ភ្នំពេញ៖ យោងតាមសេចក្ដីប្រកាសរបស់រដ្ឋបាលរាជធានីភ្នំពេញ កាលពីថ្ងៃទី១៥ ខែវិច្ឆិកា បានឲ្យដឹងថា រដ្ឋបាលសាលារាជធានីភ្នំពេញ គ្រោងនឹងធ្វើពិធីសូត្រមន្ត បង្សុកូល និងរាប់បាត្រប្រគេនព្រះសង្ឃ តាមទំនៀមទម្លាប់ប្រពៃណីសាសនា ដើម្បីឧទ្ទិសកុសលដល់ជនរងគ្រោះ ដែលបានស្លាប់បាត់បង់ជីវិត គម្រប់ខូប៧ឆ្នាំ (២២ វិច្ឆិកា ២០១០ – ២២ វិច្ឆិកា ២០១៧) នៅក្នុងឧបទ្ទវហេតុរត់ជាន់គ្នាលើអតីតស្ពានពេជ្រ ឆ្លងទៅកាន់ទីក្រុងកោះពេជ្រ កាលពីយប់ថ្ងៃទី២២ វិច្ឆិកា ២០១០ ដែលជាថ្ងៃទី៣ នៃព្រះរាជពិធីបុណ្យអុំទូក អកអំបុក សំពះព្រះខែ និងបណ្ដែតប្រទីប។
យោងតាមសេចក្ដីជូនដំណឹងដដែលនេះ បានបន្តថា រដ្ឋបាលរាជធានី នឹងប្រារព្ធពិធីសូត្រមន្ត បង្សុកូល និងរាប់បាត្រប្រគេនព្រះសង្ឃចំនួន១០៨អង្គ ដើម្បីឧទ្ទិសកុសលជូនវិញ្ញាណក្ខន្ធជនរងគ្រោះ ក្នុងឧបទ្ទវហេតុលើអតីតស្ពានពេជ្រ នៃទីក្រុងកោះពេជ្រ ដែលនឹងប្រព្រឹត្តទៅ នៅវេលាម៉ោង៧ព្រឹក ថ្ងៃទី២២ ខែវិច្ឆិកា ឆ្នាំ២០១៧ ខាងមុខនេះ។ សេចក្តីជូនដំណឹងនេះ ទុកដូចជាការអំពាវនាវដល់ពុទ្ធបរិស័ទ បងប្អូនប្រជារាស្រ្ដទាំងអស់ ជាពិសេសសាច់ញាតិ និងក្រុមគ្រួសារសពជនរងគ្រោះ មេត្តាចូលរួមឲ្យបានច្រើនកុះករ។
មន្ត្រីរដ្ឋបាលរាជធានីភ្នំពេញ បានបញ្ជាក់ថា ពិធីរំឭកវិញ្ញាណក្ខន្ធនេះ នឹងធ្វើនៅខាងមុខស្តូបរំឭកវិញ្ញាណក្ខន្ធរបស់ជនរងគ្រោះ ស្ថិតនៅជាប់នឹងស្ពាននាគ ទីក្រុងកោះពេជ្រ ជាទីដែលជនរងគ្រោះបានបាត់បង់ជីវិត កាលពី៧ឆ្នាំមុន។ ក្នុងពិធីនេះដែរ ក៏មានការចូលរួមពី លោក ឃួង ស្រេង អភិបាលរាជធានីភ្នំពេញ និងលោកស្រី លោក ម៉ប់ សារិន ប្រធានក្រុមប្រឹក្សារាជធានីភ្នំពេញ មន្ត្រីរាជការ អាជ្ញាធរដែនដី សាច់ញាតិក្រុមគ្រួសារបស់ជនរងគ្រោះ និងប្រជាពលរដ្ឋទៀតផងដែរ។
សូមបញ្ជាក់ថា កាលពីយប់ ថ្ងៃទី២២ ខែវិច្ឆិកា ឆ្នាំ២០១០ ជាថ្ងៃទី៣ នៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ មានឧបទ្ទវហេតុរត់ជាន់គ្នា បានកើតឡើងនៅលើស្ពានកោះពេជ្រ បណ្ដាលឲ្យមនុស្សស្លាប់៣៥៣នាក់ និងជាង៤០០នាក់ផ្សេងទៀតរងរបួស៕