ភ្នំពេញ៖ បន្ទាប់ពីក្រុមព្រះរាជអាជ្ញាអមសាលាដំបូងរាជធានីភ្នំពេញចំនួនបីនាក់បញ្ចប់នូវការសួរចម្លើយលោក កឹម សុខា ប្រធានគណបក្សសង្រ្គោះជាតិ នាព្រឹក ថ្ងៃទី៧ ខែកញ្ញានេះរួចមក ក្រុមព្រះរាជអាជ្ញាក៏បានសម្រេចចោទប្រកាន់លោក កឹម សុខា ជាផ្លូវការពីបទសន្ទិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ របស់ប្រទេសកម្ពុជា។ នេះបើតាមសេចក្តីថ្លែងការណ៍របស់សាលាដំបូងរាជធានីភ្នំពេញ។
បទចោទនេះ លោក កឹម សុខា អាចប្រឈមនឹងជាប់ពន្ធនាគារ ចាប់ពីពី១៥ទៅ៣០ឆ្នាំ។ បើទោះជាក្រុមព្រះរាជអាជ្ញាបានចោទពីបទល្មើសបែបនេះក្ដី ក៏ក្រុមមេធាវីការពារក្តីឲ្យលោក កឹម សុខា បានទាត់ចោលការចោទប្រកាន់នេះ ដោយអះអាងថា ពួកគាត់នឹងពិភាក្សាគ្នា នៅរសៀលនេះ ដើម្បីស្វែងរកដំណោះស្រាយបន្តទៀត។
បទសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឫភ្នាក់ងារបរទេស ដើម្បីបង្កើតឲ្យមានអំពើប្រទូសរ៉ាយឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ នេះបើតាមក្រមព្រហ្មទណ្ឌកម្ពុជា។ តាមក្រមដដែលនេះ លោកកឹម សុខា អាចនឹងត្រូវផ្តន្ទាទោសដាក់ពន្ធនាគារ ចាប់ពី១៥ ទៅ៣០ឆ្នាំ។
ចំពោះការចោទប្រកាន់មកលើលោក កឹម សុខា នេះ ទាំងក្រុមមេធាវីគណបក្សសង្គ្រោះជាតិ ក៏ដូចជាលោក កឹម សុខា ផ្ទាល់មិនអាចទទួលបានឡើយ។ នេះបើតាមលោកសំ សុគង់ ជាមេធាវីម្នាក់ ក្នុងចំណោមមេធាវីទាំង៥នាក់របស់លោកកឹម សុខា គឺដោយសារតែការជួបជុំរបស់លោកកឹម សុខា ដូចមាននៅក្នុងវីឌីអូបែកធ្លាយនោះ គឺជាការជួបជុំធម្មតាទេ មិនមែនជាការជួបជុំ រៀបចំឃុបឃិតជាមួយបរទេស ដូចការចោទប្រកាន់នោះឡើយ។
លោកកឹម សុខា ប្រធានគណបក្សសង្រ្គោះជាតិត្រូវបានអាជ្ញាធរសម្រុកចូលទៅចាប់ខ្លួនទាំងកណ្តាលយប់ថ្ងៃទី២ ឈានចូលទី៣ កញ្ញា ហើយក៏បានបញ្ជូនខ្លួនភ្លាមៗទៅកាន់ពន្ធនាគារត្រពាំងផ្លុង នៅក្នុងខេត្តត្បូងឃ្មុំ។ នៅទីនោះ លោក កឹម សុខា មិនត្រូវបានអាជ្ញាធរដាក់ឃុំខ្លួនក្នុងបន្ទប់ឃុំឃាំងទេ តែដាក់ឲ្យស្ថិតនៅក្នុងបន្ទប់ការិយាល័យដាច់ដោយឡែកមួយរបស់អនុរក្សពន្ធនាគារ។ កាលពីចន្ទ ព្រះរាជអាជ្ញារងតុលាការក្រុងភ្នំពេញដល់ទៅបីនាក់ បានចុះទៅសួរចម្លើយលោកកឹម សុខាដល់ពន្ធនាគារនោះតែម្តង។
លោកមេធាវីសំ សុគង់ នេះគឺជារឿងដ៏កម្រនឹងជួបមួយ ដូច្នេះលោកគិតថា ការដែលមានព្រះរាជអាជ្ញារងដល់ទៅបីនាក់បែបនេះ គឺដើម្បីជួយគ្នាសួរយកចម្លើយពីលោក កឹម សុខា។ ចំណែកការលើកតុលាការទៅដាក់នៅក្នុងពន្ធនាគារនោះទៀតសោត លោកសំ សុគង់ ថាមិនអាចទទួលយកបានទេចំពោះនីតិវិធីបែបនេះ ពីព្រោះថា ការធ្វើនីតិវិធីនៅក្នុងពន្ធនាគារដូច្នេះ គឺសិទ្ធិរបស់មេធាវីមួយចំនួនត្រូវបានកាត់បន្ថយ។
ទោះបីជាយ៉ាងណាក៏ដោយ លោក លី សុផាណា អ្នកនាំពាក្យសាលាដំបូងរាជធានីភ្នំពេញបានបញ្ជាក់ថា បន្ទាប់ពីបានពិនិត្យសំណុំរឿងរួមទាំងឆ្លងកាត់ការស្រាវជ្រាវស៊ើបអង្កេត ដោយបានពិនិត្យភស្តុតាង និងផ្ទៀងផ្ទាត់ចម្លើយលើលោក កឹម សុខារួច តំណាងអយ្យការអមសាលាដំបូងរាជធានីភ្នំពេញយល់ថា មានមូលដ្ឋានគ្រប់គ្រាន់ក្នុងការចោទប្រកាន់លើលោកកឹម សុខា ពីបទសន្ទិដ្ឋិភាពជាមួយបរទេស និងហើយបញ្ជូនទៅចៅក្រមស៊ើបសួរនៃសាលាដំបូងរាជធានីភ្នំពេញ ដើម្បីចាត់ការបន្តតាមនីតិវីធី៕ សហការី KBN