អ៊ីរ៉ង់៖ កាលពីពេលថ្មីៗនេះ អ៊ីរ៉ង់បានព្រមានទៅកាន់ រដ្ឋមន្ត្រីការបរទេសអាមេរិកថា ប្រជាជនអ៊ីរ៉ង់ នឹងវាយរដ្ឋមន្ត្រីការបរទេសអាមេរិក លោក Mike Pompeo ឲ្យបែកកញ្ចប់មាត់តែម្តង ជាការឆ្លើយតបទៅនិងផែនការ របស់អាមេរិកថ្មី ដែលមានបំណងដាក់ទណ្ឌកម្ម មកលើប្រទេសអ៊ីរ៉ង់ ដោយធ្ងន់ធ្ងរបំផុតក្នុងប្រវត្តិសាស្ត្រប្រទេសនេះ ។ នេះបើយោងតាមសម្តី របស់មេបញ្ជាការជាន់ខ្ពស់ នៃឆ្មាំការពារបដិវត្តន៍មួយរូប ដកស្រង់ដោយភ្នាក់ងារសារព័ត៌មាន Reuters នារសៀលថ្ងៃអង្គារ ទី២២ ខែឧសភា នេះ ។
បើតាមសេចក្តីរាយការណ៍ បានថ្លែងថា មេបញ្ជាការរងឆ្មាំបដិវត្តន៍អ៊ីរ៉ង់ លោក អ៊ីស្មែល កូវសារី (Ismail Kowsari) បានគូសបញ្ជាក់យ៉ាងដូច្នេះថា «ប្រជាជនអ៊ីរ៉ង់ទាំងអស់ គួរតែរួបរួមគ្នាប្រឈមមុខនឹងបញ្ហានេះ ហើយពួកគេនឹងវាយឱ្យបែកកញ្ចប់មាត់ របស់រដ្ឋមន្ត្រីការបរទេសអាមេរិក និងអ្នកដែលគាំទ្ររូបលោក»។
គួរបញ្ជាក់ថា ប្រតិកម្មរបស់លោក Ismail Kowsari កើតមានឡើងបន្ទាប់ពី លោក Mike Pompeo បានស្នើឱ្យអ៊ីរ៉ង់ ផ្លាស់ប្ដូរគោលនយោបាយដឹកនាំប្រទេស និងនុយក្លេអ៊ែររបស់ខ្លួន ព្រមទាំងដោះលែង ជនជាតិអាមេរិកទាំងអស់, ដកទ័ពចេញពីស៊ីរីទាំងអស់, ឈប់គាំទ្រពួកឧទ្ទាម ហួទីនៅយ៉េមែន និងគម្រាមកំហែងអ៊ីស្រាអែល។ មិនតែប៉ុណ្ណោះ លោកក៏បានព្រមាន ដាក់ទណ្ឌកម្មធ្ងន់ធ្ងរបំផុត មិនធ្លាប់មានក្នុងប្រវត្តិសាស្ត្រ ប្រឆាំងនឹងទីក្រុងតេហេរ៉ង់ផងដែរ បើនៅតែមិនព្រមប្តូរឥរិយាបទដូចរាល់ថ្ងៃនេះចោល៕