បរទេស៖ បន្ទាប់ពីរៀបមង្គលការរួចហើយ បុរសជនជាតិឥណ្ឌាម្នាក់មិនឃើញគ្រួសារខាងស្រី យកថ្លៃបណ្ដាការមកឲ្យគ្រួសាររបស់ខ្លួន ទើបគេប្រើល្បិចឃុបឃិតគ្នាជាមួយនឹងគ្រូពេទ្យជំនាញ លួចវះកាត់តម្រងនោមរបស់ប្រពន្ធខ្លួនលក់ ហើយត្រូវសមត្ថកិច្ចឃាត់ខ្លួន។
បើតាមគេហទំព័រ Elitereaders បានឲ្យដឹងថា អ្នកស្រី Rita Sarkar ២៩ឆ្នាំ បានរៀបការជាមួយនឹងបុរសជនជាតិឥណ្ឌាម្នាក់ ឈ្មោះ Biswajit Sarkar។ បន្ទាប់ពីរៀបការរួចហើយ ក្រុមគ្រួសាររបស់នាងបានខកខាត់បង់ថ្លៃបណ្ដាការទៅឲ្យភាគីខាងកូនបុរស ធ្វើឲ្យប្ដីរបស់នាងចេះតែរអ៊ូរទាំពីរឿងថ្លៃបណ្ដាការនោះ។ លុះក្រោយមក ប្ដីរបស់នាងបានឃុបឃិតគ្នាជាមួយនឹងគ្រូពេទ្យ វះកាត់យកតម្រងនោមរបស់នាងទៅលក់ ដើម្បីទូទាត់គ្នាថ្លៃបណ្ដាការដែលគ្រួសារខាងស្រីជំពាក់។
អ្នកស្រី Rita Sarkar បាននិយាយប្រាប់អ្នកកាសែតថា ដោយសារតែក្រុមគ្រួសាររបស់នាងគ្មានលុយបង់ថ្លៃបណ្ដាការនោះ ទើបនាងបានក្លាយជាជនរងគ្រោះ ដោយសារការរំលោភបំពានពីប្តីរបស់នាង។ ប៉ុន្តែអ្វីដែលនាងមិនដឹង គឺថាប្តីរបស់នាង (Biswajit Sarkar) បានលួចតម្រងនោមរបស់នាងជាប្រពន្ធ យកទៅលក់។
អ្នកស្រី Rita Sarkar បានបន្តថា “កាលពី២ឆ្នាំមុន នាងបានចាប់ផ្តើមឈឺក្រពះ ហើយប្តីរបស់នាងបាននាំនាងទៅផ្ទះថែទាំសុខភាព នៅគ្លីនិកឯកជនមួយ នៅកូលកាតាជាកន្លែងដែលគាត់ និងបុគ្គលិកពេទ្យ បានប្រាប់នាងថា នាងនឹងមានបញ្ហាសុខភាពធ្ងន់ ត្រូវការវះកាត់។ ក្រោយពេលវះកាត់ហើយ នាងចាប់ផ្តើមមានអារម្មណ៍ថា មានអ្វីខុសប្លែកពីមុន។ មិនយូរប៉ុន្មាន ក្រោយពេលត្រលប់មកផ្ទះវិញ នាងចាប់ផ្តើមឈឺចាប់យ៉ាងខ្លាំង នៅផ្នែកខាងខ្នង។ នៅពេលនោះ នាងបានសុំឲ្យប្ដីរបស់នាង ជួនទៅជួបគ្រូពេទ្យ តែប្ដីបានបដិសេធ។ ផ្ទុយទៅវិញ ប្ដីរបស់នាងនៅតែទុកនាងឲ្យនៅក្នុងផ្ទះ ឆ្ងាយពីក្រុមគ្រួសារ និងមិត្តភក្តិ រហូតដល់នាងបានជាសះស្បើយ ដោយខ្លួនឯង។
អ្នកស្រី Rita Sarkar បានបន្តថា ជាការពិត ចាប់តាំងពីការវះកាត់លើកទីមួយនោះមក ឥរិយាបថបស់ប្ដីនាងមានលក្ខណៈចម្លែក។ លុះពេលអាការជំងឺរបស់នាងចាប់ផ្ដើមរើឡើងវិញ គឺនាងត្រូវបានសាច់ញាតិ និងឪពុកម្ដាយរបស់នាងបញ្ជូនទៅកាន់មជ្ឈមណ្ឌលវេជ្ជសាស្ត្រីមួយកន្លែង នៅទីនោះ ក្រុមគ្រូពេទ្យជំនាញ បានបញ្ជាក់ថា តម្រងនោមរបស់របស់នាងម្ខាង ត្រូវបានបាត់ហើយ។
អ្នកស្រី Rita Sarkar បានប្រាប់កាសែត Hindustan Times ថា “នាងត្រូវបានគេបំផ្លាញ។ បន្ទាប់មក នាងបានយល់ថា ហេតុអ្វីដែលស្វាមីរបស់នាង បានអង្វរនាងឱ្យនៅស្ងៀម កុំនិយាយពាក់ព័ន្ធនឹងការវះកាត់នោះ ទើបនាងដឹងថា ប្ដីរបស់នាងបានលក់តម្រងនោមរបស់នាង ដោយសារតែគ្រួសាររបស់នាងមិនលុយសម្រាប់បង់ថ្លៃបណ្ណាការនោះ “។
បើតាមសម្ដីររបស់ឪពុករបស់នាង Rita Sarkarបាននិយាយថា នាង និង Biswajit បានរៀបការ នៅអំឡុងឆ្នាំ២០០៥ ប៉ុន្តែនៅពេលនោះ គ្រួសាររបស់គាត់មានប្រាក់តែ ១៨០ ០០០ រូបី(លុយឥណ្ឌា) ឬស្មើនឹង២៨០០ដុល្លារតែប៉ុណ្ណោះ ទើបមិនគ្រប់ថ្លៃបណ្ដាការឲ្យទៅខាងកូនប្រុស។
ក្រោយពេលបែកធ្លាយរឿងរ៉ាវវះកាត់តម្រងនោមប្រពន្ធលក់រួចមក អ្នកស្រី Rita Sarkar បានប្តឹងទៅប៉ូលិសក្រុង West Bengal ហើយទាំងប្ដីរបស់នាង ឈ្មោះ Bisjawit និងបងប្រុសរបស់គេ ឈ្មោះ Shyamal Sarkar ត្រូវបានចាប់ខ្លួន ក្រោមការចោទប្រកាន់ពីបទជួញដូរសរីរាង្គរបស់មនុស្ស និងស្ត្រីម្នាក់ត្រូវឃាត់ខ្លួនពីប្រព្រឹត្ដឧក្រិដ្ឋកម្មដោយចេតនា។
ក្នុងអំឡុងពេលសួរចម្លើយនោះ ជនសង្ស័យ ឈ្មោះ Bisjawit Sarkar បានសារភាពថា គាត់លក់តម្រងនោមរបស់ប្រពន្ធគាត់ទៅឲ្យគ្លីនិកមួយ។ ប៉ុន្តែគេបានអះអាងថា ការលក់នេះ គឺជាការស្របច្បាប់ទាំងអស់ ដោយសារតែ Rita បានចុះហត្ថលេខាលើលិខិតយល់ព្រម។ ទោះជាយ៉ាងណា អ្នកស្រី Rita Sarkar បានបដិសេធយ៉ាងដាច់អហង្ការថា អ្វីដែលប្ដីរបស់នាងនិយាយនោះ មិនមែជាការពិតឡើយ ដោយនាងបានលើកឡើងថា មុនពេលទៅជួបវេជ្ជបណ្ឌិត នៅកុលកាតា នាងត្រូវបានគេឱ្យភេសជ្ជៈផឹក។ បន្ទាប់មក នាងមានអារម្មណ៍ងងុយគេង។ ចាប់តាំងពីពេលនោះមក នាងមិនបានដឹងអ្វីទាំងអស់ ហើយនាងមិនបានចងចាំពីការចុះហត្ថលេខាលើក្រដាសណាមួយនោះឡើយ៕