ខេត្តកណ្ដាល៖ រថយន្តបែនមួយគ្រឿងបើកបោះពួយយ៉ាងលឿន ស្រាប់តែរេចង្កូតទៅបុកម៉ូតូពេញទំហឹង ខ្ទាតទាំងម៉ូតូ និងមនុស្សបោកទៅលើថ្នល់ បណ្ដាលឲ្យស្លាប់យ៉ាងអណោចអធ័មចំនួន៤នាក់ បង្កឲ្យភ្ញាក់ផ្អើលឡើង កាលពីវេលាម៉ោង៤ និង៣០នាទីល្ងាច ថ្ងៃទី២៤ ខែធ្នូ ឆ្នាំ២០១៧ នៅលើដងផ្លូវជាតិលេខ៤១ ត្រង់ចន្លោះគីឡូម៉ែត្រលេខ១-២ ស្ថិតក្នុងភូមិព្រៃគោ ឃុំលំហាច ស្រុកអង្គស្នួល។
មន្ត្រីនគរបាលចរាចរស្រុកអង្គស្នួល បានឲ្យដឹងថា រថយន្តបែនបង្ក ម៉ាកនីស្សាន់ ពណ៌ទឹកប៊ិក ពាក់ស្លាកលេខ តាកែវ 3A-2777 បើកបរដោយឈ្មោះ សេង ចាន់ឌឿន ភេទប្រុស អាយុ២៣ឆ្នាំ មុខរបរបើកបររថយន្ត មានលំនៅក្នុងភូមិត្រពាំងស្យា ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ់។ រីឯម៉ូតូរងគ្រោះ ម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1CW-4614 បើកបរដោយឈ្មោះ ម៉ន ជីមី ភេទប្រុស អាយុ២៦ឆ្នាំ មុខរបជាកម្មករ (ពាក់មួកសុវត្ថិភាព) និងអ្នករួមដំណើរជាមួយចំនួន៣នាក់ រួមមាន ទី១-ឈ្មោះ ហៀង គឹមសាន ភេទស្រី អាយុ២៤ឆ្នាំ មុខរបរជាកម្មការិនី (ត្រូវជាប្រពន្ធ ពាក់មួកសុវត្ថិភាព) ទី២-ឈ្មោះ ម៉ន សម្បត្តិ អាយុ២ឆ្នាំ (ត្រូវជាកូន) និងទី៣-ឈ្មោះ ខេម ស្រីម៉ី អាយុ៩ឆ្នាំ ត្រូវជាក្មួុយ( ពាក់មួកសុវត្ថិភាព)។ ជនរងគ្រោះទាំងបួន មានលំនៅក្នុងភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល។
ប្រភពព័ត៌មាន បានឲ្យដឹងថា មុនពេលកើតមាននូវគ្រោះថ្នាក់ចរាចរណ៍ដ៏រន្ធត់នោះ គេឃើញបុរសរងគ្រោះបើកម៉ូតូ ម៉ាកហុងដាឌ្រីម(មានកញ្ចក់) ដឹកប្រពន្ធ កូន និងក្មួយ តាមបណ្ដោយផ្លូវជាតិលេខ៤១ ក្នុងទិសដៅពីត្បូងទៅជើង (កំពង់ត្រាំទៅថ្នល់ទទឹង) បញ្ច្រាសទិសគ្នាជាមួយនឹងរថយន្តបង្ក បើកបោះពួយយ៉ាងលឿន។ លុះពេលរថយន្តបើកមកដល់ចំណុចកើតហេតុ ស្រាប់តែរេចង្កូតទៅបុកម៉ូតូពេញទំហឹង ខ្ទាតទាំងម៉ូតូ និងមនុស្សបោកទៅលើថ្នល់ បណ្ដាលឲ្យជនរងគ្រោះទាំង៤នាក់ ស្លាប់បាត់បង់ជីវិតយ៉ាងអណោចអធ័មមួយរំពេច។
មន្ត្រីនគរបាលចរាចរដដែល បានបន្តថា បន្ទាប់កើតហេតុភ្លាម សមត្ថកិច្ចក៏បានចុះទៅឃាត់ខ្លួនអ្នកបើកបររថយន្តបង្ក ហើយនាំទៅកាន់អធិការដ្ឋាននគរបាល និងធ្វើតេស្តទឹកនោម ដោយពុំមានសារធាតុញឿននៅក្នុងខ្លួននោះទេ។ សមត្ថកិច្ចបានសន្និដ្ឋានថា ករណីនេះអាចបណ្តាលមកពីអ្នកបើកបររថយន្តមិនប្រកាន់ស្ដាំ ហើយអ្នកបើកបរម៉ូតូបើកបរក្នុងល្បឿនលឿន វ៉ាជែងក្នុងស្ថានភាពគ្រោះថ្នាក់។
ក្រោយពេលកើតហេតុ សមត្ថកិច្ចបានយករថយន្តទៅរក្សាទុក នៅក្នុងអធិការដ្ឋាននគរបាលស្រុក ដើម្បីរង់ចាំដោះស្រាយតាមផ្លូវច្បាប់ និងប្រគល់សាកសពជនរងគ្រោះទៅឲ្យសាច់ញាតិដឹកទៅធ្វើបុណ្យតាមប្រពៃណី៕
