ខេត្តតាកែវ៖ ជនទំនើង២នាក់ទាញកាំបិតកាប់គូទំនាស់ បណ្ដាលឲ្យរងរបួសធ្ងន់ ក៏ត្រូវសមត្ថកិច្ចឃាត់ខ្លួនបានម្នាក់ និងរត់គេចខ្លួនបាត់ម្នាក់ កាលពីវេលាម៉ោង១ និង៤៥នាទីរសៀល ថ្ងៃទី៣០ ខែតុលា ឆ្នាំ២០១៧ នៅចំណុចផ្ទះគ្មានម្ចាស់រស់នៅ ស្ថិតក្នុងភូមិដំណាក់រវៀង ឃុំពពេល ស្រុកត្រាំកក់។
លោកវរសេនីយ៍ទោ ឌុក ធីយា អធិការនគរបាលស្រុកត្រាំកក់ បានឲ្យដឹងថា ជនសង័្សយដែលជាប់ពាក់ព័ន្ធនឹងអំពើហិង្សានោះ ទី១-ឈ្មោះ មុំ បេ ភេទប្រុស អាយុ៤២ឆ្នាំ រស់នៅភូមិ ឃុំកើតហេតុ(ត្រូវសមត្ថកិច្ចឃាត់ខ្លួ) និងទី២-ឈ្មោះ សុខ ភេទប្រុស រស់នៅផ្ទះជួល ក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ(រត់គេចខ្លួនបាត់)។ រីឯជនរងគ្រោះ ឈ្មោះ ងិន វាសនា ភេទប្រុស អាយុ៣៣ឆ្នាំ រស់នៅភូមិត្រពាំងពោធិ៍ ឃុំជាងទង ស្រុកត្រាំកក់ ខេត្តតាកែវ។
លោកអធិការនគរបាលស្រុកត្រាំកក់ បានបន្តថា កាលពីពេលកន្លងមក ជនបង្កទាំង២នាក់ធ្លាប់មានទំនាស់គ្នាជាមួយនឹងជនរងគ្រោះ ទើបធ្វើឲ្យពួកគេមានគំនុំដក់នូវក្នុងចិត្ត។ លុះមកដល់ថ្ងៃកើតហេតុ រវាងជនបង្ក និងជនរងគ្រោះ ក៏មានទំនាស់ពាក្យសម្ដីនឹងគ្នា ទើបធ្វើឲ្យពួកគេទាំង២នាក់ផ្ទុះកំហឹងយ៉ាងក្រេវក្រោធឡើង ក៏ស្ទុះទៅទាញកាំបិតកាប់ប្រហារទៅលើជនរងគ្រោះ បណ្ដាលឲ្យរងធ្ងន់ត្រង់ក្បាល និងកញ្ចឹងកពីក្រោយជាច្រើនកាំបិត។
ក្រោយពេលកើតហេតុ សាច់ញាតិបានបញ្ជូនជនរងគ្រោះទៅកាន់មន្ទីរពេទ្យ។ ដោយឡែកជនបង្កក៏ត្រូវសមត្ថកិច្ចចុះទៅឃាត់ខ្លួនបានម្នាក់(ឈ្មោះ មុំ បេ) រួចនាំមកកាន់អធិការដ្ឋាននគរបាលស្រុក ដើម្បីសាកសួរ និងចាត់ការតាមនីតិវិធី ហើយបន្តតាមចាប់ខ្លួនបក្ខពួករបស់គេម្នាក់ទៀតដែលកំពុងរត់គេចខ្លួន នាំមកផ្តន្ទាទោសតាមច្បាប់៕
