ប្រទេសរុស្ស៊ី៖ នៅក្នុងអំឡុងពេលប្រទេសរុស្ស៊ី បានទទួលធ្វើជាម្ចាស់ផ្ទះ រៀបចំការប្រកួតកីឡាបាល់ទាត់ ពិភពលោកនោះ លោកស្រី Tamara Pletnyova សមាជិកាសភាជាន់ខ្ពស់ និងជាសមាជិកបក្សកុម្មុយនីស្ដ នៃសហព័ន្ធន៍រុស្ស៊ី បានអំពាវនាវដល់ស្ត្រី នៅក្នុងប្រទេសរុស្ស៊ី កុំរួមរ័ក្សជាមួយជនបរទេសឱ្យសោះ ពីព្រោះជនជាតិរបស់យើង ជាអ្នករងទុក្ខវេទនា។
សមាជិកសភាជាន់ខ្ពស់ខាងលើនេះ បានថ្លែងតាមវិទ្យុ Govorit Moskva របស់រុុស្ស៊ីថា នៅក្នុងអំឡុងពេលព្រឹត្តិការណ៍ ដ៏កក្រើកពិភពលោក ស្រ្ដីរុស្ស៊ីមួយចំនួនអាចនឹង បង្កាត់ភ្លើងស្នេហ៍ជាមួយបុរសបរទេស រហូតមានផ្ទៃពោះ។ រឿងរ៉ាវនេះប្រហែលជាអាចកើតឡើង ឬអត់ គឺអាស្រ័យទៅលើសាមីខ្លួនតែប៉ុណ្ណោះ។ ប្រសិនបើកើតមាន នូវករណីរួមភេទជាមួយនឹងជនបរទេស រហូតមានផ្ទៃពោះ នៅក្នុងអំឡុងពេលប្រកួត បាត់ទាត់ពិភពលោក ដ៏កក្រើកនេះ គឺអ្នកដែលរងទុក្ខ និងវេទនា គឺស្រ្ដីជាម្ដាយ និងកូនរបស់នាង។
សមាជិកសភាពរូបនេះ បានបន្តថា ករណីនេះធ្លាប់មានរួចមកហើយ គឺស្ត្រីរុស្ស៊ីបានរៀបការជាមួយនឹងជនបរទេស ប៉ុន្តែក្រោយពីផ្តល់កំណើត ឲ្យកូនរួចហើយ ពួកគេមិនអាច ទៅរស់នៅឯបរទេសបាន។ ក្រោយមកពួកគេបានមកស្រែកយំ នៅមុខទីស្នាក់ការរបស់លោកស្រី និងហើយខ្លះក៏បាន យកកូនក្នុងផ្ទៃចេញ។
លោកស្រី Pletnyova បានបន្តថា «យើងគួរតែសាងស្នេហ៍ជាមួយបុរសរុស្ស៊ី ដែលជាជាតិសាសន៍របស់យើងវិញ ទើបល្អ។ ការនិយាយបែបនេះ មិនមែនខ្ញុំជាអ្នកជាតិនិយម ជ្រុលហួសហេតុពេកទេ។ ប៉ុន្តែអ្វីដែលខ្ញុំនិយាយនោះ គឺចង់ឲ្យនារីជនជាតិរុស្ស៊ី អាចស្វែងរកបុរសរុស្ស៊ីដែលជឿថា ពួកនាងអាចសាងគ្រួសារមួយដ៏ល្អ និងរស់នៅប្រកបដោយសុខដុមរមនា មានកូនចៅ និងចិញ្ចឹមគ្រួសារបានល្អប្រសើរ ជាជាងការយកខ្សែជីវិត ទៅប្រថុយប្រថាន ជាមួយជនបរទេស»៕