ខេត្តកណ្ដាល៖ បុរសម្នាក់ បានស្លាប់យ៉ាងអណោចអធ័ម នៅនឹងកន្លែងកើតហេតុ ដោយសាររថយន្ត ដឹកទំនិញបើកបុកម៉ូតូ កាលពីវេលាម៉ោង៦ល្ងាច ថ្ងៃទី២៨ ខែកក្កដា ឆ្នាំ២០១៧ នៅលើដងផ្លូវជាតិលេខ5 ត្រង់ចន្លោះគីឡូម៉ែត្រលេខ33-34 ស្ថិតក្នុងភូមិពោធិ៍តូច ឃុំកំពង់ហ្លួង ស្រុកពញាឮ ខេត្តកណ្ដាល។
មន្ត្រីនគរបាលចរាចរ ស្រុកពញាឮ បានឲ្យដឹងថា រថយន្តបង្ក ម៉ាកហ៊ីយ៉ាន់ដាយ ពណ៌ស ពាក់ស្លាកលេខ 3A-0309 មិនស្គាល់អត្តសញ្ញាណ របស់អ្នកបើកបរ ពីព្រោះគេរត់គេចខ្លួនបាត់។ រីឯម៉ូតូរងគ្រោះ ម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1AI-1480 បើកបរដោយឈ្មោះ នឿន សុភឿន ភេទប្រុស អាយុ៣៧ឆ្នាំ (ស្លាប់នៅកន្លែងកើតហេតុ) មានលំនៅក្នុងភូមិធ្លកវៀន ឃុំធ្លកវៀន ស្រុកសាមគ្គីមានជ័យ ខេត្តកំពង់ឆ្នាំង។
ប្រភពព័ត៌មាន បានឲ្យដឹងថា មុនពេលកើត មាននូវគ្រោះថ្នាក់ចរាចរណ៍ បណ្ដាលឲ្យមានមនុស្សស្លាប់នោះ គេឃើញរថយន្តបង្កខាងលើ បើកបោះពួយយ៉ាងលឿន តាមបណ្ដោយផ្លវជាតិលេខ៥ ក្នុងទិសដៅពីជើងទៅត្បូង បញ្ច្រាសទិសគ្នា ជាមួយនឹងជនរងគ្រោះ ជិះម៉ូតូហុងដាឌ្រីម។ លុះពេលជនរងគ្រោះ ធ្វើដំណើរមកដល់ចំណុចកើតហេតុ ស្រាប់តែរថយន្ត រេចង្កូតទៅបុកម៉ូតូពេញទំហឹង ដួលបោកទៅលើថ្នល់ បណ្ដាលឲ្យស្លាប់យ៉ាងអណោចអធ័ម មួយរំពេច។ ឃើញហេតុការណ៍បែបនេះ អ្នកបើកបរបានរត់គេចខ្លួន បាត់ស្រមោល។
ក្រោយពេលកើតហេតុ សមត្ថកិច្ចបានចុះទៅពិនិត្យ រួចហើយធ្វើកំណត់ហេតុប្រគល់សាកសពរបស់ជនរងគ្រោះទៅឲ្យក្រុមគ្រួសារដឹកទៅធ្វើបុណ្យតាមប្រពៃណី។ ដោយឡែកយានយន្តជាប់ពាក់ព័ន្ធនឹងករណីខាងលើនេះ ត្រូវសមត្ថកិច្ចវាស់វែង និងយកទៅរក្សាទុក នៅក្នុងអធិការដ្ឋាននគរបាលស្រុកពញាឮ ដើម្បីចាត់ការតាមច្បាប់៕
