ខេត្តកំពង់ឆ្នាំង៖ ឃាតករដៃឆៅម្នាក់បានប្រចណ្ឌនឹងប្រពន្ធរបស់ខ្លួនខ្លាំងពេក ក៏ផ្ទុះកំហឹងយ៉ាងក្រេវក្រោធ វាយសម្លាប់នាង រួចទម្លាក់សាកសពនៅក្នុងអណ្ដូងទឹក ដើម្បីបំបិទភស្ដុតាង ប៉ុន្តែពេលស្រឡាញ់កូនក្រមុំអ្នកភូមិ ក៏បែកការត្រូវសមត្ថកិច្ចចុះទៅឃាត់ខ្លួន កាលពីថ្ងៃទី២៣ ខែសីហា នៅភូមិទំនប់ ឃុំត្រងិល ស្រុកកំពង់លែង។
មន្ត្រីនគរបាលស្រុកកំពង់លែង បានឲ្យដឹងថា ជនសង្ស័យជាឃាតករដៃឆៅសម្លាប់ប្រពន្ធខ្លួនឯងនោះ ឈ្មោះ ជុច អេត អាយុ៤៨ឆ្នាំ មានស្រុកកំណើតនៅភូមិកំពង់ស្វាយ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ហើយស្ដ្រីរងគ្រោះជាប្រពន្ធ ឈ្មោះ ឯល គឹមសុីម អាយុ៤៤ឆ្នាំ។ ពួកគេទាំង២នាកប្ដីប្រពន្ធ រស់នៅភូមិទំនប់ ឃុំត្រងិល ស្រុកកំពង់លែង។
មន្ត្រីនគរបាលដដែល បានបន្តថា គ្រួសារនេះមានការរកាំរកូសនឹងគ្នាអស់រយៈពេលជាយូរមកហើយ លុះមកដល់ថ្ងៃទី២៩ ខែមិថុនា ឆ្នាំ២០១៧កន្លងមក ពួកគេទាំងពីរនាក់ប្តី-ប្រពន្ធជិះម៉ូតូមកដល់ចំណុចក្រោលគោ ស្ថិតក្នុងភូមិទំនប់ ឃុំត្រងិល ស្រុកកំពង់លែង ដើម្បីវាស់ដី ហើយក៏ទាស់សម្តីគ្នា ស្រាប់តែបុរសជាប្តីបានច្រានប្រពន្ធ ដួលបោកទៅលើខ្នោះអណ្តូងលូ បណ្ដាលឲ្យបែកឈាមតាមមាត់សម្លាប់មួយរំពេច ។ បន្ទាប់មក ជនដៃដល់បានលើកប្រពន្ធទម្លាក់ចូលក្នុងអណ្តូងលូ រួចហើយ វាយខ្នោះអណ្តូងសង្កត់ពីលើបន្ថែមទៀត ទើបត្រឡប់មកផ្ទះវិញ។
រូបថតកាលស្ដ្រីរងគ្រោះនៅរស់(រូបខាងលើ) និងអណ្ដូងទឹកដែលប្ដីវាយនាងទម្លាក់ (រូបខាងក្រោម)
មន្ត្រីនគរបាលដដែល បានបន្តថា រហូតមកដល់ថ្ងៃទី៣ ខែកក្កដា ឆ្នាំ២០១៧ បុរសជាប្តីបានទៅប្តឹងមេឃុំថា ប្រពន្ធគាត់បានរត់បាត់ ហើយគេសង្ស័យថា នាងរត់តាមប្រុស។ បន្ទាប់មកបុរសជាប្តីបានទៅស្រឡាញ់នារីម្នាក់ រស់នៅក្នុងភូមិជាមួយគ្នា តែនាងនោះបដិសេធថា មានប្រពន្ធហើយឱ្យខ្ញុំធ្វើម៉េច។ ក្រោយពេលលួងលោមមិនបាន ជនដៃដល់ក៏បានសារភាពតាមត្រង់ថា រូបគេបានសម្លាប់ប្រពន្ធចោលហើយ ទើបបែកការដឹងដល់សមត្ថកិច្ចនគរបាល ចុះទៅឃាត់ខ្លួន។
ក្រោយពេលកើតមាននូវអំពើឃាតកម្មនោះមក សមត្ថកិច្ចនគរបាលជំនាញបានស្រាវជ្រាវអស់រយៈពេលជិត២ខែ ទម្រាំបំបែកសំណុំរឿងដ៏អាថ៌កំបាំងនេះបាន ហើយក៏ចុះទៅឃាត់ខ្លួនឃាតករជាប្តី បញ្ជូនទៅកាន់តុលាការខេត្តកំពង់ឆ្នាំង ដើម្បីចាត់ការតាមច្បាប់៕ សហការី KBN
