ភ្នំពេញ៖ រោងបុណ្យខួបគំរប់ ៧ថ្ងៃមួយល្វែងសង់នៅលើផ្លូវ ត្រូវរថយន្តកុងតឺន័រមួយគ្រឿងមានអ្នកបើកបររៀងងងុយដេក គួបផ្សំនិងផ្លូវកោងបន្តិច ហើយចាំងភ្នែកហ្វាររថយន្តពីខាងមុខ ធ្វើឱ្យអ្នកបើកបរបុកចូលក្នុងរោងបុណ្យ បណ្តាលឱ្យបាក់រោង តែសំណាងល្អមិនបង្កឱ្យអ្នកណាម្នាក់រងរបួសឡើយ ដែលហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង ០១ នឹង១៥នាទី រំលងអាធ្រាត្រឈានចូលថ្ងៃទី៦ ខែមិថុនា នៅចំនុចផ្ទះលេខ៤០៤ ផ្លូវ៣៧១ ផ្ទះលក់ស៊ីទែនទឹក យីហោ ហ្វុក ហេង ស្ថិតនៅសង្កាត់បឹងទំពុន២ ខណ្ឌមានជ័យ។
ប្រភពព័ត៌មានពីកន្លែងកើតហេតុបានប្រាប់ឱ្យដឹងថា រោងបុណ្យគំរប់៧ថ្ងៃបានសាងសង់នៅតាមផ្លូវ៣៧១ ហើយម្ចាស់បុណ្យធ្វើឡើងដើម្បីឧទ្ទិសកុសលជូនដល់ភរិយារបស់គាត់ ដោយរោងនេះសាងសង់តាំងពីព្រឹកថ្ងៃទី៥ ខែមិថុនា ពេលល្ងាចទើបមានកម្មវីធីទទួលភ្ញៀវ ញាតិមិត្តជិតឆ្ងាយដែលបានមកចូលរួមរំលែកទុក្ខ និងមានកម្មវិធីវិធីសូត្រមន្ត តាមប្រពៃណី ចប់សព្វគ្រប់ហើយ ខាងក្រុមចុងភៅ ក៏បានរើ និងសារទុករបស់របរនៅក្នុងរោងរួចរាល់ ហើយក្រុមចុងភៅក៏បានសម្រាកនៅមុខផ្ទះក្បែររោងនោះដែរ ដោយម្ចាស់ដើមបុណ្យបានបើកភ្លើងបំភ្លឺនៅមុខរោង និងមានដាក់ធុងសាំងនៅចម្ងាយពីមុខរោងជាង ២០ម៉ែត្រ ដើម្បីជាសញ្ញាសម្គាល់ ។ លុះមកដល់ម៉ោងកើតហេតុ ស្រាប់តែមានរថយន្តកុងតឺន័រ ធន់ធំមួយគ្រឿង បើកចូលទៅដល់ក្នុងរោងដើម្បីចូលរួមរំលែកទុក្ខតែម្តង។
ប្រភពពីអ្នកបើករថយន្តមាន ឈ្មោះ សែន វិរៈបុត្រ ភេទ ប្រុស អាយុ២៥ ឆ្នាំ មុខរបរបើកបររថយន្ត ស្នាក់នៅភូមិកៀនស្វាយ ឃុំបន្ទាយដែក ស្រុកកៀនស្វាយ ខេត្តកណ្ដាល បានប្រាប់ឱ្យ ដឹងថា មុនកើតហេតុ រូបគាត់បានបើករថយន្ត បង្កខាងលើជាប្រភេទរថយន្តកុងតឺន័រពណ៌ក្រហម ពាក់ស្លាកលេខ ភ្នំពេញ 3D-9332 ក្នុងទូរកុងតឺន័រ ដឹកស្រូវសាឡី ដឹកមកពីកំពង់ផែស្វយ័ត ភ្នំពេញ គោលបំណងយកទៅទម្លាក់នៅក្រុមហ៊ុនស្រាបៀរកម្ពុជា នៅសង្កាត់ជើងឯក ខណ្ឌដង្កោ ។
ពេលធ្វើដំណើរមកដល់កន្លែងកើតហេតុ ជាចំនុចផ្លូវកោងហើយមានរថយន្តផ្សេងទៀតធ្វើដំណើរមកបញ្ច្រាសទិសគ្នាទៀត ចាំងភ្នែកនឹងភ្លើងរថយន្តនោះ ណាមួយរៀងងងុយដេកផង មើលមិនច្បាស់ ក៏វ៉ាក់អើជាមួយរោងបុណ្យ ។ ភ្លាមៗជាន់ហ្វ្រាំងមិនជាប់ ទើបជ្រុលបុកចូលក្នុងរោងបុណ្យ បណ្តាលឱ្យបាក់រោង តែមិនមានអ្នករងរបួសទេ គ្រាន់តែខូចខាតរោងបុណ្យ និង របស់របរនៅក្នុងរោងតែប៉ុណ្ណោះ។
ក្រោយពេលកើតហេតុ ម្ចាស់រថយន្ត និងខាងក្រុមចុងភៅ ព្រមទាំងម្ចាស់ផ្តើមបុណ្យ បានចចារគ្នា ដោយខាងរថយន្តបានទូរស័ព្ទហៅតំណាងខ្លួនមកដោះស្រាយ ជាមួយម្ចាស់ផ្តើមបុណ្យ និងក្រុមចុងភៅ ដើម្បីសងសំណង ទៅតាមទំហំនៃការខូចខាតបញ្ចប់រឿងនៅកន្លែង កើតហេតុតែម្តង ៕