ខេត្តព្រៃវែង៖ បុរសម្នាក់បានព័ទ្ធវង់ផឹកស៊ីជាមួយនឹងអ្នកភូមិ រហូតស្រវឹងជោកជាំ ទើបនាំកូនទៅរាយមង បណ្ដាលឲ្យលង់ទឹកស្លាប់ បង្កឲ្យភ្ញាក់ផ្អើលដល់ប្រជាពលរដ្ឋ រត់ទៅរាវយកសាកសព កាលពីវេលាម៉ោង៨ និង៣០នាទីយប់ ថ្ងៃទី១៥ ខែមករា នៅក្នុងទឹកត្រពាំងខាងក្រោយផ្ទះរបស់ជនរងគ្រោះ ស្ថិតក្នុងភូមិព្រែកធំ ឃុំអ្នកលឿង ស្រុកពាមរក៍។
មន្ត្រីនគរបាលស្រុកពាមរក៍ បានឲ្យដឹងថា ជនរងគ្រោះ ឈ្មោះ នួង រ៉ាន់ អាយុ៤១ឆ្នាំ ជនជាតិខ្មែរ មុខរបរជាកសិករ មានលំនៅក្នុងភូមិកើតហេតុខាងលើ។ មុនពេលកើតហេតុ ជនរងគ្រោះបានព័ទ្ធវង់ផឹកស្រាជាមួយអ្នកភូមិរស់នៅជាមួយគ្នា រហូតស្រវឹងជោកជាំ ទើបនាំកូនប្រុសម្នាក់ ឈ្មោះ ចាន់ ចំរើន អាយុ១៤ឆ្នាំ ទៅរាយមង នៅក្នុងត្រពាំងទឹកខាងក្រោយផ្ទះរបស់គាត់។ លុះពេលទៅដល់ទីនោះ ជនរងគ្រោះបានប្រាប់ឲ្យកូនប្រុសរបស់គាត់ រង់ចាំនៅលើមាត់ត្រពាំង ហើយគាត់បានចុះទៅរាយមង។
ប៉ុន្តែដោយសារគាត់ស្រវឹងជោកជាំផង ក៏រអិលជើងចូលទៅក្នុងទឹកជ្រៅ លិចចូលទៅក្នុងទឹកបាត់។ ឃើញហេតុការណ៍បែបនេះ កូនប្រុសរបស់ជនរងគ្រោះ បានរត់មកប្រាប់ម្តាយ បង្កឲ្យភ្ញាក់ផ្អើលឆោឡោពេញភូមិ រត់ទៅជួយសង្គ្រោះជនរងគ្រោះ ប៉ុន្តែទម្រាំអ្នកភូមិរត់ទៅដល់ គឺជនរងគ្រោះបានលង់ទឹកស្លាប់បាត់ទៅហើយ។
ក្រោយពេលរាវរកសាកសពរបស់ជនរងគ្រោះឃើញ ក្រុមគ្រួសារបាននាំយកមកផ្ទះ ហើយក៏មិនបានរាយការណ៍ប្រាប់សមត្ថកិច្ចភ្លាមៗនោះដែរ គឺទុករហូតដល់ព្រឹកឡើង ទើបក្រុមគ្រួសាររាយការណ៍ជូនសមត្ថកិច្ចឲ្យចុះទៅត្រួតពិនិត្យ ហើយសមត្ថកិច្ចក៏បានបញ្ជាក់ថា ជនរងគ្រោះពិតជាស្លាប់ដោយសារការលង់ទឹកប្រាកដមែន។ បន្ទាប់មក សមត្ថកិច្ចក៏បានប្រគល់សាកសពរបស់ជនរងគ្រោះទៅក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕
