ខេត្តព្រះសីហនុ៖ រថយន្តធុនធំដឹកស្ករសមួយគ្រឿង បានបើកយ៉ាងលឿន ស្រាប់តែរេចង្កូតខុសផ្លូវក្រឡាប់ផ្ងារជើង កាលពីវេលាម៉ោង៦ និង៣០នាទីព្រឹក ថ្ងៃទី៣១ ខែតុលា ឆ្នាំ២០១៧ នៅលើផ្លូវជាតិលេខ៣ ត្រង់ចន្លោះគីឡូម៉ែត្រ២០០-២០១ ស្ថិតក្នុងភូមិបឹងវែង ឃុំវាលរេញ ស្រុកព្រៃនប់។
ប្រភពព័ត៌មាន បានឲ្យដឹងថា មុនពេលកើតហេតុ គេឃើញរថយន្តធុនធំដឹកស្ករស១គ្រឿង ម៉ាក HYUNDAI ពណ៌បៃតង ពាក់ស្លាកលេខ ព្រះសីហនុ 3A-3410 បើកបោះពួយយ៉ាងលឿន តាមបណ្ដោយផ្លូវជាតិលេខ៣ ក្នុងទិសដៅពីខេត្តព្រះសីហនុឆ្ពោះទៅកាន់ខេត្តកំពត។ លុះពេលរថយន្តបើកមកដល់ចំណុចខាងលើ ទំនងជាអ្នកបើកបរងងុយដេក ហើយងោកមួយភាំង ធ្វើឲ្យរថយន្តរេចង្កូតខុសផ្លូវ ក្រឡាប់ផ្ងារជើង។ ប៉ុន្តែសំណាងល្អ នៅក្នុងហេតុការណ៍នោះ មិនបានបង្កឲ្យមានគ្រោះថ្នាក់ដល់មនុស្សណាម្នាក់នោះឡើយ ហើយអ្នកបើកបរក៏បានរត់គេចខ្លួនបាត់។
ក្រោយពេលកើតហេតុ សមត្ថកិច្ចបានចុះទៅពិនិត្យ តែដោយសារករណីនេះមិនបង្កឲ្យប៉ះពាល់ដល់អ្នកដទៃ ទើបសមត្ថកិច្ចអនុញ្ញាតឲ្យម្ចាស់ទាក់ទងរកមធ្យោបាយមកស្ទួចយករថយន្តដែលក្រឡាប់នោះទៅជួសជុលដោយខ្លួនឯង៕