ជាទូទៅប្រជាជនកម្ពុជា ជាពិសេសប្រជាពលរដ្ឋ តាមទីជនបទ ឬតាមខេត្តមិនមានចំណេះដឹងគ្រប់គ្រាន់ យល់ដឹងពីការ ទទួលយកកម្ចី របៀបនៃការ សងប្រាក់ត្រលប់មកវិញឡើយ ឬ ការគណនាអត្រាការនានានោះឡើយ។ ដូច្នេះហើយ មានជនខិលខូចមួយចំនួន បានថ្ពឹនភ្នែកប្រជាពលរដ្ឋ ដោយរៀបចំកិច្ចសន្យាមិនស្របច្បាប់ ធ្វើឲ្យអតិថិជនមួយចំនួននោះ បានក្លាយជាជនរងគ្រោះទៅវិញ រីឯជនខិលខូចនោះ បានឆ្លៀតឱកាសនេះដើម្បីទទួលបានផលចំណេញ។
រាជធានីភ្នំពេញ ថ្ងៃទី១៨ សីហា ២០១៧ ៖ ការប្រកួតប្រជែង ផ្ដល់សេវាឥណទានរបស់បណ្ដាគ្រឹះស្ថានធនាគារ និងមីក្រូហិរញ្ញវត្ថុនៅកម្ពុជាបច្ចុប្បន្ន កំពុងតែមានសកម្មភាព យ៉ាងផុសផុល ។ ថ្វីដ្បិតតែវិស័យមួយនេះ កំពុងមានសុខភាពល្អ តែបើមើលពីអតិថិជន ដែលទទួលសេវាមួយនេះវិញ ហាក់កំពុងប្រឈម បញ្ហាជាច្រើន ពិសេសការរិះរកវិធី ដើម្បីដោះបំណុល ខណៈគ្រឹះស្ថានមួយចំនួន ព្រោះតែចង់បានអតិថិនល្អ បានប្រើប្រាស់មធ្យោបាយខុសឆ្គង សុខចិត្តឲ្យកូនបំណុល ខ្ចីប្រាក់បន្ថែម ឬបន្ដកិច្ចសន្យាថ្មី ដោយស្ទើរតែពុំមានលក្ខខណ្ឌ និងចុះសិក្សាឡើងវិញពីចំណូល និងលទ្ធភាពនៃការសងត្រលប់របស់អតិថិជនឡើយ ។ ចំណែកគ្រឹះស្ថានមួយចំនួនទៀត ដើម្បីរក្សាអតិថិជន និងចំណូលរបស់ខ្លួន មិនអនុញ្ញាតឲ្យកូនបំណុបង់ផ្ដាច់មុនកាលកំណត់ទេ ដោយតម្រូវឲ្យបង់ប្រាក់ពិន័យយ៉ាងធ្ងន់ធ្ងរ ធ្វើឲ្យកូនបំណុលមិនអាចទទួលយកបាន ដោយសំអាងលើកកិច្ចសន្យា ដែលបានព្រមព្រៀងតាមលក្ខខណ្ឌពីខាងដើម ។
ជាក់ស្តែងថ្មីៗនេះមានករណី កើតឡើងនៅតាមបណ្តាលខេត្តមួយចំនួនដូចជា តាកែវ កំពង់ឆ្នាំង ត្បូងឃ្មុំ និងស្រុកបារាយណ៍ខេត្តកពង់ធំ គឺស្ថាប័នមីក្រូហិរញ្ញវត្ថុមួយ បានរៀបចំកិច្ចសន្យាខ្ចីប្រាក់ធ្វើឡើងដោយបំពានច្បាប់ មិនអនុលោមតាមច្បាប់ និងខ្វះសុចរិតភាព ដោយក្នុងកិច្ចសន្យានោះបានបញ្ជាក់ថា ប្រសិនបើអតិថិជន ស្នើសុំធ្វើការទូទាត់សងឥណទាន ឬបង់ផ្ដាច់កម្ចីមុន គេតម្រូវឲ្យអតិថិជនបង់ការប្រាក់រយៈពេលពី ២៤ ខែ ឬ ៣៦ខែ ប្រាក់ពិន័យលើការទូទាត់សងមុនកាលកំណត់!!! ខ្លឹមសារនេះមានលក្ខណៈថ្ពឹនភ្នែក ហើយមិនគោរពតាមច្បាប់របស់ធនាគារជាតិនៃកម្ពុជាឡើយ។
ថ្មីៗនេះ ធនាគារជាតិនៃកម្ពុជាបានប្រតិកម្ម និងជួយដោះស្រាយ ក្នុងស្ថានភាពនេះយ៉ាងឆាប់រហ័ស ក្រោយពេលទទួលបានដំណឹងទាំងនោះ។ ប្រហែលមកពី មានករណីជាច្រើនដែលមានអតិថិជនបានតវ៉ាពីសកម្មភាពរបស់ប្រាសាក់រយៈពេលថ្មីៗចុងក្រោយនេះ។
នេះជាសេចក្តីក្រើនរំលឹក ដល់អតិថិជនដែលខ្ចីប្រាក់ សូមទទួលយកការប្រឹក្សាយោបល់ ឲ្យបានច្រើនមុននឹង សម្រេចចិត្តទទួលកម្ចី ហើយជាពិសេស មុននឹងចុះហត្ថលេខា លើឯកសារណាមួយសូមអាន និងស្វែងយល់ឲ្យបានត្រឹមត្រូវ។ បើលោកអ្នកមានបញ្ហាទាក់ទង នឹងការប្រើប្រាស់សេវាហិរញ្ញវត្ថុ សូមទំនាក់ទំនងទៅលេខទូរស័ព្ទ (Hotlines) របស់ធនាគារជាតិ ដែលរួមមាន៤ខ្សែ គឺ 085 600 002 / 085 600 003 / 098 220 001 / 098 220 002 ចាប់ពីថ្ងៃចន្ទដល់ថ្ងៃសុក្រ ម៉ោង ៨ព្រឹករហូតដល់ម៉ោង ៥ល្ងាច។
ដើម្បីរក្សានូវសុខភាពវិស័យធនាគារ និងហិរញ្ញវត្ថុឲ្យមាននិរន្តរភាព និងបន្ដរួមចំណែកអភិវឌ្ឍន៍សេដ្ឋកិច្ចជាតិ សូមអំពាវនាវដល់ គ្រឹះស្ថានផ្ដល់សេវាហិរញ្ញវត្ថុទាំងអស់ មេត្តាអនុវត្តតាមជំនាញ និងវិជ្ជាជីវៈរបស់ខ្លួនឲ្យបានខ្ជាប់ខ្ជួន និងគិតពីផលប្រយោជន៍ប្រជាជនជាធំ ស្របតាមយុទ្ធសាស្ត្រ កាត់បន្ថយភាពក្រីក្ររបស់ប្រមុខរាជរដ្ឋាភិបាល ដែលកំពុងអនុវត្តនាពេលបច្ចុប្បន្ន ៕