ខេត្តស្ទឹងត្រែង៖ បុរសម្នាក់បានអួតអាង ជាអ្នកសារព័ត៌មាន ហើយយកចិញ្ចៀនក្លែងក្លាយទៅបញ្ចាំ ក៏ត្រូវម្ចាស់ហាងប្ដឹងទៅសមត្ថកិច្ចឲ្យចាប់ខ្លួន កាលពីថ្ងៃទី១៥ ខែមករា ឆ្នាំ២០១៨ នៅក្នុងផ្សារសាមគ្គី ស្ថិតក្នុងភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង ហើយមន្ត្រីជំនាញបានកសាងសំណុំរឿងបញ្ជូនកាន់តុលាការ នៅព្រឹក ថ្ងៃទី១៦ ខែមករានេះ។
មន្រ្ដីការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តស្ទឹងត្រែង ជនសង័្សយដែលសមត្ថកិច្ចឃាត់ខ្លួនជាប់ពាក់ព័ន្ធនឹងករណីឆបោកនោះ ឈ្មោះ វ៉ាន់ សំណាង អាយុ៤៧ឆ្នាំ មានលំនៅក្នុងភូមិកណ្តាល ឃុំសណ្តារ ស្រុកលើកដែក ខេត្តកណ្តាល។ បើតាមប័ណ្ណសម្គាល់ខ្លួនរបស់ជននេះ គឺគេជាបុគ្គលិករបស់សារព័ត៌មានអង្គភាពតាព្រហ្ម មានឋានៈជាជំនួយការចាងហ្វាង។
មន្ត្រីនគរបាលដដែល បានបន្តថា កាលពីថ្ងៃទី១៥ ខែមករា ឆ្នាំ២០១៨ ជនសង័្សយបានយកចិញ្ចៀនក្លែងក្លាយទៅបញ្ចាំ នៅក្នុងហាងមួយកន្លែង នៅក្នុងផ្សារសាមគ្គី ស្ថិតក្នុងភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង។ ប៉ុន្តែនៅពេលនោះ ម្ចាស់ហាងបានពិនិត្យចុះឡើង ក៏ដឹងថាជាចិញ្ចៀនក្លែងក្លាយ ទើបគាត់ប្ដឹងមកសមត្ថកិច្ចឲ្យចុះទៅឃាត់ខ្លួនជនសង័្សយ ដោយចោទប្រកាន់ពីបទឆបោក។
ក្រោយពេលឃាត់ខ្លួនរួច សមត្ថកិច្ចបានបញ្ជូនជនសង័្សយមកកាន់ស្នងការដ្ឋាននគរបាលខេត្ត ហើយមន្រ្ដីជំនាញបានកសាងសំណុំរឿង បញ្ជូនទៅតុលាការ នៅព្រឹកថ្ងៃទី១៦ ខែមករានេះ ដើម្បីចាត់ការតាមច្បាប់៕