ខេត្តមណ្ឌលគិរី៖ បុរសម្នាក់បើករថយន្តកែច្នៃដំឡូងចេញពីចម្ការ ចុះពីចំណោត ស្រាប់តែក្រឡាប់ផ្ងារជើងទ្រមេឃ បង្កឲ្យភ្ញាក់ផ្អើលឡើង ដល់ប្រជាពលរដ្ឋ រត់ទៅជួយយកអាសា កាលពីវេលាម៉ោង៨ព្រឹក ថ្ងៃទី១១ ខែមករា ឆ្នាំ២០១៨ នៅជិតព្រំដែនកម្ពុជា-វៀតណាម ត្រង់ចំណុចប៉ុស្តិ៍ការពារព្រំដែនអូរជុំ ស្ថិតក្នុងភូមិអូរអាម ឃុំស្រែខ្ទុម្ព ស្រុកកែវសីមា។
មន្រ្ដីនគរបាលមូលដ្ឋាន បានឲ្យដឹងថា ជនរងគ្រោះ ឈ្មោះ ឆែ វុន អាយុ៣៧ឆ្នាំ មានលំនៅក្នុងភូមិស្បែកគី ឃុំកណ្តោលជ្រំ ស្រុកពញាក្រែក ខេត្តត្បូងឃ្មុំ។ មុនពេលកើតហេតុ ជនរងគ្រោះបានបើករថយន្តច្នៃដឹកដំឡូង ចេញពីចម្ការ ដើម្បីយកទៅលក់ឲ្យស្តង់ទទួលទិញដែលមានចម្ងាយពីកន្លែងកើតហេតុ ប្រហែល១០គីឡូម៉ែត្រ។ លុះពេលជនរងគ្រោះបើកចុះចេញពីចម្ការបានបន្តិច ដែលជាកន្លែចំណោត បណ្ដាលឲ្យរថយន្តក្រឡាប់ផ្ងារជើងទ្រមេឃ បណ្ដាលឲ្យអ្នកបើកបររងរបួសធ្ងន់។
ក្រោយពេលកើតហេតុ សាច់ញាតិ និងក្រុមគ្រួសារបានដឹកជនរងគ្រោះបញ្ជូនទៅសង្រ្គោះ នៅក្នុងមន្ទីរពេទ្យ នៃប្រទេសវេៀតណាម៕