ប្រទេសថៃ៖ ពលករខ្មែម្នាក់ទៅបម្រើការងារ នៅក្នុងប្រទេសថៃ បានផឹកស៊ីជាមួយនឹងជនជាតិខ្មែរដូចគ្នា ស្រាប់តែទាស់ពាក្យសម្ដីគ្នាជាមួយនឹងជនជាតិថៃ ក៏ត្រូវជននោះទាញបុ័ងតោ កាប់ស្លាប់ នៅក្នុងថ្លុកឈាម បង្កឲ្យភ្ញាក់ផ្អើលឡើង កាលពីវេលាម៉ោង៧ និង៣០ នាទីយប់ ថ្ងៃទី២៦ ខែធ្នូ ឆ្នាំ២០១៧ នៅខាងមុខអគារស្នាក់នៅរបស់កម្មកររបស់ក្រុមហ៊ុនអ៊ីតាលៀនថៃ ឌីវើលុបភើមេន ក្បែរច្រកចូលសណ្ឋាគារប៉ាធុមផាឡាស់ ស្ថិតក្នុងឃុំបានម៉ៃ ស្រុកមឿង ខេត្តប៉ាធុមថានី ប្រទេសថៃ។
បើតាមសេចក្ដីរាយការណ៍ពីសមត្ថកិច្ចថៃ បានឲ្យដឹងថា ជនរងគ្រោះនៅក្នុុងអំពើឃាតកម្មនោះ ឈ្មោះ ធុច ចង្រិត ភេទប្រុស អាយុ៣៧ឆ្នាំ ជាពលករខ្មែរ។ នៅកន្លែងកើតហេតុ គេសង្កេតឃើញមានកម្មករជាច្រើននាក់ បានឈរចោមរោមមើលសពពលករខ្មែរម្នាក់ ដែលបានដេកស្លាប់ស្តូកស្តឹង នៅក្នុងថ្លុកឈាម។ ក្រោយពេលកើតហេតុ សមត្ថកិច្ចថៃបានចុះទៅពិនិត្យសព រកឃើញមានស្នាមកាប់នឹងវត្ថុមុតស្រួចចំនួន២កន្លែង គឺក្បាលផ្នែកខាងក្រោយមួយកន្លែង និងដៃស្តាំមួយកន្លែង។
ប្រភពព័ត៌មានដដែល បានបន្តថា មុនពេលកើតមាននូវអំពើឃាតកម្មនោះ ជនរងគ្រោះ និងមិត្តភក្ដិរបស់គេម្នាក់ទៀតដែលជាជនជាតិខ្មែរបាននាំគ្នាផឹកស្រា នៅមុខបន្ទប់របស់ពួកគេស្នាក់នៅ។ លុះពេលពួកគេស្រវឹង ទំនងជាមានការទាស់សម្តីគ្នា ហើយត្រូវភាគីម្ខាងទៀតទាញកាំបិតបុ័ងតោ កាប់ប្រហារទៅលើជនរងគ្រោះ បណ្ដាលឲ្យស្លាប់យ៉ាងអណោចអធ័ម នៅក្នុងថ្លុកឈាម។
បើតាមសម្ដីរបស់អ្នកស្រី សិរីផាន់ សែនផាប អាយុ៤៩ឆ្នាំ បានឲ្យដឹងថា មុនពេលមានការភ្ញាក់ផ្អើលពីករណីអំពើឃាតកម្មនោះ គាត់កំពុងឈរជជែកគ្នាលេងជាមួយនឹងអ្នកគ្រប់គ្រងអគារស្នាក់នៅរបស់កម្មករ នៅឯប៉ុស្តិ៍យាមខាងមុខ។ លុះបន្តិចក្រោយមក គាត់បានឃើញពលករខ្មែរម្នាក់(ជនសង្ស័យ) ស្លៀកខោជើងវែង ពាក់អាវដៃវែង ពណ៌ខៀវ គ្មានពាក់ទ្រនាប់ជើង ដើរចេញមកក្រៅ ដោយបានប្រាប់អ្នកយាម និងគាត់ថា សុំទៅទិញសាច់ក្លែមនៅខាងក្រៅមួយភ្លែត។ រីឯជននោះក៏គេចខ្លួនបាត់រហូត ទើបក្រោយមកក៏ដឹងថា មានករណីឃាតកម្មបែបនេះកើតឡើងតែម្ដង។
ក្រោយពេលកើតហេតុ សមត្ថកិច្ចថៃបានចុះទៅពិនិត្យ និងស្រាវជ្រាវស្វែងរកអត្តសញ្ញាណ ដើម្បីរៀបចំបញ្ជូនសាកសពមកឲ្យក្រុមគ្រួសារ និងសាច់ញាតិ នៅឯប្រទេសកម្ពុជាវិញ។ ដោយឡែកជនសង្ស័យវិញ គឺសមត្ថកិច្ចថៃបានស្គាល់សាវតារច្បាស់ហើយ និងកំពុងតាមរកចាប់ខ្លួន នាំទៅផ្តន្ទាទោសតាមផ្លូវច្បាប់៕