ខេត្តកណ្តាល៖ សមត្ថកិច្ចចម្រុះបានបើកប្រតិបត្តិការ ចុះត្រួតពិនិត្យសិប្បកម្មផលិតភេសជ្ជៈប៉ូវកម្លាំង B-Smart មួយកន្លែង កាលពីព្រឹក ថ្ងៃទី២០ ខែមេសា ឆ្នាំ២០១៨ នៅក្នុងឃុំស្វាយរលំ ស្រុកស្អាង។
មន្រ្ដីនគរបាលសេដ្ឋកិច្ច នៃក្រសួងមហាផ្ទៃ បានឲ្យដឹងថា ក្នុងប្រតិបត្តិការនេះធ្វើឡើង ក្រោមបញ្ជាផ្ទាល់ពីលោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច សមត្ថកិច្ចជំនាញសហការជាមួយវិទ្យាស្ថានស្តង់ដារកម្ពុជា មន្ទីរឧស្សាហកម្ម និងសិប្បកម្មខេត្ត និងនគរបាលសេដ្ឋកិច្ចខេត្តកណ្តាល និងក្រោមការសម្របសម្រួលនីតិវិធីពីលោកហេង ផេង ព្រះរាជអាជ្ញារង នៃអយ្យការអមសាលាដំបូងខេត្តកណ្តាល។
លោក ម៉ាត់ យូសុះ នាយការិយាល័យប្រឆាំងបទល្មើសកម្មសិទ្ធិបញ្ញា បានឲ្យដឹងថា ក្រោយចុះពិនិត្យជាក់ស្តែង សមត្ថកិច្ចចម្រុះបានរកឃើញថា នៅក្នុងរោងចក្រខាងលើបានផលិតភេសជ្ជៈជាច្រើនប្រភេទ រួមមាន B-Smart Grean Tea, Honey, Strawberry, Energy Drink, ប៉ៃតង, Energy Drink។ ផលិតផលទាំងនេះផលិតពុំអនុលោមត្រឹមត្រូវតាមការចុះបញ្ជីច.ប.ផ.នៅវិទ្យាស្ថានស្តង់ដារកម្ពុជានោះឡើយ ហើយទីតាំងផលិតពុំបានរៀបចំតាមបទដ្ឋានត្រឹមត្រូវ និងខ្វះអនាម័យថែមទៀតផង។ ប៉ុន្តែសមត្ថកិច្ចពុំបានបិទរោងចក្រនោះឡើយ គ្រាន់តែណែនាំឲ្យម្ចាស់សិប្បកម្ម ធ្វើឲ្យស្របតាមស្តង់ដារ និងអនាម័យតែប៉ុណ្ណោះ។
លោក ម៉ាត់ យូសុះ បានបន្ថែមថា យោងតាមការសម្របសម្រួលពីលោក ហេង ផេង ព្រះរាអាជ្ញារង នៃអយ្យការអមសាលាដំបូងខេត្តកណ្តាល បានតម្រូវឲ្យម្ចាស់រោងចក្រ កែតម្រូវឲ្យបានត្រឹមត្រូវ តាមបទដ្ឋានបច្ចេកទេស និងអនាម័យឲ្យត្រឹមត្រូវ ព្រមទាំងតម្រូវឲ្យម្ចាស់ទីតាំងដែលមានឈ្មោះ ងន សុគន្ធ ទៅបំភ្លឺនៅក្នុងនាយកដ្ឋាននគរបាលប្រឆាំងបទល្មើសសេដ្ឋកិច្ច ដើម្បីបន្តតាមនីតិវិធី៕