ខេត្តព្រៃវែង៖ បុរសមួយក្រុមបាននាំគ្នាផឹកស៊ី នាថ្ងៃសែនក្បាលទឹកលេងសើចយ៉ាងសប្បាយរីីករាយ លុះពេលស្រវឹងរៀងៗខ្លួនក៏ទាស់ពាក្យសម្ដីគ្នា ទាញពូថៅកាប់គ្នា បណ្ដាលឲ្យរងរបួសធ្ងន់ម្នាក់ ហើយជនបង្កបានរត់គេចខ្លួនបាត់ស្រមោល កាលពីវេលាម៉ោង៧យប់ ថ្ងៃទី៥ ខែកញ្ញា ឆ្នាំ២០១៧ នៅឃុំព្រែកតាសរ ស្រុកពោធិ៍រៀង ខេត្តព្រៃវែង។
ប្រភពព័ត៌មាន បានឲ្យដឹងថា មុនពេលកើតមាននូវអំពើហិង្សានោះ គឺមានបុរស៤នាក់បានព័ទ្ធវង់ផឹកស៊ី នាថ្ងៃសែនក្បាលទឹក តាមប្រពៃណីចិន តាំងពីរសៀល រហូតដល់វេលាខាងលើ ពួកគេម្នាក់ៗបានស្រវឹងជោកជាំ ហើយចាប់ផ្ដើមជជែកគ្នាចុះឡើង ក៏ទាស់ពាក្យសម្ដី ធ្វើឲ្យជនបង្កផ្ទុះកំហឹងទាញពូថៅកាប់ទៅលើគូទំនាស់ បណ្ដាលឲ្យរងរបួសធ្ងន់។ បន្ទាប់មក ជនសង័្សយក៏បានរត់គេចខ្លួនបាត់ស្រមោល។
លោក ប៊ូ សុខានី នាយប៉ុស្តិ៍ព្រែកតាសរ បានឲ្យដឹងថា អ្នកដែលចូលរួមផឹកស៊ីនោះ ទី១-ឈ្មោះ លី លាភ ភេទប្រុស អាយុ៣៥ឆ្នាំ (ម្ចាស់ផ្ទះ) ទី២-ឈ្មោះ ឡាំង សុនអេង ភេទប្រុស អាយុ២៧ឆ្នាំ ទី៣-ឈ្មោះ វ៉ាន់ ធា ភេទប្រុស អាយុ ៤៩ឆ្នាំ (ជនរងគ្រោះ) និងទី៤-ឈ្មោះ ច័ន្ទ ឌីសុក្រិត្យ ភេទប្រុស អាយុ៣៤ឆ្នាំ (ជនដៃដល់)។ ពួកគេទាំង៤នាក់ មានមុខរបរជាកសិករ រស់នៅឃុំព្រែកតាសរ ស្រុកពោធិ៍រៀង ខេត្តព្រែវែង។
លោកមេប៉ុស្ដិ៍ បានបន្តថា មុនកើតមាននូវអំពើហិង្សានោះ ជនសង្ស័យ និងជនរងគ្រោះ រួមទាំងបុរស២នាក់ បាននាំគ្នាអង្គុយផឹកស៊ីជាមួយគ្នា រហូតស្រវឹងរៀងៗខ្លួន ក៏កើតទំនាស់ បង្កឲ្យមានការប្រតាយប្រតប់គ្នា។ ភ្លាមៗនោះ ជនសង្ស័យឈ្មោះច័ន្ទ ឌីសុក្រិត្យ បានស្ទុះទៅទាញពូថៅដៃដែលមានដងប្រវែង៣តឹក និងផ្លែប្ររែង៧សង់ទីម៉ែត្រ កាប់មកលើជនរងគ្រោះឈ្មោះ វ៉ាន់ ធា ធ្វើឲ្យអ្នកផឹកជាមួយឃាត់មិនទាន់ បណ្ដាលឲ្យត្រូវក្បាលជនរងគ្រោះចំនួន២ពូថៅ គឺចំលើចិញ្ចើមផ្នែកខាងស្ដាំ និងចំស្លឹកត្រចៀកខាងស្ដាំ បណ្ដាលឲ្យរងរបួសធ្ងន់។
ក្រោយពេលកើតហេតុ ជនរងគ្រោះត្រូវគេដឹកតាមរថយន្តសង្គ្រោះបន្ទាន់ បញ្ជូនទៅកាន់មន្ទីរពេទ្យ ឯរាជធានីភ្នំពេញ។ រីឯជនបង្កបានរត់គេចខ្លួនបាត់ស្រមោល។ នៅពេលនេះ សមត្ថកិច្ចបានចុះទៅយកពូថៅនោះមករក្សាទុក និងបន្តស្រាវជ្រាវស្វែងរកជនបង្កនាំមកចាត់ការតាមច្បាប់៕