ភ្នំពេញ៖ នៅព្រឹក ថ្ងៃទី១៦ វិច្ឆិកា តុលាការកំពូល បានលើកយកសំណុំរឿងបណ្ដឹង “រំលាយគណបក្សសង្គ្រោះជាតិ” ដែលបានប្ដឹងដោយក្រសួងមហាផ្ទៃ មកបើសវនការ តាមការគ្រោងទុក ហើយនៅពេលនេះដែរ អ្នកសារព័ត៌មានមកពីគ្រប់ស្ថាប័ន និងមន្ត្រីសិទ្ធិមនុស្ស កំពុងស្ថិតនៅមុខតុលាការកំពូល ដើម្បីរង់ចាំស្តាប់លទ្ធផល នៃសវនាការលើសំណុំរឿង រំលាយគណបក្សសង្គ្រោះជាតិ នេះ ។
នៅក្នុងពេល តុលាការកំពូលបើកសវនាការជាសាធារណៈលើបណ្តឹង «រំលាយបក្សសង្គ្រោះជាតិ» នេះ នៅវេលាម៉ោង០៧ និង៥០នាទីព្រឹក ថ្ងៃទី១៦ វិច្ឆិកា នេះ គេឃើញមានមេធាវីចំនួន៥នាក់ តំណាងឱ្យក្រសួងមហាផ្ទៃ បានចូលទៅស្តាប់សវនការនេះ។ ដោយឡែក មេធាវីរបស់គណបក្សសង្គ្រោះជាតិ ពុំមានវត្តមាន នៅក្នុងសវនាការនោះឡើយ។
ស្របពេល តុលាការកំពូលបានយកសំណុំរឿងបណ្ដឹង”រំលាយគណបក្សសង្គ្រោះជាតិ” នោះ អាជ្ញាធរបានដាក់ពង្រាយនូវកងកម្លាំងប្រដាប់អាវុធជាច្រើន នៅតាមគោលដៅសំខាន់ៗ នៅក្នុងរាជធានីភ្នំពេញ ជាពិសេស នៅជុំវិញតុលការកំពូល ដែលជាកន្លែងបើកសវនការជំនុំជម្រះក្ដីនោះតែម្ដង គឺក្នុងគោលបំណងការពារ និងរារាំងនូវការធ្វើបាតុកម្មណាមួយពីសំណាក់អ្នកគាំទ្រគណបក្សប្រឆាំងមួយនេះ។
នៅពេលមានការដាកពង្រាយកងកម្លាំងប្រដាប់អាវុធបែបនេះ ក៏បានធ្វើឲ្យប្រជាពលរដ្ឋមួយចំនួន រស់នៅក្នុងរាជធានីភ្នំពេញ បានសម្តែងនូវការភ័យខ្លាច និងព្រួយបារម្ភអំពីស្ថានការណ៍នយោបាយ នៅក្នុងប្រទេសកម្ពុជាផងដែរ។ ការបើកសវនាការរបស់តុលាការកំពូលលើសំណុំរឿងដ៍កក្រើក រំលាយគណបក្សសង្គ្រោះជាតិ ដែលជាបក្សប្រឆាំងដ៏ធំ និងមានប្រជាប្រិយភាពបំផុតរបស់ប្រទេសកម្ពុជានោះ រាជរដ្ឋាភិបាល ក៏បានត្រៀមកម្លាំងសមកិច្ចរួចរាល់អស់ហើយ ដើម្បីបង្ការ និងបង្ក្រាបនូវការតវ៉ាណាមួយប្រឆាំងនឹងសាលដីការបស់តុលាការកំពូល នៅថ្ងៃទី១៦ ខែវិច្ឆិកា ឆ្នាំ២០១៧នេះ។
ប្រជាពលរដ្ឋខ្លះ បានណែនាំកូនចៅមិនឲ្យចេញពីផ្ទះ ឬកុំទៅកាន់កន្លែងទីប្រជុំជន ពីព្រោះតែពួកគាត់មានការបារម្ភពីការប្រឈមមុខដាក់គ្នា រវាងកងកម្លាំងសមត្ថកិច្ចជាមួយក្រុមអ្នកគាំទ្រគណបក្សប្រឆាំង នៅក្រោយពេលតុលាការកំពូល សម្រេចប្រកាសរំលាយគណបក្សសង្គ្រោះជាតិ នេះ។
បើតាមប្រភពព័ត៌មានពីមន្ត្រីរាជការមួយចំនួន បានឲ្យដឹងថា នៅតាមក្រសួងស្ថាប័នរបស់រដ្ឋមួយចំនួន ត្រូវបានប្រធានស្ថាប័ន បានណែនាំ ឬបញ្ជាឲ្យមន្ត្រីក្រោមឱវាទរបស់ខ្លួនទៅបង្ហាញមុខ នៅតាមអង្គភាពនីមួយៗ នាព្រឹក ថ្ងៃទី១៦ ខែវិច្ឆិកា ឆ្នាំ២០១៧ ស្របពេលតុលាការកំពូលកំពុងបើកសវនាការលើសំណុំរឿង “រំលាយគណបក្សសង្គ្រោះជាតិ” ដើម្បីបញ្ចៀសនូវសកម្មភាពណាមួយរបស់មន្ត្រីរាជការ ដែលអាចនឹងមានចូលរួមជាមួយនឹងក្រុមតវ៉ាគាំទ្រគណបក្សប្រឆាំង ឬដើម្បីឲ្យប្រធានស្ថាប័ននោះកត់សម្គាល់ថា មន្ត្រីរាជការណាខ្លះ ជាសមាជិករបស់គណបក្សប្រឆាំង។
ទោះជាយ៉ាងណា គេមិនទាន់ដឹងថា តុលាការកំពូល នឹងសម្រេចលើសំណុំរឿងដ៏ចម្រូងចម្រាសនេះ យ៉ាងណានោះទេ ហើយទាំងក្រុមអ្នកសារព័័ត៌មាន និងអង្គការសិទ្ធិមនុស្សកំពុងទន្ទឹងរង់ចាំការសម្រេចរបស់តុលាការ ថាតើតុលាការរំលាយគណបក្សប្រឆាំងដ៏ធំមួយនេះ ឬក៏មិនរំលាយ?
ស្របពេលរាជរដ្ឋាភិបាលប្ដឹងសុំរំលាយគណបក្សសង្គ្រោះជាតិ នោះ ក៏បានធ្វើឲ្យបណ្ដាប្រទេសលោកខាងជាតិច្រើន ជាពិសេសសហរដ្ឋអាមេរិកបានថ្កោលទោសចំពោះចំណាត់ការនេះ ហើយថែមទាំងគំរាមដាក់ទណ្ឌកម្មសេដ្ឋកិច្ចទៀតផង។ ថ្វីបើមានការគំរាមកំហែងបែបនេះក្ដី ក៏រាជរដ្ឋាភិបាលកម្ពុជា ហាក់បីដូចជាមិនសូវអើពើប៉ុន្មានឡើយ។
ដោយឡែក អ្នកវិភាគសេដ្ឋកិច្ចមួយចំនួន បានលើកឡើងថា ប្រសិនបើសហរដ្ឋអាមេរិក និងសហភាពអឺរ៉ុបដាក់ទណ្ឌកម្មសេដ្ឋកិច្ចមែននោះ ប្រទេសកម្ពុជានឹងខាតបង់ច្រើន ហើយប្រជាពលរដ្ឋក៏នឹងប្រឈមមុខនឹងជីវភាពផងដែរ ជាពិសេសការអត់ការងារធ្វើ ប្រសិនបើក្រុមហ៊ុនមួយចំនួនដែលបានកូដតាពីសហរដ្ឋអាមេរិក ដកចេញពីកម្ពុជា៕
