ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន នៅព្រឹកថ្ងៃទី១៤ ខែកុម្ភៈ ឆ្នាំ២០១៨ បានថ្លែងប្រាប់ក្រុមអ្នកយកព័ត៌មានថា មន្ត្រីជំនាញរបស់លោក មិនល្ងង់កាត់ទូកុងតឺន័រនោះទេ ពោលគឺមន្រ្ដីជំនាញគ្រាន់តែវាស់វែង និងគូស ដើម្បីកត់សម្គាល់ពីការលើសរបស់ទូកុងតឺន័រតែប៉ុណ្ណោះ ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបន្តថា បើតាមទូកុងតឺន័រ គឺអ្នកផលិតធ្វើត្រឹមត្រូវតាមក្បួនខ្នាតរបស់គេ។ ប៉ុន្តែអ្វីដែលយើងឃើញទូកុងតឺន័រវែងៗលើសខ្នាតនោះ គឺក្រុមហ៊ុនដឹកជញ្ជូនមួយចំនួន បានយករថយន្តក្បាលវែងយកមកអូស ឬដឹកទូកុងតឺន័រទាំងនេះ ទើបធ្វើឲ្យមានការលើសប្រវែង ដែលខុសនឹងច្បាប់ចរាចរណ៍ នៅក្នុងប្រទេសកម្ពុជា តែបើក្រុមហ៊ុនដឹកជញ្ជូនទាំងនោះ ប្រើក្បាលដឹក និងអូសខ្លី គឺវាមិនមានបញ្ហាចោទនោះឡើយ។
ក្រោយពេលសមត្ថកិច្ចចាប់រថយន្តកាត់ទូកុងតឹន័ររបស់ពួកគេនោះមក ក្រុមហ៊ុនដឹកជញ្ជូនមួយចំនួន បានប្រតិកម្មយ៉ាងខ្លាំង និងសម្ដែងនូវការមិនពេញចិត្ត ដោយលើកជាទស្សនៈមួយថា «កុំដុតឲ្យខ្លោច កុំរោលឲ្យឆៅ»។ ដោយសារតែមានប្រតិកម្មបែបនេះ ទើបលោក ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន បានចេញមុខមកបញ្ជាក់ថា មន្ត្រីរបស់ក្រសួងមិនល្ងង់ដល់ថ្នាក់កាត់ទូកុងតឺន័រនោះទេ បើកាត់ទូកុងតឺន័រមិនមានអ្វីធ្វើគន្លឹះទាក់ជាមួយតួរថយន្តសណ្តោងនោះឡើយ។
លោកទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន បញ្ជាក់ថា «យើងមិនកាត់កុងតឺន័រទេ យើងបានវាស់ពីក្បាលខាងមុខទៅខាងក្រោយ ហើយគូសគំនូសបញ្ជាក់ថា កុងតឺន័រហ្នឹង ទាំងក្បាល ទាំងអីទៅ វាលើសពី១៦ម៉ែត្រ»។ តាមច្បាប់ចរាចរណ៍របស់យើង គឺកំណត់យ១៦ម៉ែត្រ ហើយខ្នាតអន្តរជាតិ ប្រទេសណា ដែលមានផ្លូវពីរគន្លង គឺគេកំណត់ត្រឹម១៦ម៉ែត្រកន្លះ កុងតឺន័រ៤៥នេះបានដែរ ប្រសិនណា យើងយកក្បាលខ្លីដឹកបាន វាស់ទៅវាជិត១៦ម៉ែត្រ ឬលើសបន្តិចបន្តួចក៏យើងអនុញ្ញាតដែរ។ ប៉ុន្តែផ្នែកឯកជនមួយចំនួន នៅតែមានអស្មិមានះ គាត់យកក្បាលវែងរបស់អាមេរិកមកអូសឬដឹក។ លុះពេលដឹកទៅ គឺវាមានប្រវែង១៨ម៉ែត្រ គឺខុសខ្នាតអន្តរជាតិ ចំពោះផ្លូវពីរគន្លងផង ធ្វើឲ្យកកស្ទះចរាចរណ៍ផង និងខុសច្បាប់ចរាចរណ៍ផង» ។
ក្រោយពេលសម្ដេចនាយករដ្ឋមន្ត្រី បានប្រកាសចាត់វិធានការក្ដៅលើរថយន្តតទ្រុង (កាត់តកែច្នៃ) ចាប់ពីម៉ោង០០យប់ ថ្ងៃទី៩ ខែកុម្ភៈ ឆ្នាំ២០១៨នោះមក អាជ្ញាធរខេត្ត-រាជធានី និងសមត្ថកិច្ចពាក់ព័ន្ធ បានចាប់ផ្ដើមធ្វើការយ៉ាងយកចិត្តទុកដាក់លើរថយន្តតទ្រុងខុសលក្ខណៈបច្ចេកទេស និងចាប់ផាកពិន័យជាបន្តបន្ទាប់៕