រដ្ឋធានីព្យុងយ៉ាង៖ យោងតាមបណ្ដាញផ្សព្វផ្សាយរបស់បរទេស បានរាយការណ៍ នៅថ្ងៃទី២៣ ខែឧសភា ឆ្នាំ២០១៨នេះថា បន្ទាប់ពីលោកប្រធានាធិបតីសហរដ្ឋអាមេរិកបានជួបចរចាគ្នាជាមួយនឹងសមភាគីកូរ៉េខាងត្បូងរបស់លោក នៅតែមានការសង័្សយពីកម្មវិធីនុយក្លេអ៊ែររបស់កូរ៉េខាងជើងនោះមក នៅពេលនេះ មេដឹកនាំកូរ៉េខាងជើងបានសម្រេចនឹងរំលោយទីតាំងសាកល្បងនុយក្លេអ៊ែររបស់ខ្លួន ដែលនេះ គឺជាការបង្ហាញនូវកាយវិការសុច្ឆន្ទៈមួយ មុនការជួបគ្នាកំពូលជាប្រវត្តិសាស្ត្រមួយ នៅថ្ងៃទី១២ ខែមិថុនា ឆ្នាំ២០១៨ នៅក្នុងប្រទេសសិង្ហបុី។
កូរ៉េខាងជើងធ្លាប់ប្រកាស កាលពីខែមុនថា ប្រទេសរបស់ខ្លួននឹងកម្ទេចចោលទីតាំងសាកល្បងអាវុធមហាប្រល័យលោក (នុយក្លេអ៊ែរ PUNGGYE RI )ចោល ដោយដាក់គ្រឿងផ្ទុះកម្ទេចរូងក្រោមដីទាំងឡាយដែលជាច្រកចូល។ ការប្រកាសនេះបានធ្វើឲ្យរដ្ឋាភិបាលទីិក្រុងវ៉ាស៊ីនតោន និងក្រុងសេអ៊ូល បានសម្ដែងនូវការស្វាគមន៍យ៉ាងខ្លាំង។ ទីតាំងនោះ គឺរដ្ឋាភិបាលទីក្រុងព្យុងយ៉ាង ធ្លាប់សាកល្បងអាវុធនុយក្លេអ៊ែរចំនួន៦លើករួចហើយ ដោយគឺលើកទី៦ បានធ្វើឡើង កាលពីខែកញ្ញា ឆ្នាំ២០១៧ ដែលមានកម្លាំងខ្លាំង ជាគ្រាប់បែកអ៊ីដ្រូហ្សែន។
យោងតាមសារព័ត៌មានCNN បានឲ្យដឹងថា ការកម្ទេចទីតាំងសាកល្បងអាវុធនុយក្លេអ៊ែរ អាចនឹងធ្វើឡើង រវាងថ្ងៃទី២៣ ទៅថ្ងៃទី២៥ ឧសភា ដោយយោងទៅតាមស្ថានភាពឧតុនិយម។ រីឯកូរ៉េខាងជើងបានចាត់ទុកការកម្ទេចចោលទីតាំងនេះថា ជាកាយវិការសុច្ឆន្ទៈមួយ មុនការជំនួបគ្នាកំពូលជាប្រវត្តិសាស្ត្ ររវាងលោក ដូណាល់ ត្រាំ ប្រធានាធិបតីអាមេរិក និងមេដឹកនាំរបស់ខ្លួន លោក គីម ជុងអ៊ុន។
មន្ត្រីក្រសួងបង្រួបបង្រួមកូរ៉េខាងត្បូង បានប្រកាស នាថ្ងៃទី២៣ ខែឧសភា នេះថា កូរ៉េខាងជើង បានព្រមឲ្យបណ្ដាអ្នកកាសែតកូរ៉េខាងត្បូងចូលទៅយកព័ត៌មានពីការកម្ទេចចោលទីតាំងសាកល្បងនុយក្លេអ៊ែររបស់ខ្លួនហើយ។ នៅក្នុងសេចក្ដីប្រកាសនោះ មន្រ្ដីក្រសួងបង្រួបបង្រួមកូរ៉េខាងត្បូង បានបញ្ជាក់ថា បញ្ជីឈ្មោះអ្នកកាសែតកូរ៉េខាងត្បូងមានចំនួន៨នាក់ ដែលបម្រើការងារឲ្យអង្គភាពសារព័ត៌មាន២ ត្រូវបានបញ្ជូនទៅកាន់រដ្ឋធានីព្យុងយ៉ាង ហើយអាជ្ញាធររបស់កូរ៉េខាងជើងបានយល់ព្រមទទួលពួកគេរួចរាល់ហើយ។ ដោយឡែកអ្នកកាសែតរបស់អង្គភាពសារព័ត៌មាន នៃប្រទេសផ្សេងៗ បានទៅដល់កូរ៉េខាងជើង កាលពីថ្ងៃទី២២ ខែឧសភាម្សិលមិញនេះ។
លោក Donald Trump ប្រធានាធិបតីអាមេរិក បានជួបជាមួយនឹងប្រធានាធិបតីកូរ៉េខាងត្បូង កាលពីម្សិលមិញថា ការជំនួបកំពូល រវាងប្រធានាធិបតីសហរដ្ឋអាមេរិក និងលោក គឹម ជុងអ៊ុន មេដឹកនាំកូរ៉េខាងជើង នៅថ្ងៃទី១២ ខែមិថុនា ឆ្នាំ២០១៨ នៅក្នងប្រទេសសិង្ហបុរី អាច ឬមិនអាចកើតឡើង គឺអាស្រ័យទៅលើឥរិយាបថរបស់មេដឹកកូរ៉េខាងជើង។
អ្នកនាំពាក្យរដ្ឋាភិបាលកូរ៉េខាងត្បូង បានឲ្យដឹងថា បន្ទាប់ពីមានការពិភាក្សាគ្នាកម្រិតខ្ពស់ រវាងរដ្ឋាភិបាលទីក្រុងព្យុងយ៉ាង និងក្រុងសេអ៊ូលរួចមក ជំនួបកំពូល រវាងប្រធានាធិបតីសហរដ្ឋអាមេរិក និងលោក គឹម ជុងអ៊ុន មេដឹកនាំកូរ៉េខាងជើង ប្រហែលជានឹងអាចធ្វើវិញ ក្រោយប្រទេសកូរ៉េខាងជើងបន្ទន់ឥរិយាបថ៕