ភ្នំពេញ៖ នគរបាលខណ្ឌពោធិ៍សែនជ័យ បានចេញល្បាត ក៏ដេញចាប់មុខសញ្ញាចោរឆក់ ២នាក់ ទាំងប៉ផាប់ពភីង កាលពីវេលាម៉ោង២រំលងអធ្រាត្រ ឈានចូលថ្ងៃទី៩ ខែសីហា ២០១៧ នៅតាមផ្លូវចូលទ័ពអាកាសពោធិ៍ចិនតុង កែងនឹងផ្លូវសហព័ន្ធរុស្ស៊ី ស្ថិតក្នុងភូមិតាងួន សង្កាត់កាកាប ខណ្ឌពោធិ៍សែនជ័យ ។
មន្ត្រីនគរបាលខណ្ឌពោធិ៍សែនជ័យ បានឲ្យដឹងថា ជនសង្ស័យដែលសមត្ថកិច្ចឃាត់ខ្លួនបាន ទី១-ឈ្មោះ មាស រ័ត្ន អាយុ១៨ មុខរបរមិនពិតប្រាកដ និងទី២-ឈ្មោះ ស៊ឹម ពេជ្រ អាយុ១៨ឆ្នាំ មុខរបរមិនពិតប្រាកដ ។ ពួកគេទាំង២នាក់ ស្នាក់នៅព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ ហើយម៉ូតូដែលពួកគេជិះធ្វើសកម្មភាព ម៉ាកហុងដាឌ្រីម ស៊េរី០១៤ ពណ៍ខ្មៅ ពាក់ស្លាកលេខ ភ្នំពេញ 1CP-8926 ។ រីឯជនរងគ្រោះ ឈ្មោះ បូរមី ភេទស្រី អាយុ២២ឆ្នាំ មុខរបរជាបុគ្គលិក នៃហាងខារ៉ាអូខេ ម៉ូឌែនស៊ីធី ផ្លូវជាតិលេខ៣ ស្នាក់នៅក្រោយវិទ្យាល័យជម្ពូវ័ន ភូមិព្រៃពង្រខាងត្បូងសង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅភូមិស្រែញ សង្កាត់ពងទឹក ខណ្ឌពោធិ៍សែនជ័យ។
បើតាមសម្តីរបស់ជនរងគ្រោះ បានឲ្យដឹងថា មុនពេលកើតហេតុ នាងបានជិះម៉ូតូ ម៉ាកធូដេ ពណ៌ក្រហម តែម្នាក់ឯង តាមបណ្ដោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត។ លុះពេលនាងជិះម៉ូតូមកដល់កន្លែងកើតហេតុខាងលើ ស្រាប់តែលេចមុខជនសង្ស័យ២នាក់ជិះម៉ូតូមកអែបនឹងម៉ូតូរបស់នាង រួចហើយក៏លូកដៃឆក់កាបូបរបស់នាង។ ប៉ុន្តែនៅពេលនោះ នាងបានដឹងខ្លួនខ្លួនទាន់ ក៏ឆក់បានមកវិញ ហើយស្រែកថា ចោរៗ ធ្វើឲ្យផ្អើលដល់សមត្ថកិច្ច នៃអធិការដ្ឋាននគរបាលខណ្ឌពោធិ៍សែនជ័យ ដែលកំពុងល្បាត ដេញចាប់ភ្លាមៗតែម្តង។
ក្រោយពេលកើតហេតុ សមត្ថកិច្ចបាននាំខ្លួនជនសង្ស័យទាំង២នាក់ បញ្ជូនទៅកាន់អធិការដ្ឋាននគរបាលខណ្ឌ ដើម្បីចាត់បន្តតាមនីតិវិធី៕ សហការី KBN