ភ្នំពេញ៖ យុវជនមួួយក្រុមមានគ្នា ៤នាក់ បានជិះម៉ូតូចេញពីផ្ទះដើរលេងនៅតាមផ្លូវ លុះជិះដល់ពាក់កណ្តាលផ្លូវ ស្រាប់តែត្រូវបានជនមួយក្រុមទៀតមានគ្នា ៥ទៅ៦នាក់ បានជិះម៉ូតូដេញតាមវាយ ធ្វើឱ្យរងរបួសធ្ងន់ម្នាក់ និងស្រាល ៣នាក់ ដែលហេតុការនេះបានកើតឡើងនៅវេលាម៉ោង២រំលងអធ្រាត្រ ឈានចូលថ្ងៃទី២៤ ខែសីហា ឆ្នាំ២០១៧ នៅជិតស្តុបផ្សារដើមគ ផ្លូវព្រះមុនីរ៉េត សង្កាត់បឹងសាឡាង ខណ្ឌទួលគោក ។
ជនរងគ្រោះដែលរងរបួសធ្ងន់មានឈ្មោះ បុត្រ មុនីកវី ភេទប្រុស អាយុ ១៧ឆ្នាំ មុខរបរ សិស្ស ស្នាក់នៅក្រោយផ្សារស្ទឹងមានជ័យថ្មី សង្កាត់ស្ទឹងមានជ័យ ខណ្ឌមានជ័យ ចំនែកអ្នករងរបួសស្រាល មិនបានឱ្យដឹងឈ្មោះនោះទេ ។
តាមសម្តីជនរងគ្រោះដែលរងរបួសស្រាល បានឱ្យដឹងថា មុនពេលកើតហេតុ ពួកគេមានគ្នា ៤នាក់ បានជិះម៉ូតូ ម៉ាក CITI plus ពណ៌ក្រហម អត់មានស្លាកលេខ គោលបំណងដើរលេងតាមដងផ្លូវព្រះមុន្នីរ៉េត ក្នុងទិសដៅពីលិចទៅកើត ។
ខណៈពេលនោះ ស្រាប់តែមាន ជនបង្ក ៥ទៅ៦នាក់ បានជិះម៉ូតូ ៣គ្រឿង មានម៉ាកនិច និងម៉ាកហុងដាឌ្រីម និងមួយគ្រឿងទៀតមិនចាំម៉ាក ហើយម្នាក់ៗ បានកាន់ដុំថ្ម និងមួកសុវត្តិភាព បានជិះម៉ូតូធ្វើសកម្មភាព ដេញវាយពួកគេ ធ្វើឱ្យពួកគេភ័យពេក បានជិះម៉ូតូចូលទៅកន្លែង លក់មីឆា និងគុយទាវ ឱ្យគេជួយ តែពេលនោះ ក្រុមជនទាំងនោះ បានដេញវាយពួកគេដល់កន្លែងលក់មីឆាថែមទៀត បណ្តាលឱ្យមិត្តភក្ត័គេម្នាក់រងរបួស ចុកឆ្អល់ដួលនៅកន្លែង ចំនែកពួកគេ ៣នាក់ អត់មានរងរបួសនោះទេ ដោយសារគេចខ្លួនរួច ។
ប្រភពដដែលបានបន្តទៀតថា បន្ទាប់ពីវាយពួកគេរួចហើយ ពួកក្រុមជនបង្ក បាននាំជិះម៉ូតូរត់គេខ្លួនបាត់ស្រមោលអស់ទៅ ។
ក្រោយពេលកើតហេតុ ឃើញសមត្ថកិច្ចចុះទៅកន្លែង រួចហើយបានសាកសួរ ពីដំណើររឿង រួចហើយក៏បានឱ្យជនរងគ្រោះ ទៅដាក់ពាក្យបណ្តឹងនៅប៉ុស្តិនគរបាលបឹងសាឡាង ពីព្រោះជនរងគ្រោះបានស្គាល់មុខជនបង្ក ៕ សហការី KBN