ខេត្តបាត់ដំបង៖ បន្ទាប់ពីលោក ឈាង វុន តំណាងរាស្រ្តមណ្ឌលខេត្តបាត់ដំបង បានអំពាវនាវឱ្យសមត្ថកិច្ចខេត្តបាត់ដំបង តាមដានឃ្លាំមើលសកម្មភាព នៅក្នុងហាងរបស់ កញ្ញា ស៊ិន ចាន់ពៅរ៉ូហ្ស៊េត អតីតចៅសង្កាត់អូរចារ កូតាអតីតគណបក្សសង្រ្គោះជាតិ ដោយសង្ស័យថា ជាកន្លែងប្រមូលផ្តុំដោយក្រុមឧទ្ទាមដែលគាំទ្រដល់ចលនាសង្រ្គោះជាតិរបស់លោក សម រង្ស៉ី នោះមក កញ្ញា បានឆ្លើយតបតាមគណនីហ្វេសប៊ុករបស់នាងថា ការអំពាវនាវបែបហ្នឹង គឺដូចផ្តាច់ឆ្នាំងបាយរបស់នាងហើយ តើគ្រាន់តែខ្ញុំសុំរស់ផង ពុំបានទេឬ? តើភ្ញៀវក្នុងហាងនាងខ្ញុំគិតយ៉ាងណា? តើរបរលក់នំបញ្ចុកនេះ ខុសនឹងច្បាប់ឬ? ទុកឲ្យក្មេងស្រីម្នាក់នេះបានរកស៊ីចិញ្ចឹមម្ដាយចាស់ជរាផងបានទេ?
លោក ឈាង វុន តំណាងរាស្រ្តមណ្ឌលខេត្តបាត់ដំបង បានថ្លែងប្រាប់បណ្តាញសារព័ត៌មានដែលស្និទ្ធនឹងរដ្ឋាភិបាល នៅថ្ងៃទី២៩ ខែមករានេះថា «ខ្ញុំចូលទៅក្នុងហាងនោះ ដោយចៃដន្យទេ ប៉ុន្តែអ្វីដែលខ្ញុំមើលឃើញនោះ គឺគួរឱ្យចាប់អារម្មណ៍ណាស់។ នៅកន្លែងនោះ អ្នកដែលចេញចូល ជួយបោសជូតមួយចំនួន គឺជាសមាជិកសកម្ម ដែលគាំទ្រចលនាសង្រ្គោះជាតិ។ ចលនាសង្រ្គោះជាតិនេះ គឺជាចលនាឧទ្ទាម ហើយគេប្រកាសកម្ទេច»។
លោក ឈាង វុន តំណាងរាស្រ្តមណ្ឌលខេត្តបាត់ដំបង បានបន្តថា «រ៉ូហ្ស៊េត មិនមានតម្លៃអ្វីសម្រាប់ខ្ញុំទេ នាងមានតម្លៃតែមួយគត់ គឺតម្លៃឧទ្ទាម បើសិនជាកន្លែងរបស់គាត់ប្រមូលផ្តុំ ដោយក្រុមឧទ្ទាម។ ប៉ុន្តែខ្ញុំមិនទាន់ចោទប្រកាន់ទេ គ្រាន់តែសង្ស័យដោយសារតែឃើញសកម្មភាព មានការចូលរួមពីអ្នកគាំទ្រចលនាឧទ្ទាម»។
កញ្ញា ស៊ិន ចាន់ពៅរ៉ូហ្សេត អតីតចៅសង្កាត់អូរចារដែលមានកេរ្តិ៍ឈ្មោះល្បី មកពីគណបក្សសង្គ្រោះជាតិបានប្រាប់កាសែតក្នងស្រុកថា ក្រោយពីនាងត្រូវបាត់តួនាទីជាចៅសង្កាត់នោះមក នាងមិនបានធ្វើ ឬប្រកបមុខរបរអ្វីដែលផ្ទុយពីឆន្ទៈ មនសិការ ឧត្តមគតិរបស់នាង ឬខុសច្បាប់របស់សង្គមទេ។ មុខរបរដែលនាងកំពុងដំណើរការ លក់ដូរនំបញ្ចុកខ្មែររាល់ថ្ងៃនេះ គឺនាងធ្វើដើម្បីរកប្រាក់កម្រៃចិញ្ចឹមម្តាយ និងដោះស្រាយបង់រំលស់បំណុលផ្ទះសំបែងបន្តិចបន្តួចតែប៉ុណ្ណោះ។
កញ្ញាបន្តថា នាងមិនបានយកកន្លែងលក់ដូរទៅធ្វើ ជាទីតាំងអ្វីផ្សេងដែលប្រឆាំងនឹងការហាមឃាត់របស់រដ្ឋាភិបាលនោះទេ។ ប៉ុន្តែនៅពេលនាងឮអ៊ំ ឈាង វុន ចោទថា ជាកន្លែងប្រមូលផ្ដុំឧទ្ទាម នាងពិតជាព្រួយបារម្ភ និងសោកស្តាយចំពោះលោក ឈាង វុន ដែលបានធ្វើអធិប្បាយនៅលើហ្វេសប៊ុក ដោយចោទប្រកាន់នាងថាទីតាំងលក់ដូររបស់នាង អាចជាទីតាំងគាំទ្រចលនាក្រុមឧទ្ទាម។ ការអធិប្បាយរបស់លោក វុន នេះពិតជាមានបំណងចង់បិទហាងរបស់នាង ឬធ្វើមិនឲ្យមានភ្ញៀវហ៊ានចូលហាង ឬមិនចង់ឲ្យនាងរស់នៅចិញ្ចឹមអ្នកម្តាយជរាម្នាក់បានទេ។
កញ្ញា ស៊ិន ចាន់ពៅរ៉ូហ្សេត បានបញ្ជាក់ថា៖ «ការ comment របស់លោក អ៊ំ (ឈាង វុន) នេះ ពិតជាមានបំណងចង់បិទហាងខ្ញុំ ឬមួយធ្វើមិនឲ្យមានភ្ញៀវហ៊ានចូលហាង ឬមិនចង់ឲ្យខ្ញុំរស់នៅចិញ្ចឹមអ្នកម្តាយជរាម្នាក់បានទេ។ តើលោកអ៊ំ អាចអនុគ្រោះឲ្យក្មេងស្រីម្នាក់នេះ រស់នៅជាមួយអ្នកម្តាយចាស់ជរាម្នាក់ផងបានទេ? ឬត្រូវឲ្យនាងខ្ញុំរត់ទៅណាទៀត? លោកអ៊ំអើយ! ក្មេងស្រីម្នាក់នេះមានបន្ទុកធ្ងន់ណាស់! បើខ្ញុំចេញទៅណា ចោលអ្នកម្តាយគឺស្មើនឹងខ្ញុំសម្លាប់អ្នកម្តាយខ្ញុំដោយដៃនាងខ្ញុំ»។
លោកបណ្ឌិត ឡៅ ម៉ុង ហៃ អ្នកស្រាវជ្រាវ និងវិភាគបញ្ហាសង្គមបានយល់ឃើញថាការចោទប្រកាន់ថាមានការប្រមូលផ្ដុំក្រុមឧទ្ទាម ឬភេរវកម្មផ្សេងៗនោះ គឺវាមិនអាចទៅរួចទេ ព្រោះតាមស្ថានភាពជាក់ស្ដែងនៅពេលនេះ ក្រុមមេដឹកនាំកងកម្លាំងប្រដាប់អាវុធគ្រប់ផ្នែកបានប្រកាសត្រៀមកម្ទេចក្រុមបះបោររួចជាស្រេច។ លោកបន្តថាកម្ពុជាគួរតែបញ្ចប់វប្បធម៌លាបពណ៌ដាក់គ្នា ហើយពេលខ្លះគ្រាន់តែគេជួយបញ្ចេញមតិយោបល់លើបញ្ហាអ្វីមួយ ក៏នាំគ្នាចោទគ្នាថាអ្នកប្រឆាំង។ គេគួររើសយកមតិយោបល់របស់អ្នកដទៃមកពិចារណាខ្លះផង។ «ធម្មតា ការហូបចុកបើកន្លែងណាធ្វើឆ្ងាញ់ គេរត់ទៅរកកន្លែងហ្នឹងហើយ គ្រាន់តែគ្នាទៅហូបចុក ចាំបាច់ចោទគ្នាដល់ថ្នាក់ហ្នឹងធ្វើអ្វី អារឿងអ្នកណាចង់បង្កើតក្រុមឧទ្ទាម ឬភេរវកម្មអ្វីនោះ គឺវាទៅមិនរួចទេ ហើយក៏គេមិនធ្វើដែរ វាហួសសម័យហើយ ហើយក៏គួរតែបញ្ចប់វប្បធម៌បែបនេះទៅ»។
សូមជម្រាបថា កាលពីថ្ងៃទី ២៣ ខែមករាឆ្នាំ ឆ្នាំ២០១៨ សម្ដេច ស ខេង រដ្ឋមន្ត្រីក្រសួងមហាផ្ទៃ បាននិយាយបែបកំប្លែង នៅក្នុងពិធីបិទសន្និបាតការងាររបស់រដ្ឋបាលខេត្តបន្ទាយមានជ័យថា «ឈប់ទៅទាក់កញ្ញា ស៊ិនចាន់ ពៅរ៉ូហ្ស៊េត ឲ្យមកចុះចូលនឹងគណបក្សប្រជាជនយើងទៀតទៅ។ ដល់ខ្ញុំសួរថា ទៅភោជនីយដ្ឋានរបស់រ៉ូហ្ស៊េតនោះ ធ្វើអីក៏ញឹកម្ល៉េះ? គាត់ឆ្លើយប្រាប់ខ្ញុំថា ទៅទាក់អូសទាញគេឲ្យចូលយើង។ តែខ្ញុំប្រាប់វិញថា ទៅដល់ក្នុងភោជនីយដ្ឋានគេរាល់ថ្ងៃ តិចមិនគេមក យើងបែរជាគេទាញចូលគេវិញទៅ»។ ការថ្លែងរបស់លោក ស ខេង នេះ បើទោះបីជាមិនបានបញ្ចេញឈ្មោះអ្នកណាម្នាក់ក៏ត្រូវបានគេគិតថាទំនងជាចង់សំដៅទៅលើលោក ឈាង វុន ដោយសារតែលោក វុន ធ្លាប់ទៅហាងលក់នំបញ្ចុករបស់កញ្ញា រ៉ូហ្ស៊េត។
បន្ទាប់ពីគណបក្សប្រឆាំងត្រូវបានរំលាយ កាលពីថ្ងៃទី១៦ វិច្ឆិកា ឆ្នាំ ២០១៧ កញ្ញា រ៉ូហ្ស៊េត អតីតចៅសង្កាត់អូរចារក៏ដូចមេឃុំ ចៅសង្កាត់ សមាជិកក្រុមប្រឹក្សាឃុំ សង្កាត់ រួមទាំងសមាជិកក្រុមប្រឹក្សាខេត្ត ក្រុងស្រុកខណ្ឌសរុបជិត ៦០០០ រូបបានបាត់បង់តួនាទី មុខតំណែង។ សម្រាប់កញ្ញា រ៉ូហ្ស៊េត ក៏បានបើកភោជនីយដ្ឋានតូចមួយលក់ម្ហូបអាហារនៅក្រុងបាត់ដំបង ដើម្បីរកកម្រៃចិញ្ចឹមជីវិត និងជួយដោះស្រាយការងារមនុស្សធម៌ដែលនាងធ្លាប់តែធ្វើកន្លងមក៕
ទោះជាយ៉ាង KBN មិនអាចទាក់ទងសុំការបំភ្លឺបន្ថែមពីលោក ឈាង វុន បានទេ នៅល្ងាចថ្ងៃនេះ។ ដោយឡែក កញ្ញា រ៉ូហ្ស៊េត អតីតចៅសង្កាត់អូរចារ កូតាអតីតគណបក្សសង្រ្គោះជាតិ មិនអាចទាក់ទងបានដែរ៕