ភ្នំពេញ៖ ទីស្តីការគណៈរដ្ឋមន្ត្រីបានចេញលិខិតអនុញ្ញាតឲ្យបង្កើតក្រុមហ៊ុនថ្មីមួយ រវាងក្រុមហ៊ុនឯកជនក្នុងស្រុករបស់លោកឧកញ៉ា ពុង ខៀវសែ និងរដ្ឋាភិបាល ដើម្បីសាងសង់អាកាសយានដ្ឋានអន្តរជាតិ នៅក្នុងទឹកដីចន្លោះក្រុងតាខ្មៅ និងស្រុកកណ្តាលស្ទឹង ខេត្តកណ្តាល លើទំហំដី២៦០០ហិកតារ ដោយបោះទុនវិនិយោគ សរុប១៥០០លានដុល្លារសហរដ្ឋអាមេរិក។
យោងតាមលិខិតអនុញ្ញាតរបស់ទីស្តីការគណៈរដ្ឋមន្ត្រីនេះ ចុះហត្ថលេខាដោយលោក តឹក រ៉េត សំរេច រដ្ឋលេខាធិការទីស្តីការគណៈរដ្ឋមន្ត្រី ចុះ ថ្ងៃទី២១ ខែធ្នូ ឆ្នាំ២០១៧ ហើយត្រូវបានគេចែកផ្សាយ នៅថ្ងៃទី១២ ខែមករា ឆ្នាំ២០១៨។ នៅក្នុងលិខិតនោះបានជម្រាបជូនលោកទេសរដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព្រមទាំងរដ្ឋលេខាធិការ នៃរដ្ឋលេខាធិការដ្ឋានអាកាសចរស៊ីវិល ដោយបានលើកឡើង ពីកម្មវត្ថុស្តីពីករណីស្នើសុំគោលការណ៍អនុញ្ញាតបង្កើត “ក្រុមហ៊ុន ខេមបូឌា អ៊ែរផត អ៊ិនថេសមិន ខូអិលធីឌី ( Cambodia Airport Investment Co., Ltd )” គឺជាក្រុមហ៊ុនភាពជាដៃគូវិនិយោគ រវាងវិស័យសាធារណៈ និងឯកជន (PPP) ។ ការអនុញ្ញាត ឲ្យក្រុមហ៊ុនថ្មីសាងសង់ព្រលានយន្តហោះនេះ គឺធ្វើឡើង ដោយយោងតាមចំណាររបស់សម្តេចនាយករដ្ឋមន្ត្រី ហ៊ុនសែន ចុះ ថ្ងៃទី១៤ ខែធ្នូ ឆ្នាំ២០១៧។
លិខិតដដែលនេះ បានបញ្ជាក់ថា រាជរដ្ឋាភិបាលបានឯកភាពលើការបង្កើត” ក្រុមហ៊ុនខេមបូឌា អ៊ែរផត អ៊ិនថេសមិន ខូអិលធីឌី ( Cambodia Airport Investment Co., Ltd ) ក្នុងគោលបំណងអភិវឌ្ឍ សាងសង់អាកាសយានដ្ឋានអន្តរជាតិ លំដាប់ថ្នាក់ 4F ដែលមានទីតាំងស្ថិតក្នុងទឹកដីក្រុងតាខ្មៅ និងស្រុកកណ្តាលស្ទឹង ខេត្តកណ្តាល លើទំហំដី ចំនួន២៦០០ហិកតារ ជាមួយនឹងទុនវិនិយោគ សរុប ១៥០០លានដុល្លារសហរដ្ឋអាមេរិក។
ទីស្តីការគណៈរដ្ឋមន្ត្រី បានបញ្ជាក់ថា ទុនវិនិយោគ ដើម្បីសាងសង់ព្រលានយន្តហោះថ្មីនេះ មានទំហំទឹកប្រាក់សរុប១៥០០លានដុល្លារសហរដ្ឋ អាមេរិក ដែលទឹកប្រាក់ទាំងនេះបានមកពីកម្ចីធនាគារបរទេស ចំនួន១១០០លានដុល្លារដុល្លារសហរដ្ឋអាមេរិក កម្ចីពីភាគទុន OCIC ២៨០លានដុល្លារសហរដ្ឋអាមេរិក និងដើមទុនចុះបញ្ជី ១២០លានដុល្លារសហរដ្ឋអាមេរិក។ ក្នុងនោះក្រុមហ៊ុន OCIC មាន៩០% និងរដ្ឋលេខាធិការដ្ឋានអាកាសចរស៊ីវិល តំណាងឲ្យរាជរដ្ឋាភិបាលកម្ពុជា មាន១០%។
លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៉ីវិល ធ្លាប់បានប្រាប់ប្រព័ន្ធផ្សព្វផ្សាយក្នុងស្រុកថា ដោយសារតែកំណើននៃការធ្វើដំណើរតាមផ្លូវអាកាស បានបន្តកើនឡើង ពីមួយឆ្នាំទៅមួយឆ្នាំ ហើយនៅឆ្នាំ២០២៥ខាងមុខនេះ អាកាសយានដ្ឋានអន្តរជាតិភ្នំពេញ មិនអាចពង្រីកសមត្ថភាពរបស់ខ្លួនបន្តទៀតបានឡើយ ជាមួយកត្តាចង្អៀត នៃការស្ទះចរាចរណ៍ ដែលនាំឲ្យរាំងស្ទះដល់វិស័យអាកាសចរណ៍ផងដែរនោះ ទើបរាជរដ្ឋាភិបាលកម្ពុជា មានទស្សនវិស័យថា នឹងសាងសង់នូវព្រលានយន្តហោះអន្តរជាតិថ្មីមួយទៀត។ ប៉ុន្តែពេលនោះអ្នកនាំពាក្យរូបនេះ មិនបានបញ្ជាក់ពីទីតាំង និងក្រុមហ៊ុនដែលនឹងត្រូវទទួលបានសិទ្ធិសាងសង់ព្រលានយន្តហោះថ្មីនេះ នៅឡើយទេ ដោយលោកលើកឡើងថា វាស្ថិតនៅក្នុងគោលនយោបាយរបស់រាជរដ្ឋាភិបាល។
លោកស៊ីន ចាន់សិរីវុត្ថា បានបន្តថា បន្ទាប់ពីទទួលបានព័ត៌មានថា រាជរដ្ឋាភិបាលកម្ពុជាចង់សាងសង់អាកាសយានដ្ឋានថ្មីនោះ ក្រុមហ៊ុនអាកាសយានដ្ឋានកម្ពុជា ដែលជាក្រុមហ៊ុនរបស់បារាំងទទួលបានសិទ្ធិវិនិយោគលើព្រលានយន្តហោះនៅកម្ពុជា បច្ចុប្បន្នបានជួលអ្នកជំនាញការមកពីបារាំង ដើម្បីឲ្យសិក្សាលើគម្រោងការសាងសង់ថា គួរធ្វើនៅម្តុំណា ដើម្បីឲ្យប៉ះពាល់ដល់បរិស្ថាន និងសង្គមតិចបំផុត ហើយងាយស្រួល ក្នុងការធ្វើដំណើរទៅកាន់ព្រលានយន្តហោះនោះ។
បច្ចុប្បន្ន កម្ពុជាមានព្រលានយន្តហោះអន្តរជាតិ ចំនួន៣ គឺព្រលានយន្តហោះអន្តរជាតិភ្នំពេញ ព្រលានយន្តហោះអន្តរជាតិសៀមរាប និងព្រលានយន្តហោះអន្តរជាតិខេត្តព្រះសីហនុ។
ក្នុងអំឡុងពេលដំណើរទស្សនកិច្ចរបស់លោក លឺ ខឺឈាង នាយករដ្ឋមន្ត្រីចិន នៅក្នុងរាជធានីភ្នំពេញ ចាប់ពីថ្ងៃទី១០-១២ ខែមករា ឆ្នាំ២០១៨ នេះ ក៏មានការរៀបចំពិធីចុះហត្ថលេខាជាមួយនឹងសម្ដេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការសម្រេចយកប្លង់ស្ថាបត្យកម្មណាមួយ នៃប្លង់ស្ថាបត្យកម្មស្ថាបនាព្រលានយន្តហោះថ្មី នៅខេត្តសៀមរាបផងដែរ។
ព្រលានយន្តហោះថ្មី នៅខេត្តសៀមរាបនេះ គ្រោងនឹងស្ថាបនានៅលើផ្ទៃដី ទំហំជាង៧០០ហិកតារ ដោយបោះទុនវិនិយោគលើទឹកប្រាក់ ៨៨០លានដុល្លារអាមេរិក ក្រោមការវិនិយោគរបស់ក្រុមហ៊ុន YUNAN Development Group ដែលជាក្រុមហ៊ុនដ៍ធំមួយ មានមូលដ្ឋាននៅក្នុងប្រទេសចិន ។
ការសាងសង់ព្រលានយន្តហោះអន្តរជាតិថ្មីនេះ មានទីតាំងស្ថិតនៅក្នុងស្រុកសូទ្រនិគម ខេត្តសៀមរាប ដែលការស្ថាបនាព្រលាននេះ ក្នុងបំណងជួយជំរុញកំណើនសេដ្ឋកិច្ច និងភ្ញៀវទេសចរអន្តរជាតិមកទស្សនាកម្ពុជាបន្ថែមទៀត ពិសេសជាការទាក់ទាញក្រុមហ៊ុនអាកាសចរណ៍ធំៗ មកចុះចតនៅកម្ពុជា ដោយសារសមត្ថភាពព្រលានយន្តហោះថ្មីនេះ អាចអនុញ្ញាតឲ្យយន្តហោះខ្នាតធំចុះចតបាន។
បើយោងតាមរបាយការណ៍របស់ក្រសួងទេសចរណ៍ បានឲ្យដឹងថា ភ្ញៀវទេសចរអន្តរជាតិ ដែលធ្វើដំណើរមកកម្ពុជា តាមផ្លូវអាកាស មានចំនួន១ ១៣៣ ៩៤០នាក់ នៅរយៈពេល៥ខែ នាដើមឆ្នាំ២០១៧កន្លងទៅនេះ៕
