗសមត្ថកិច្ចក៏បាន ជួយអន្តរាគមន៍នាំអ្នករបួស ទៅកាន់មន្ទីរពេទ្យផងដែរ ៕
