ភ្នំពេញ៖ ស្រ្តីម្នាក់ត្រូវស្រ្តីបុគ្គលិកខារ៉ាអូខេវាយបែកក្បាល ដោយសារតែខឹងសួរនាំរឿងម្ហូបដែលអត់កុំម្មង់សោះ បែរជាគិតលុយថ្លៃម្ហូបដល់ទៅ ៦មុខ គ្រាន់តែផឹកស្រាបៀរអស់ ១កេះកន្លះ អស់ប្រាក់ ១១៨ដុល្លារ ដែលហេតុការណ៍នេះបង្កឱ្យមានការភ្ញាក់ផ្អើល កាលពីវេលាម៉ោង៣ ទៀបភ្លឺថ្ងៃទី១៧ ខែមករា ឆ្នាំ២០១៨ នៅហាងខារ៉ាអូខេ សែនរីករាយ នៅតាមបណ្តោយផ្លូវ២០០៤ ភូមិ ត្រពាំងល្វា សង្កាត់ កាកាប១ ខណ្ឌពោធិ៍សែនជ័យ ។
ជនរងគ្រោះមានឈ្មោះ តារា រត្ន ភេទស្រី អាយុ ២៧ឆ្នាំ មុខរបរអ៊ុតសក់ស្នាក់នៅ សង្កាត់ទឹកថ្លា ខណ្ឌពោធិ៍សែនជ័យ បាននិយាយថា នៅមុនពេលកើតហេតុ នៅវេលាម៉ោង១១និង៣០នាទីយប់ថ្ងៃទី១៦ ខែមករា ពួកគាត់បាននាំគ្នាចូលច្រៀងខារ៉ាអូខេសែនរីករាយ មានគ្នា ៦នាក់ ក្នុងនោះមានស្រី ២នាក់ និងប្រុស៤នាក់ បានហៅស្រាបៀរចំនួន១កេះកន្លះ ក្នុងតំលៃ ៤០ដុល្លារ Free ម្ហូប ៦មុខ ។
ខណៈពេលកំពង់តែផឹកស៊ីក្នុងបន្ទប់ ភ្លើងដំណើរការមិនល្អ ចេះតែដាច់ក៏បានប្តូរបន្ទប់ចុះឡើង ពួកគាត់មិនបានដឹងថា ម្ហូប៦មុខទៀតនរណាជាអ្នកហៅម្ហូបឡើយ ។ រហូតដល់ពេលគិតលុយអស់១១៨ដុល្លារ ក៏បានសួរនាំគ្នាងថា ម្ដេចអស់ច្រើនម៉្លេះ? ពួកគេផឹកអស់តែ ១កេះកន្លះសោះ ភ្លាមនោះអ្នកគិតលុយបាននិយាយថា មានអ្នកហៅមុខម្ហូប ៦មុខទៀត ទើបអស់លុយប៉ុណ្ណឹង ។
ប្រភពដដែលបានបន្តទៀតថា បន្ទាប់ពីអ្នកគិតលុយប្រាប់ថា មានអ្នកកុំម្មង់ម្ហូប ៦មុខទៀត ក៏សួរនាំគ្នាមិនមានអ្នកណាកុំម្មង់ទេ តែមិត្តភក្តិម្នាក់ក្នុងចំណោម ៦នាក់ បានចេញលុយថ្លៃផឹកស៊ី គ្រប់ចំនួនរួច ហើយនារីរងគ្រោះបានចេញពីកន្លែងផឹក ដើរទៅរកថៅកែឱ្យជួយដោះស្រាយ រឿងអស់លុយច្រើន ។
ពេលជួបម្ចាស់ហាង មិនបានជួយសម្របសម្រួលឡើយ បន្ទាប់មកស្ត្រីនៅក្នុងខារ៉ាអូខេជាបុគ្គលិកក្នុងហាងខាងលើ បានឡាយវីដេអូនិយាយថា រូបរាងប៉ុណ្ណឹងដែរ មិនមានលុយឱ្យថ្លៃផឹកស៊ី ហើយនារីរងគ្រោះខាងលើ បាននិយាយថា លុយខ្ញុំមានមិនក្រោម ៣ទៅ៤រយឡើយ ប៉ុន្តែគាត់ផឹកអស់ស្រាបៀរតែ១កេះកន្លះ អស់ដល់ទៅជាង ១០០ដុល្លារ ក៏បានឈ្លោះគ្នា រហូតនារីបុគ្គលិកខារ៉ាអូខេខាងលើ បានវាយទៅលើនារីរងគ្រោះជាភ្ញៀវ បណ្ដាលឱ្យរយះមុខ ថៅកែហាងមិនដោះស្រាយឱ្យទៀត ទើបជនរងគ្រោះទៅប្ដឹងសមត្ថកិច្ច ឱ្យជួយអន្តរាគមន៍ភ្លាម ។
បន្ទាប់ពីជនរងគ្រោះប្តឹងសមត្ថកិច្ច ឱ្យចុះទៅដោះស្រាយដល់កន្លែងកើតហេតុ ស្រាប់តែម្ចាស់ហាងដែលគេស្គាល់ថាឈ្មោះ យឹម សំណាង ហៅតូ បានបិទទ្វារហាងអស់ទៅហើយ ក្រោយពេលកើតហេតុ ជនរងគ្រោះបានទៅដាក់ពាក្យបណ្ដឹង នៅប៉ុស្ដិ៍នគរបាលរដ្ឋបាលកាកាប១ ដើម្បីឱ្យសមត្ថកិច្ច ចាត់ការតាមនីតិវិធី ។
បើតាមសមត្ថកិច្ចម្នាក់បាននិយាយទាំងលាក់លៀមថា ហាងខារ៉ាអូខេយីហោសែនរីករាយនេះ តែងតែមានរឿងជាញឹកញាប់មកហើយ ពេលខ្លះ មានរឿងហិង្សា រវាងបុគ្គលិកនិងភ្ញៀវ ពេលខ្លះមានរឿងមុខម្ហូប ដែលភ្ញៀវមិនបានហៅ បុគ្គលិកលើកមក ហើយសមត្ថកិច្ចបានបន្តទៀតថា ក្នុងមួយយប់ៗ មិនបានដេកមិនបានពួនឡើយ ពិបាកខ្លាំងណាស់ហាងខារ៉ាអូខេខាងលើនេះ ៕