ខេត្តបាត់ដំបង៖ ជនសង័្សយម្នាក់បានចូលទៅគាស់តូប លួចទូរស័ព្ទជិត៥០គ្រឿងពីយប់ ហើយគេចខ្លួនបាត់ ប់ុន្តែសំណាងមិនល្អចំពោះអំពើអាក្រក់របស់ខ្លួនដែលបានសាង ក៏អស់លក្ខណ៍ ត្រូវសមត្ថកិច្ចឃាត់ខ្លួន កាលពីព្រឹក ថ្ងៃទី៣១ ខែតុលា ឆ្នាំ២០១៧ នៅភូមិជ្រៃ ឃុំជ្រៃ ស្រុកថ្មគោល។
លោកវរសេនីយ៍ទោ ផង់ សុភាព អធិការនគរបាលស្រុកថ្មគោល បានឲ្យដឹងថា ជនសង័្សយដែលសមត្ថកិច្ចឃាត់ខ្លួន ឈ្មោះ ក្រាន សារ៉ាត់ ភេទប្រុស អាយុ ២៦ឆ្នាំ ស្នាក់នៅបណ្តោះអាសន្នភូមិជ្រៃថ្មី ឃុំជ្រៃ ស្រុកថ្មគោល។ រីឯជនរងគ្រោះជាម្ចាសតូបលក់ទូរស័ព្ទមានឈ្មោះ ជា សុខវាសនា ភេទប្រុស អាយុ២៩ឆ្នាំ រស់នៅភូមិជ្រៃ ឃុំជ្រៃ ស្រុកថ្មគោល ហើយនៅក្នុងករណីចោរគាស់លួចទូរស័ព្ទនេះ ជនរងគ្រោះបានបាត់បង់សម្ភារជាច្រើន រួមមាន ទូរស័ព្ទដែលអតិថិជនយកមកបញ្ចាំ និងជុសជុល ចំនួន៤០គ្រឿង និងឡែបថប់២គ្រឿង។
លោកអធិការនគរបាលស្រុកថ្មគោល បានបន្តថា បន្ទាប់ពីកើតមានករណីចោរគាស់តូបលួចយកទូរស័ព្ទ កាលពីវេលាម៉ោង១០ និង១០នាទីយប់ ថ្ងៃទី៣០ ខែតុលា ឆ្នាំ២០១៧ នៅភូមិភូមិហៃសាន ឃុំជ្រៃ ស្រុកថ្មគោល នោះមក ជនរងគ្រោះជាម្ចាស់តូបក៏បានទៅដាក់ពាក្យបណ្ដឹងសុំឲ្យសមត្ថកិច្ចជួយអន្តរាគមន៍តាមស្រាវជ្រាវចាប់ខ្លួនជនល្មើស។ នៅពេលមានពាក្យបណ្ដឹងពីជនរងគ្រោះភ្លាម មន្រ្ដីនគរបាលជំនាញក៏បានចុះស្រាវជ្រាវ រហូតចាប់ខ្លួនជនសង័្សយបាន រួមជាមួយនឹងវត្ថុតាង មានទូរស័ព្ទចំនួន៤៨គ្រឿង និងឡែបថប់១គ្រឿង។
ក្រោយពេលឃាត់ខ្លួនរួចមក សមត្ថកិច្ចបាននាំខ្លួនជនសង័្សយទៅកាន់អធិការដ្ឋាននគរបាលស្រុកថ្មពួក ដើម្បីសាកស និងកសាងសំណុំរឿង បញ្ជូនទៅតុលាការ ចោទប្រកាន់តាមផ្លូវច្បាប់៕