ប្រទេសរុស្ស៊ី៖ ក្នុងដំណើរទៅបំពេញ ទស្សនកិច្ចរបស់ខ្លួន នៅក្នុងទីក្រុងមូស្គូ ប្រទេសរុស្ស៊ីនោះ អនុប្រធានសភាកូរ៉េខាងជើង បានថ្លែងថា ប្រទេសកូរ៉េខាងជើង កំពុងស្វែងរកការរស់នៅក្នុងសន្តិភាព ហើយប្រទេសមួយនេះ បានត្រៀមខ្លួនរួចជាស្រេច ដើម្បីកម្ទេចគ្រប់សត្រូវទាំងអស់ ដែលចង់រារាំងខ្លួន “មិនឱ្យយើងទៅដល់” គោលដៅរបស់ខ្លួន។ នេះបើតាមការចុះផ្សាយ របស់សារព័ត៌មានរុស្ស៊ី (Sputnik) នារសៀលថ្ងៃចន្ទ ទី១៦ ខែតុលា ឆ្នាំ២០១៧នេះ។
លោក អាន ដុងជន (An Dong-chun) អនុប្រធានសភាកូរ៉េខាងជើង នៅក្នុងឱកាស បំពេញដំណើរទស្សនកិច្ច នៅក្នុងអំឡុងចូលរួម កិច្ចប្រជុំសហភាពអន្តរសភា (UIP) ដែលប្រព្រឹត្តទៅ ចាប់ពីថ្ងៃទី១៤-១៨ ខែតុលា នាទីក្រុងសេនត៍ ភីធើស្បឺក (Saint-Petersbourg) ប្រទេសរុស្ស៊ី ពាក់ព័ន្ធនឹងលទ្ធភាព នៃកិច្ចចរចាដោយផ្ទាល់ រវាងទីក្រុងវ៉ាស៊ីនតោន និងទីក្រុងព្យុងយ៉ាងថា «ប្រទេសរបស់យើង ប្រាថ្នាចង់បានអនាគត រស់នៅប្រកបដោយសន្តិភាព ហើយដើម្បីទទួលបានសន្តិភាព យើងបានត្រៀមខ្លួនរួចជាស្រេច កម្ទេចគ្រប់សត្រូវទាំងអស់ ដែលរារាំងផ្លូវរបស់យើង ឆ្ពោះទៅកាន់អនាគតមួយនេះ»។
ទោះជាយ៉ាងណា លោក An Dong-chun បានបដិសេធមិនឆ្លើយ រាល់សំណួររបស់អ្នកសារព័ត៌មាន ទាក់ទិននឹងនយោបាយ ហើយលោកមិនបានបញ្ជាក់ថា សត្រូវមួយណា ឬផ្លូវសន្តិភាពនោះជាអ្វីឱ្យប្រាកដដែរ តែគេដឹងថា លោកទំនងជាចង់និយាយ សំដៅលើសហរដ្ឋអាមេរិក និងអាវុធនុយក្លេអ៊ែរ ដែលលោក គីម ជុនអ៊ុន ធ្លាប់អះអាងថា ជាវិធានការការពារសន្តិភាព និងស្ថិរភាព នៅក្នុងឧបទ្វីកូរ៉េ៕