ខេត្តកណ្ដាល៖ បន្ទាប់ពីកើតមានករណីឃាតកម្មមកលើស្ដ្រីចំណាស់ម្នាក់ បង្កឲ្យភ្ញាក់ផ្អើលឡើង កាលពីវេលាម៉ោង៧ និង៥នាទីព្រឹក ថ្ងៃទី១២ ខែមករា ឆ្នាំ២០១៨ ត្រង់ក្បែរត្រពាំងពង្រ ស្ថិតក្នុងភូមិគោល ឃុំទួលព្រេច ស្រុកអង្គស្នួល នោះមក រហូតមកដល់ថ្ងៃទី១៦ ខែមករា ឆ្នាំ២០១៨នេះ សមត្ថកិច្ចជំនាញបានឃាត់ខ្លួនកសាងសំណុំរឿង បញ្ជូនទៅតុលាការ។
មន្ដ្រីនគរបាលស្រុកអង្គស្នួល បានឲ្យដឹងថា ជនសង្ស័យដែលសមត្ថកិច្ចឃាត់ខ្លួន ឈ្មោះ មុត ម៉ុន ភេទប្រុស អាយុ៣៣ឆ្នាំ (អតីតអ្នកប្រដាល់ឈ្មោះ ផុល ភាព) ជនជាតិខ្មែរ មុខរបរមិនពិតប្រាកដ មានលំនៅក្នុងភូមិអង្គតាសិត ឃុំទួលព្រេច ស្រុកអង្គស្នួល ខេត្តកណ្តាល។ នៅក្នុងការចាប់ខ្លួនជនសង្ស័យនោះ សមត្ថកិច្ចបានដកហូតវត្ថុតាងមួយចំនួន រួមមាន ពូថៅ១ ស្បែកជើង(ជ័រ)សង្រែក១គូមួកសំយាបរបស់ស្រី១ ក្រមាក្រឡាការ៉ូ១ ហើយវត្ថុតាងទាំងនេះគឺរបស់ជនរងគ្រោះ។ រីឯស្ដ្រីរងគ្រោះ ឈ្មោះ ឃួន ខឿន អាយុ៦៧ឆ្នាំ មុខរបរកសិករ មានប្ដីឈ្មោះ សន ស៊ុយ អាយុ៧៣ឆ្នាំ មានលំនៅក្នុងភូមិគោល ឃុំទួលព្រេច ស្រុកអង្គស្នួល ខេត្តកណ្ដាល។
ប្រភពដដែល បានបន្តថា បើតាមការបំភ្លឺរបស់ក្រុមគ្រួសារស្ដ្រីរងគ្រោះ បានឲ្យដឹងថា កាលពីព្រឹកថ្ងៃទី១១ ខែមករា ឆ្នាំ២០១៨ ស្ត្រីរងគ្រោះបានទៅចូលរួម ក្នុងកម្មវិធីបុណ្យសង្ឃទាន នៅផ្ទះរបស់អ្នកជិតខាង ដោយមានពាក់គ្រឿងអលង្ការ និងដាក់លុយចំនួន៥០០ដុល្លារ នៅជាប់នឹងខ្លួន។ លុះមកដល់វេលាម៉ោង២រសៀលថ្ងៃដដែល ប្ដីរបស់ស្ត្រីរងគ្រោះបានជិះម៉ូតឌុបកូនស្រីម្នាក់ ហើយបានដួលម៉ូតូ បណ្ដាលឲ្យរងរបួសយ៉ាងដំណំ។ ខណៈនោះ ស្ត្រីរងគ្រោះបានដាំទឹកក្ដៅស្អំរបួសឲ្យប្ដីរបស់គាត់។ បន្ទាប់មក នៅវេលាម៉ោង៣រសៀលថ្ងៃដដែល គាត់ក៏បានចាកចេញពីផ្ទះ ដើម្បីទៅផ្លាស់ចំណងគោដែលចង នៅឯវាលស្រែ ស្រាប់តែបាត់គាត់រហូត មិនឃើញត្រឡប់មកផ្ទះវិញ។
ប្រភពព័ត៌មានដដែល បានបន្តថា ក្រោយពេលបាត់ជនរងគ្រោះ ដោយគ្មានមូលហេតុបែបនេះ ធ្វើឲ្យពួកគាត់ងឿងឆ្ងល់ ក៏នាំគ្នាដើរ តាំងពីវេលាម៉ោង៤ និង៣០នាទីល្ងាច រហូតដល់វេលាទៀបភ្លឺ ថ្ងៃទី១២ ខែមករា នៅតែរកជនរងគ្រោះមិនឃើញ ទើបពួកគាត់ឈប់រក ហើយនាំគ្នាត្រឡប់មកសម្រាកសិន។ លុះមកដល់វេាលម៉ោង៧ព្រឹកថ្ងៃដដដែល ទើបនាំគ្នាទៅដើររកបន្តទៀត ស្រាប់តែប្រទះឃើញសាកសពរបស់ស្ដ្រីរងគ្រោះ ត្រូវឃាតករយកក្រមាចងរឹកកសម្លាប់ នៅក្នុងព្រៃលើដីទួល ក្បែរមាត់ត្រពាំងពង្រ ក៏បង្កឲ្យភ្ញាក់ផ្អើលដល់ប្រជាពលរដ្ឋ រស់នៅក្នុងនាំគ្នាទៅចោមរោមមើល និងរាយការណ៍ទៅសមត្ថកិច្ច។
សមត្ថកិច្ចដដែល បានបន្តថា ក្រោយពីទទួលបានព័ត៌មានបែបនេះភ្លាម សមត្ថកិច្ចបច្ចេកទេស និងវិទ្យាសាស្ត្រខេត្តបានសហការជាមួយនឹងមន្រ្ដីនគរបាលជំនាញរបស់អធិការដ្ឋាននគរបាលស្រុក លោកក្រុមប្រឹក្សាឃុំ គ្រូពេទ្យ មេភូមិ នគរបាលប៉ុស្តិ៍ ចុះទៅកាន់កន្លែងកើតហេតុ ដើម្បីពិនិត្យ និងធ្វើកោសល្យវិច័យលើសាកសព។ តាមលទ្ធផល នៃការពិនិត្យ សមត្ថកិច្ចជំនាញបានបញ្ជាក់ថា ករណីនេះគឺជាពិតឃាតកម្ម ដោយជនល្មើសបានយកក្រមាមករឹតកសម្លាប់ជនរងគ្រោះ។
ប្រភពព័ត៌មានពីក្រុមគ្រួសាររបស់ជនរងគ្រោះ បានឲ្យដឹងថា ក្រោយពេលវិលត្រឡប់មកពីបុណ្យសង្ឃទានវិញ ស្ត្រីរងគ្រោះបានដោះគ្រឿងអលង្ការ រួមជាមួយលុយ យកមកទុកនៅទូ នៅក្នុងផ្ទះអស់ហើយ ទើបចេញពីផ្ទះទៅផ្លាស់គោ ដោយនៅសល់តែចិញ្ចៀនចំរៀកផ្ដៅពាក់ជាប់ដៃ១វង់ប៉ុណ្ណោះ ហើយនៅពេលប្រទះឃើញសាកសពចិញ្ចៀននោះ ក៏បានបាត់មិនឃើញ នៅជាប់នឹងខ្លួនរបស់ស្ដ្រីរងគ្រោះនោះឡើយ។ករណីនេះសង្ស័យឃាតករបានដោះយកចិញ្ចៀននោះ ក្រោយពេលគេសម្លាប់គាត់រួច។
មន្ត្រីនគរបាលស្រុកអង្គស្នួល បានបន្តថា ក្រោយពេលកើតមានករណីឃាតកម្មបែបនេះកើតឡើងភ្លាម លោកឧត្ដមសេនីយ៍ទោ អ៊ាវ ចំរើន ស្នងការនគរបាលខេត្ដកណ្ដាល បានបញ្ជាាឲ្យមន្ត្រីជំនាញ នៃអធិការដ្ឋាននគរបាលស្រុកអង្គស្នួល និងមន្ត្រីជំនាញ នៃការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តកណ្ដាល សហការគ្នាស្រាវជ្រាវ រហូតកំណត់បាននូវមុខសញ្ញារបស់ជនសង្ស័យ។ ប៉ុន្តែជននេះ បានរត់គេចខ្លួនពីលំនៅឋានរបស់ខ្លួនទៅសំងំលាក់ខ្លួន នៅក្នុងផ្ទះប្អូនរបស់គេ នៅក្នុងភូមិស្វាយជ្រំ ឃុំស្វាយជ្រំ ស្រុកខ្សាច់កណ្តាល ខេត្តកណ្តាល។ បន្ទាប់មក មន្ត្រីជំនាញខេត្ត ស្រុកអង្គស្នួល បានចុះទៅសុំកិច្ចសហការជាមួយនឹងនគរបាលស្រុកខ្សាច់កណ្ដាល។ ប៉ុន្តែនៅពេលសមត្ថកិច្ចចុះទៅដល់ គឺជនសង្ស័យបានដឹងខ្លួនមុន ក៏រត់គេចខ្លួនចេញភូមិស្វាយជ្រំ ឃុំស្វាយជ្រំ ស្រុកខ្សាច់កណ្តាល ខេត្តកណ្តាល។
មន្ត្រីនគរបាលដដែល បានបន្តថា ដោយសារសមត្ថកិច្ចនគរបាលស្រុកអង្គស្នួល និងការិយាល័យនគរបាលព្រហ្មទណ្ឌកម្រិតធ្ងន់ខេត្តកណ្តាល សហការជាមួយកម្លាំងនគរបាលស្រុកខ្សាច់កណ្តាល ក៏បានស្វែងរក រហូតចាប់ខ្លួនបាន កាលពីថ្ងៃទី១៣ ខែមករា ឆ្នាំ២០១៨ នៅក្នុងឃុំស្វាយជ្រំ ស្រុកខ្សាច់កណ្តាល ខេត្តកណ្ដាល ហើយនាំមកកាន់អធិការដ្ឋាននគរបាលស្រុកអង្គស្នួល ដើម្បីបន្តនីតិវិធី។
នៅចំពោះមុខសមត្ថកិច្ច ជនសង្ស័យបានសារភាពថា មុនពេលកើតមាននូវអំពើឃាតកម្មនោះ គឺស្ដ្រីរងគ្រោះបានទៅផ្លាស់គោនៅឯវាលស្រែ នៅខាងជើងភូមិ ហើយបានឃើញរូបគេ និងក្មេងៗអាយុចន្លោះពី១៤-១៥ឆ្នាំ កំពុងប្រើប្រាស់ថ្នាំញៀន នៅក្នុងគុម្ពោតព្រៃ។ ឃើញបែបនេះ ស្ដ្រីរងគ្រោះបានស្រែកឡូឡា និងស្ដីឲ្យពួកខ្លួន។ ភ្លាមៗនេះ ក្មេងៗបានរត់គេចខ្លួនចេញទៅអស់ ហើយនៅសល់តែរូបគេម្នាក់ឯង ក៏កើតមានចិត្តខឹងសម្បា ដើរសំដៅវាយតប់ និងយកក្រមារឹតកសម្លាប់ជនរងគ្រោះ រួចអូសសាកសពរបស់ជនរងគ្រោះ យកទៅលាក់នៅក្នុងគុម្ពោតព្រៃ ដែលមានចម្ងាយពីកន្លែងកើតហេតុប្រហែល ៤៥ម៉ែត្រ រួចគេចខ្លួនបាត់។
ក្រោយទទួលបានចម្លើយសារភាពបែបនេះ សមត្ថកិច្ចក៏បានកសាងសំណុំរឿងបញ្ជូនជនសង្ស័យទៅកាន់សាលាដំបូង ដើម្បីចាត់ការតាមច្បាប់៕