បរទេស៖ លោកវ៉្លាឌីមៀរ ពូទីន បានទទួលជ័យជម្នះភ្លូកទឹកភ្លូកដី នៅក្នុងការបោះឆ្នោតប្រធានាធិបតី នៃសហព័ន្ធន៍រុស្ស៊ី ដោយទទួលបានសំឡងគាំទ្រចំនួន៧៦,៦ភាគរយ ហើយលោកនឹងនៅតែបន្តធ្វើជាប្រមុខរដ្ឋ នៃប្រទេសរុស្ស៊ី រយៈពេល៦ឆ្នាំបន្តទៀត។ នេះបើយោងតាមសេចក្ដីរាយការណ៍របស់បណ្ដាញទូរទស្សន៍ CNN ។
លោក វ៉្លាឌីមៀរ ពូទីន ជាអតីតអ្នកស៊ើបការណ៏របស់ KGB របស់អតីតសហភាពសូវៀត ហើយលោកបានលេចធ្លោ នៅក្នុងឆាកនយោបាយ នៃសហព័័ន្ធន៍រុស្ស៊ី អស់រយៈពេល១៨ឆ្នាំមកហើយ។ លោកលោក វ៉្លាឌីមៀរ ពូទីន គឺជាមេដឹកនាំរុស្ស៊ីដែលកាន់តំណែងយូរជាងគេបំផុត ចាប់តាំងពីលោក Joseph Stalin មេដឹកនាំផ្តាច់ការរបស់អតីតសហភាពសូវៀត។
យោងតាមលទ្ធផលបណ្ដោះអាសន្ន លោក វ៉្លាឌីមៀរ ពូទីន ត្រូវគេរំពឹងយ៉ាងមុតមាំថា លោកនឹងឈ្នះការបោះឆ្នោតអាណិត្តទី៤របស់លោក ដោយសារតែការបោះឆ្នោត មិនមានការចូលរួមពីបក្សប្រឆាំង និងដៃគូប្រជែងដ៏មុតស្រួចរបស់លោក គឺលោក Alexei Navalny ដោយពួកគាត់ត្រូវហាមចូលរួមប្រកួតប្រជែង នៅក្នុងការបោះឆ្នោតប្រធានាធិបតី នៃសហព័ន្ធន៍រុស្ស៊ី។
ថ្វីបើលទ្ធផលមិនទាន់បានប្រកាសជាផ្លូវការក្ដី ប៉ុន្តែលោកប្រធានាធិបតី មានវ័យ៦៥ឆ្នាំរូបនេះ បានប្រកាសពីជ័យជម្នះរបស់លោក នៅចំពោះមុខអ្នកគាំទ្រលោករាប់ពាន់នាក់ នៅក្នុងតំបន់ក្បែរវិមានក្រែមឡាំង ហើយលោកក៏បានស្នើឲ្យប្រជាពលរដ្ឋទាំងអស់រួបរួមគ្នា គិតពីផលប្រយោជន៍ជាតិជាចម្បង។
លទ្ធផលបោះឆ្នោត នៃការជ្រើសរើសប្រធានាធិបតីសហព័ន្ធន៍រុស្ស៊ី បានបង្ហាញថា លោក វ្ល៉ាឌឺមៀរ ពូទីន ដែលជាប្រធានាធិបតីបច្ចុប្បន្ន បានទទួលសំឡេងគាំទ្រពីប្រជាជនចំនួន ៧៦,៦ ភាគរយ ហើយជាសំឡេងគាំទ្រច្រើនជាងគេ ក្នុងចំណោមបេក្ខជនឈ្មោះ ៨នាក់។ តាមរយៈលទ្ធផល នៃការគាំទ្រនេះ លោក ពូទីន នឹងត្រូវដឹកនាំប្រទេស រយៈពេល៦ឆ្នាំបន្តទៀត (២០១៨ ដល់២០២៤) ស្របតាមរដ្ឋធម្មនុញ្ញ នៃសហព័ន្ធន៍រុស្ស៊ី ។
គួរបញ្ជាក់ថា លោក វ្ល៉ាឌឺមៀ ពូទីន ជាប់ឆ្នោតឡើងកាន់តំណែងជាប្រធានាធិបតី នៃសហព័ន្ធន៍រុស្ស៊ី លើកដំបូង នៅឆ្នាំ២០០០ ដល់ ២០០៤ និងលើកទី២ នៅឆ្នាំ២០០៤ ដល់២០០៨ (ដោយសារច្បាប់ នៅរុស្ស៊ីផ្ដល់សិទ្ធិឲ្យប្រធានាធិបតីកាន់តំណែងបានត្រឹមតែ២អាណត្តិ) ពោលគឺនៅឆ្នាំ២០០៨ដល់២០១២ លោក ឌីមីទ្រី ម៉េដម៉េដេវ ក៏បានឡើងកាន់តំណែងប្រធានាធិបតី នៅឆ្នាំ២០១២ ដល់២០១៨ (ច្បាប់រុស្ស៊ី កែប្រែឲ្យប្រធានាធិបតីកាន់តំណែងបាន៦ឆ្នាំវិញ) ទើបលោក ពូទីន ជាប់ឆ្នោតកាន់តំណែងប្រធានាធិបតីជាលើកទី៣ មុននឹងបន្តឈ្នះអាណត្តិប្រធានាធិបតីលើកទី៤របស់លោក នាអាណត្តិនេះ ៕
