ថៃ៖ កាលពីពេលថ្មីៗនេះ សមត្ថកិច្ចថៃបានចាប់ខ្លួនព្រះសង្ឃខ្មែរចំនួន ៤អង្គផ្សឹក រួចបញ្ជូនខ្លួនទៅឱ្យប៉ូលិសអន្ដោប្រវេសន៍ ដែលការចាប់ខ្លួននេះ បន្ទាប់ពីបានឃើញព្រះសង្ឃទាំង ៤អង្គខាងលើ និមន្តបិនបាត្រតាមផ្លូវ ។
ប្រភពបានឱ្យដឹងថា ក្រុមព្រះសង្ឃទាំង ៤អង្គខាងលើនេះ បានលាក់ខ្លួនក្នុងព្រៃតាមដងផ្លូវ ស្ថិតក្នុងស្រុកប៉វិន ខេត្តឈុនបុរី ប្រទេសថៃ ហើយទីបំផុតប៉ូលិសក៏តាមចាប់ខ្លួនបានព្រមទាំងបាននាំទៅផ្សឹកនៅវត្តមួយកន្លែងក្នុងខេត្ត ។ ក្រោយពីបានផ្សឹករួចអន្ទិតទាំង ៤បាននិយាយថា ពួកខ្លួនពិតជាបានចូលទៅក្នុងប្រទេសថៃខុសច្បាប់ពិតប្រាកដមែន ពុំមានសំបុត្រឆ្លងដែនឡើយ ដោយបានឆ្លងកាត់តាមច្រកឡែម ខេត្តចាន់ថាក់បុរី ។ ប្រភពដដែលបានបន្តថា ខណៈដែលនិមន្តបិនបាត្រនោះ គឺយប់ទីណាសម្រាកនៅទីនោះ ពុំមានកន្លែងស្លាក់អាស្រ័យស្រួលឡើយ ។
អន្ទិតទាំង ៤នាក់មានឈ្មោះ ១ នាង ផុន អាយុ ៤៥ឆ្នាំ ២ អ៊ុំ សៀង អាយុ ៦៦ឆ្នាំ (ទាំងពីរនាក់បានចូលមកដល់ប្រទេសថៃ ១ខែហើយ) ៣ រុង អាយុ ៣៥ឆ្នាំ និងទី ៤ រ៉ាត់ អាយុ ៣៦ឆ្នាំ (ទើបតែបានចូលមកប៉ុន្មានថ្ងៃប៉ុណ្ណោះ) ។
បច្ចុប្បន្នប៉ូលិសអន្តោប្រវេសន៍បានសម្រេចឃុំខ្លួនជនទាំង ៤នាក់ខាងលើបណ្ដោះអាសន្ននៅក្នុងមន្ទីរឃុំឃាំងខេត្តឈុនបុរី រង់ចាំដោះស្រាយបន្តទៀត ទៅតាមនីតិវធីច្បាប់ ៕
សហការី KBN
ប្រភព៖ mthai
