ក្រុងបាងកក ប្រទេសថៃ៖ យោងតាមសារព័ត៌មាន ស៊ីនហួរ បានរាយការណ៍ថា ក្រុមអ្នកដឹកនាំ ចលនាប្រឆាំងរដ្ឋាភិបាលថៃ ដើម្បីទាមទារឲ្យមានការ បោះឆ្នោតសកលនៅចុងឆ្នាំ២០១៨នេះ ជាដាច់ខាតនោះ បានយល់ព្រមប្រគល់ខ្លួន ឲ្យប៉ូលិស ហើយការតវ៉ានៅក្នុងទីក្រុងបាងកក និងសាកលវិទ្យាល័យ ធម្មាសាតនោះ ក៏ត្រូវបានបញ្ចប់ផងដែរ នាល្ងាចថ្ងៃអង្គារ ទី២២ ខែឧសភា ឆ្នាំ២០១៨នេះ។
គួរកត់សំគាល់ផងដែរ លោក Rangsiman Rome មេដឹកនាំក្រុមប្រឆាំងតវ៉ាខាងលើនេះ ជាមួយនឹងសហមេដឹកនាំ ០២រូបទៀត បានសម្រេចចិត្តប្រគល់ខ្លួនទៅឲ្យប៉ូលិស ហើយនិងបានស្នើឲ្យ ប្រជាជនទាំងអស់ ត្រឡប់ទៅផ្ទះវិញផងដែរ។ ក្រុមបាតុករប្រឆាំងរដ្ឋាភិបាលថៃ បានប្រមូលផ្តុំគ្នា នៅទីក្រុងបាងកក កាលពីព្រឹកថ្ងៃអង្គារនេះ និងបានរៀបចំដង្ហែរក្បួន ចេញពីសាកលវិទ្យាល័យមួយកន្លែង ឆ្ពោះទៅកាន់វិមានរដ្ឋាភិបាលថៃ ហើយសម្តែងការទាមទារ ឲ្យរដ្ឋាភិបាលយោធារបស់លោក ប្រាយុទ្ធ ចាន់អូចា រៀបចំការបោះឆ្នោតសកល មិនឲ្យលើសពីខែវិច្ឆិកា ចុងឆ្នាំនេះឡើយ។
នាព្រឹកថ្ងៃអង្គារ កម្លាំងសមត្ថកិច្ចថៃ បានដាក់រនាំងហាមឃាត់ នៅតាមដងផ្លូវមួយចំនួន ក្បែរសាកលវិទ្យាល័យ ធម្មាសាត (Thammasat) និងធ្វើការត្រួតពិនិត្យផ្នែកសន្តិសុខ ដែលជាហេតុបណ្តាលឲ្យ ក្រុមអ្នកបាតុករត្អួញត្អែរថា ពួកគេកំពុងត្រូវបានហាមឃាត់ មិនឲ្យធ្វើការប្រមូលផ្តុំគ្នា។ បើតាមប៉ូលិសថៃក្រុមអ្នកតវ៉ាជាង ១០០នាក់ បានទៅជួបជុំគ្នានៅក្នុងសាកលវិទ្យាល័យ គិតត្រឹមព្រលឹមថ្ងៃអង្គារ ហើយមានអ្នកទៅដល់ទីនោះជាបន្តបន្ទាប់ទៀត។
គួរជម្រាបថា ទាក់ទងនឹងការបោះឆ្នោត ដើម្បីស្តារលទ្ធិប្រជាធិបតេយ្យឡើងវិញ នៅក្នុងប្រទេសថៃ រដ្ឋាភិបាលយោធារបស់ លោក ប្រាយុទ្ធ ចាន់អូចារ បានធ្វើការពន្យាពេល ជាច្រើនលើកច្រើនសា ដែលពីដំបូងឡើយនោះ គ្រោងនឹងប្រព្រឹត្តទៅ តាំងតែពីឆ្នាំ២០១៥ មកម្ល៉េះ ហើយកាលបរិច្ឆេទ កំណត់ចុងក្រោយគេបំផុតនោះ គឺនៅខែកុម្ភៈ ឆ្នាំ២០១៩។ ទោះជាបែបនេះក្តី មនុស្សភាគច្រើន មានការភ័យព្រួយថា វានឹងអាចលើកទៅពេលក្រោយ ជាថ្មីម្តងទៀត៕