ខេត្តព្រះសីហនុ៖ ជនជាតិមួយក្រុមបានព័ទ្ធវង់ផឹកស៊ីរហូតស្រវឹងជោកជាំ ស្រាប់តែទាស់ពាក្យសម្ដីគ្នា ស្រែកឡូឡា រត់ទៅទាញដំបង កៅអី និងកាំបិត ដេញកាប់គ្នាផ្អើលដល់ប្រជាពលរដ្ឋ រស់នៅជិតខាង រាយការណ៍ទៅសមត្ថកិច្ចឲ្យចុះមកឃាត់ខ្លួនបានចំនួន២នាក់ កាលពីវេលាម៉ោងជាង៧យប់ ថ្ងៃទី១៥ ខែមករា ឆ្នាំ២០១៨ នៅក្នុងក្រុងព្រះសីហនុ។
មន្ត្រីនគរបាលក្រុងព្រះសីហនុ បានឲ្យដឹងថា មុនពេលឃាត់ខ្លួនជនជាតិចិនទាំងនេះ ប្រជាពលរដ្ឋរស់នៅក្នុងមូលដ្ឋាន បានរាយការណ៍មកសមត្ថកិច្ចថា ជារៀងរាល់ថ្ងៃ ពួកគាត់តែងតែឃើញជនជាតិជាច្រើននាក់ ចេញចូលទាំងយប់ទាំងថ្ងៃ នៅក្នុងផ្ទះកើតហេតុខាងលើ ហើយពួកគេតែងតែស៊ីផឹក ស្រែកឡូឡារំខានដល់ការរស់នៅរបស់អ្នកជិតខាត។ លុះមកដល់ព្រលប់ ថ្ងៃទី១៥ ខែមករា ឆ្នាំ២០១៨ នេះ ជនជាតិចិនទាំងនោះបាននាំគ្នាផឹកស៊ីជល់កែវគ្នាចុះឡើង លុះបន្តិចក្រោយមក ស្រាប់តែឮពួកគេស្រែកឈ្លោះប្រកែកគ្នាយ៉ាងខ្លាំង ហើយវាយប្រតាយប្រតប់គ្នា អ្នកខ្លះរត់ទៅទាញកាន់ដំបង អ្នកខ្លះកាន់កៅអី និងអ្នកខ្លះកាន់កាំបិត និងមួយចំនួនទៀតបានរត់ស្ទុះចេញមកខាងក្រៅផ្ទះ បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះមកធ្វើអន្តរាគមន៍ ចាប់បញ្ជូនទៅកាន់ស្នងការដ្ឋាននគរបាលខេត្ត។
ដោយឡែកសន្តិសុខឯកជនដែលប្រចាំការ នៅផ្ទះជួលនោះ បានឲ្យដឹងថា ការវាយតប់គ្នានេះ តាមពិតវាគ្មានរឿងអ្វីធំដុំនោះទេ ហើយករណីនេះ គឺកើតឡើងដោយសារការប៉ាវផឹកស្រា និងវាយក្បាលគ្នាលេង ប៉ុន្តែដោយសារពួកគេស្រវឹងរៀងៗខ្លួន ទើបកើតជារឿងវាយតប់គ្នាបែបនេះតែម្តងទៅ៕