ខេត្តកណ្ដាល៖ ក្មេងប្រុសស្រី ៣នាក់បាននាំគ្នាចុះលេងទឹក បណ្ដាលឲ្យលង់ទឹកស្លាប់ ក៏បង្កឲ្យភ្ញាក់ផ្អើលពេញភូមិ នាំគ្នាចុះរាវសាកសព កាលពីវេលាម៉ោង៤ និង៥០នាទីរសៀល ថ្ងៃទី២៣ ខែកក្កដា នៅក្នុងអាងទឹកត្រដក់ពង ភូមិវត្តចាស់ ឃុំព្រែកដំបង ស្រុកមុខកំពូល ខេត្តកណ្ដាល។
មន្ត្រីនគរបាលស្រុកមុខកំពូល បានឲ្យដឹងថា ជនរងគ្រោះទាំង៣នាក់នេះ ទី១-ឈ្មោះ ឌឿន លាងហេង ភេទស្រី អាយុ១២ឆ្នាំ ទី២-ឈ្មោះ ឌុល លាងហ៊ុន ភេទប្រុស អាយុ១០ឆ្នាំ ទី៣-ឈ្មោះ រ៉េត រចនា ភេប្រុស អាយុ៩ឆ្នាំ។ ពួកគេទាំង៣នាក់ រស់នៅភូមិវត្តចាស់ ឃុំព្រែកដំបង ស្រុកមុខកំពូល ខេត្តកណ្ដាល។
ប្រភពព័ត៌មានពីប្រជាពលរដ្ឋ បានឲ្យដឹងថា កាលពីវេលាម៉ោង១២ថ្ងៃត្រង់ ថ្ងៃទី២៣ ខែកក្កដា ឆ្នាំ២០១៧កន្លងទៅនេះ ជនរងគ្រោះទាំង៣នាក់បានបណ្ដើរកង់មួយគ្រឿង នាំគ្នាទៅលេងទឹកនៅចំណុចអាងស្តុកទឹកត្រដក់ពង ខាងក្រោយភូមិវត្តចាស់ដែលមានចម្ងាយប្រហែល៥០០ម ពីផ្ទះជនរងគ្រោះ។
រហូតដល់ម៉ោង៣រសៀល ឪពុកជនរងគ្រោះ ឈ្មោះ រ៉េត រចនា បានមកពីឃ្វាលក្របី ក៏ត្រឡប់ទៅផ្ទះ បានឃើញស្បែកជើងផ្ទាត់ចំនួនបីគូនិងកង់១គ្រឿងដែលគាត់ស្គាល់ច្បាស់ថា ទាំងកង់ និងស្បែកជើង១គូនោះ គឺពិតជារបស់កូនគាត់ ដាក់ចោលនៅកន្លែងកើតហេតុ។ ឃើញដូច្នេះ ធ្វើឲ្យគាត់សង័្សយថា ប្រហែលជាកូនគាត់លង់ទឹក ទើបគាត់ចុះរាវរកកូនរបស់គាត់តែម្នាក់ឯង ប៉ុន្តែនៅពេលនោះ គាត់រាវរកមិនឃើញ។ បន្ទាប់មក គាត់បានស្រែកឆោឡោផ្អើលដល់អ្នកភូមិ រួមនឹងឪពុករបស់ជនរងគ្រោះពីរនាក់ទៀត បាននាំគ្នាយកអួនមកអូសរកសាកសព ក៏ប្រទះឃើញសាកសពជនរងគ្រោះទាំង៣នាក់ ហើយនាំយកសពកូនទៅផ្ទះរៀងៗខ្លួន។
ក្រោយពេលកើតហេតុ សមត្ថកិច្ចបានចុះទៅពិនិត្យ និងធ្វើកោសល្យវិច័យ ដោយសន្និដ្ឋានថា ជនរងគ្រោះពិតជាបានស្លាប់ដោយសារការលង់ទឹកប្រាកដមែន។ បន្ទាប់មក សមត្ថកិច្ចក៏បានប្រគល់សាកសពរបស់ជនរងគ្រោះទៅឲ្យអាណាព្យាបាល រៀបចំចាត់ចែងធ្វើបុណ្យតាមប្រពៃណី៕ សហការី KBN
