ខេត្តពោធិ៍សាត់៖ បុរសម្នាក់បានឡើងប្រក់ដំបូលផ្ទះ នៅជិតបង្គោលភ្លើងដែលមានតង់ស្យុងខ្លាំង ក៏ត្រូវចរន្តអគ្គិសនីឆក់ធ្លាក់មកលើដី បណ្ដាលឲ្យរងរបួសធ្ងន់ បង្កឲ្យភ្ញាក់ផ្អើលឡើង កាលពីវេលាម៉ោង៤ និង៤០នាទីល្ងាច ថ្ងៃទី២៦ ខែមេសា ឆ្នាំ២០១៨ នៅក្នុងភូមិដីក្រហម ឃុំអន្លង់រាប ស្រុកវាលវែង។
ប្រភពព័ត៌មាន បានឱ្យដឹងថា ជនរងគ្រោះ ឈ្មោះ វ៉ិត អាយុ៣២ឆ្នាំ មានមុខរបរធ្វើជាងផ្ទះ មានស្រុកកំណើតនៅភូមិគោខ្ពស់ ឃុំបុគ្គឋិន ស្រុកថ្មពួក ខេត្តឧត្តរមានជ័យ ប៉ុន្តែគាត់បានមកស្នាក់នៅក្នុងស្រុកវាលវែង ខេត្តពោធិ៍សាត់។ មុនពេលពេលកើតហេតុ ជនរងគ្រោះបានឡើងប្រក់ដំបូងផ្ទះ នៅជិតបង្គោលភ្លើង ដែលមានតង់ស្យុងខ្លាំង ហើយគាត់លើកសង័្កសីទៅប៉ះនឹងបង្គោលភ្លើង ក៏ឆ្លងចរន្តឆក់ធ្លាក់មកលើដី បណ្ដាលឲ្យរងរបួសធ្ងន់។
ក្រោយពេលកើតហេតុ ក្រុមគ្រួសារបានដឹកជនរងគ្រោះ បញ្ជូនទៅសង្រ្គោះ នៅក្នុងមន្ទីរពេទ្យ។ ករណីនេះ បើតាមសមត្ថកិច្ចមូលដ្ឋាន បានសន្និដ្ឋានថា មកពីជនរងគ្រោះធ្វើការងារ នៅជិតបង្គោលភ្លើង ទាំងខ្វះការប្រុងប្រយ័ត្ន៕