រាជធានីបាងកក៖ អ្នកគ្រូពេទ្យជនជាតិថៃវ័យក្មេងម្នាក់ បម្រើម្នាក់ការងារ នៅក្នុងមណ្ឌលសុខភាពមួយកន្លែង នៅក្នុងខេត្តឈៀងរ៉ាយ ប្រទេសថៃ បានសហការគ្នាជាមួយប្រុសស្នេហ៍ជួញដូរថ្នាំញៀន ក៏សមត្ថកិច្ចថៃចាប់ខ្លួន រួមជាមួយនឹងយ៉ាម៉ាចំនួន៨០០០០០គ្រាប់ កាលពីវេលាម៉ោង១១ និង៤៥នាទីព្រឹក ថ្ងៃទី១០ ខែមករា ឆ្នាំ២០១៨ នៅត្រង់ប៉ុស្តិ៍ត្រួតពិនិត្យយានយន្តគ្រប់ប្រភេទមួយកន្លែង ស្ថិតក្នុងស្រុកម៉ែតាំ ខេត្តផាក់យ៉ៅ។
ប្រភពព័ត៌មានពីសមត្ថកិច្ចថៃ បានឲ្យដឹងថា មុនពេលឃាត់ខ្លួន សមត្ថកិច្ចថៃបានដាក់កម្លាំងនៅតាមគោលដៅរបស់ខ្លួនឈរជើង លុះមកដល់វេលាខាងលើ ក៏ប្រទះឃើញអ្នកគ្រូពេទ្យវ័យម្នាក់បានបើករថយន្តឆ្លងកាត់ប៉ុស្ដិ៍ត្រួតពិនិត្យរបស់សមត្ថកិច្ច។ នៅពេលនោះ សមត្ថកិច្ចក៏សុំអ្នកបើកបរឲ្យឈប់ ដើម្បីត្រួតពិនិត្យ ក៏រកឃើញនៅក្នុងគូទរថយន្ត មានកាបូបស្ពាយចំនួន៣។ ភ្លាមៗនោះ សមត្ថកិច្ចបានឆែកឆេរមើល ស្រាប់តែប្រទះឃើញមានថ្នាំញៀន ប្រភេទយ៉ាម៉ា សរុបចំនួន ៣៨០ ០០០ គ្រាប់ ទើបសមត្ថកិច្ចឃាត់ខ្លួន នាំយកទៅសាកសួរ។
ប្រភពព័ត៌មានដដែល បានបន្តថា បន្ទាប់ពីសាកសួរចម្លើយជាជំហានដំបូងភ្លាម ជនសង្ស័យ(អ្នកគ្រូពេទ្យ)បានឆ្លើយសារភាពប្រាប់សមត្ថកិច្ចថៃថា នាង និងសង្សាររបស់នាងបានរកស៊ីជួញដូរថ្នាំញៀន ដោយយកថ្នាំញៀនទាំងនេះចេញពីខេត្តឈៀងរ៉ាយ ហើយពួកនាងទាំង២នាក់បានចែកមុខសញ្ញាគ្នាជា២ គឺរូបនាងផ្ទាល់ត្រូវយកថ្នាំញៀនចំនួន៣៨០០០០គ្រាប់ទៅចែកចាយនៅខេត្តព្រែ ខេត្តត្រាត និងខេត្តរ៉ាំងស៊ីត។ ដោយឡែកសង្សាររបស់នាងត្រូវដឹកថ្នាំញៀនចំនួន៤២០០០០គ្រាមតាមរថយន្តណាវ៉ារ៉ា យកទៅក្រុងបាងកក។ លុះពេលនាងបើករថយន្តមកដល់ចំណុចខាងលើក៏ត្រូវសមត្ថកិច្ចចាប់ខ្លួន រួមជាមួយនឹងវត្ថុតាងតែម្ដង។
ប្រភពព័ត៌មានដដែល បានបន្តថា យោងតាមចម្លើយនេះ សមត្ថកិច្ចថៃក៏បានទាក់ទងទៅកាន់ស្ថានីយប៉ូលិសផ្សេងៗទៀត ដើម្បីតាមចាប់បុរសស្នេហ៍របស់អ្នកគ្រូពេទ្យដែលកំពុងដឹកថ្នាំញៀនឆ្ពោះទៅកាន់ទីក្រុងបាងកក។ បន្ទាប់ពីមានសេចក្ដីរាយការណ៍បែបនេះ សមត្ថកិច្ចក៏ចាប់ស្ទាក់ផ្លូវ ហើយក៏ចាប់ខ្លួនសង្សាររបស់អ្នកគ្រូពេទ្យខាងលើ នៅក្នុងស្រុកង៉ាវ ខេត្តឡាំប៉ាង ប្រទេសថៃ រួមជាមួយនឹងថ្នាំញៀន ចំនួន៤២០០០០គ្រាប់។
តាមផែនការរបស់ពួកគេ គឺអ្នកគ្រូពេទ្យនឹងធ្វើដំណើរទៅសម្រាកជាមួយមិត្តប្រុស នៅក្នុងសណ្ឋាគារមួយកន្លែង នៅក្នុងខេត្តឈៀងរ៉ាយ ដោយដឹកថ្នាំញៀនចំនួន ៣៨០ ០០០ គ្រាប់។ ប៉ុន្តែផែនការទាំង២មុខព្រួញនេះ ក៏អស់លក្ខណ៍ត្រូវសមត្ថកិច្ចក្របួចជាប់ រួមជាមួយនឹងថ្នាំញៀនចំនួន៨សែនគ្រាប់។
ក្រោយពេលឃាត់ខ្លួនរួចមក សមត្ថកិច្ចថាបាននាំជនសង្ស័យទាំង២នាក់ទៅសាកសួរ និងកសាងសំណុំរឿងបញ្ជូនទៅតុលាការ ដើម្បីផ្ដន្ទាទោសតាមច្បាប់៕