ខេត្តកំពង់ធំ៖ បុរសវិកលចរិតម្នាក់បានដុតផ្ទះខ្លួនឯង ឆាបឆេះយ៉ាងសន្ធោសន្ធៅ បង្កឲ្យភ្ញាក់ផ្អើលដល់អ្នកភូមិរាយការណ៍ទៅសុំអន្តរាគមន៍ពីសមត្ថកិច្ច កាលពីវេលាម៉ោង៦ និង៣០នាទីព្រឹក ថ្ងៃចន្ទ ៧កើត ខែជេស្ឋ ឆ្នាំច សំរឹទិ្ធស័ក ព.ស២៥៦២ ត្រូវនឹងថ្ងៃទី២១ ខែ ឧសភា ឆ្នាំ២០១៨ នៅក្នុងភូមិត្រពាំងក្រោល ឃុំសាលាវិស័យ ស្រុកប្រាសាទបល្ល័ង្ក។
ប្រភពព័ត៌មាន បានឲ្យដឹងថា ម្ចាស់ផ្ទះជាមនុស្សវិកលចរិត ហើយគេតែងតែស្រែកឡូឡា និងវាយបំផ្លិចបំផ្លាញទ្រព្យសម្បត្តិ នៅក្នុងផ្ទះម្ដងៗ នៅពេលណាជំងឺរបស់គេធ្វើទុក្ខ។ លុះមកដល់វេលាខាងលើ ស្រាប់តែម្ចាស់ផ្ទះបានយកភ្លើងទៅដុតផ្ទះរបស់ខ្លួនឯង បង្កឲ្យភ្លើងឆាបឆេះយ៉ាងសន្ធោសន្ធៅឡើង ធ្វើឲ្យអ្នកភូមិផ្អើលឆោឡោឡើង រត់ទៅជួយពន្លត់ និងរាយការណ៍សុំអន្តរាគមន៍ពីសមត្ថកិច្ចជំនាញ។
លោកវរសនីយ៍ឯក ផល ធឿន អធិការនគរបាលស្រុកប្រាសាទបល្ល័ង្ក បានឲ្យដឹងថា ផ្ទះដែលរងនូវអគ្គិភ័យនោះ មានទំហំ៤ម៉ែត្រ គុណនឹង៥ម៉ែត្រ ធ្វើពីឈើប្រក់ស័ង្កសី ជញ្ជាំងក្ដារ មានម្ចាស់ឈ្មោះ ទិត ទី ភេទប្រុស អាយុ២៦ឆ្នាំ ជាមនុស្សវិកលចរិត រស់នៅក្នុងភូមិកើតហេតុខាងលើ។ ក្នុងការជួយអន្តរាគមន៍ពន្លត់អគ្គិភ័យនោះ សមត្ថកិច្ចបង្ការ ពន្លត់អគ្គិភ័យ និងសង្គ្រោះ នៃអធិការដ្ឋាននគរបាលស្រុកប្រាសាទបល្ល័ង្ក បានប្រើប្រាស់រថយន្តពន្លត់អគ្គិភ័យមួយគ្រឿង ដោយបាញ់ទឹកអស់ចំនួន៣រថយន្ត ទើបរលត់អស់ទៅវិញ។ ប៉ុន្តែនៅក្នុងហេតុការណ៍នោះ មិនមានអ្នកណាម្នាក់រងរបួសនោះទេ គ្រាន់តែភ្លើងឆាបឆេះអស់សម្ភារ នៅក្នុងផ្ទះនោះតែប៉ុណ្ណោះ៕
