ខេត្តកំពង់ចាម៖ បុរស២នាក់បានស្លាប់យ៉ាងអណោចអធ័មមួយរំពេច ដោយសាររថយន្តបើកបុកម៉ូតូ កាលពីរសៀល ថ្ងៃទី២៩ ខែតុលា ឆ្នាំ២០១៧ នៅលើផ្លូវជាតិលេខ៦ ត្រង់ចន្លោះគឺឡូម៉ែត្រលេខ៦៨-៦៩ ស្ថិតក្នុងភូមិរវៀង ឃុំខ្នុរដំបង ស្រុកជើងព្រៃ។
មន្ត្រីនគរបាលចរាចរស្រុកជើងព្រៃ បានឲ្យដឹងថា ម៉ូតូម៉ាកគុបបើកបរដោយ ឈ្មោះ ឆិន វឿន ភេទប្រុស អាយុ៤៣ឆ្នាំ មានលំនៅក្នុងភូមិរវៀង ឃុំខ្នុរដំបង ស្រុកជើងព្រៃ ខេត្តកំពង់ចាម និងអ្នករួមដំណើរជាមួយឈ្មោះ សាន់ ជាតិ ភេទប្រុស អាយុ២៦ឆ្នាំ មានលំនៅក្នុងភូមិកន្ទោង ឃុំពាម ស្រុកសាមគ្គីមានជ័យ ខេត្តកំពង់ឆ្នាំង។
ប្រភពព័ត៌មាន បានឲ្យដឹងថា មុនពេលកើតហេតុ គេឃើញរថយន្តមួយគ្រឿង ម៉ាកហាយឡែនដឺរ ពណ៌មាស (មិនចាំស្លាកលេខ និងអត្តសញ្ញាណរបស់អ្នកបើក) បើកបរយ៉ាងលឿនតាមបណ្ដោយផ្លូវជាតិលេខ៦ ក្នុតទិសដៅពីកើតទៅលិច ស្របទិសគ្នាជាមួយនឹងជនរងគ្រោះទាំង២នាក់ខាងលើ។ លុះពេលរថយន្តបើកមកដល់ចំណុចកើតហេតុ ក៏ជ្រុលចង្កូតទៅបុកម៉ូតូពេញទំហឹង បោកជនរងគ្រោះទៅលើថ្នល់ បណ្ដាលឲ្យស្លាប់យ៉ាងអណោចអធ័មទាំង២នាក់មួយរំពេច។ ឃើញហេតុការណ៍ដ៏រន្ធត់បែបនេះ អ្នកបើកបរបានបើកទ្វាររថយន្តលោតចុះ រត់គេចខ្លួនបាត់ស្រមោល។
ក្រោយពេលកើតេហេតុ សមត្ថកិច្ចបានចុះទៅពិនិត្យ និងធ្វើកំណត់ហេតុ ប្រគល់សាកសពរបស់ជនរងគ្រោះទាំង២នាក់ទៅឲ្យក្រុមគ្រួសារ ដឹកទៅរៀបចំធ្វើបុណ្យតាមប្រពៃណី។ ដោយឡែកយានយន្តទាំង២គ្រឿង ត្រូវសមត្ថកិច្ចវាស់វែង រួចយកទៅរក្សាទុក នៅក្នុងអធិការដ្ឋាននគរបាលស្រុក ដើម្បីចាត់ចែងធ្វើបុណ្យតាមប្រពៃណី៕